Jigjiga (Caasimada Online)-Warar dheeraad ah ayaa waxa uu kasoo baxayaa xaaladda magaalada Jigjiga oo saacadihii ugu danbeeyay aheyd mid kacsan kadib markii ciidamada Militeriga Ethiopia laga soo saaray xarumihii la geeyay.
Ciidamada Militeriga Ethiopia ayaa weli gacanta ku haya Ammaanka magaalada Jigjiga waxaana intooda badan laga soo saaray xarumo muhiim ah oo laga dajiyay magaalada waxaana aad u yar isu socodkii dadka iyo gaadiidka.
Qaar badan oo ka mid ah dadkii degenaa magaalada ayaa gobollada kala aaday waxa ayna ciidamadu yihiin kuwo wali xir xiraaya Saraakiil iyo ciidamo ka tirsan Liyuu Boolis oo iyagu garabsiiyay Madaxweynihii hore ee xariga loogu abaalmariyay.
Saraakiisha iyo Ciidamada maamulka ee ilaa iyo hadda ay xireen ciidamada Militeriga Ethiopia ayaa gaaraya ilaa 15 kuwaasi oo loo heysto inay jabsheen sharciga ciidanka.
Sidoo kale, boqolaal qoys oo ku sugnaa magaalada xadka ku taalla ee Wajaale ayaa u tallaabay dhanaka Somaliland, inkastoo aysan dhibaato ka dhicin halkaas haddana dadka ka cabsi qabay in rabshadihii ka dhacay magaalada Jigjiga Sabtidii ay halkaas ku faafaan.
Si kastaba ha ahaatee, Dowlada Ethiopia ayaa sheegtay in xil ka qaadista Madaxweynihii hore ee maamulka ay tahay mid xasilooni u ah dhulka Soomaalida.
Caasimada Online
Xafiiska Jigjiga
Caasimada@live.com
