Muqdisho (Caasimada Online) – Ra’isul wasaaraha Soomaaliya Xasan Cali Kheyre oo kaashanaya Wasiirka Maaliyadda Xukuumadda Cabdiraxmaan Beyle ayaa xilkii ka qaaday dhammaan Shaqaalihii Xafiiska Wasaardda Maaliyadda ee Dakadda Muqdisho iyadoo halkaas loo magacaabay kuwa cusub.
Waxaa magacaabistaas mar kale kasoo if baxday dagaalka uu Ra’isul wasaaraha Soomaaliya Xasan Cali Kheyre ku hayo Beesha Habargidir, maadaama dadkii xilka laga qaaday ay ku jiraan shaqsiyaad kasoo jeedo Beehsaas, isla markaasna si rasmi ah Beesha looga reebay dadka cusub ee xilalka loo magacaabay.
Xubnaha la magacaabay, xilalkooda iyo beelaha ay kasoo jeedaan ayaa kala ah:-
Magaca Shaqada Beesha
Axmed Cabdullahi Samow Maamule Gaaljecel
Maxamuud Axmed Xasan Maamule ku xigeen 1-aad Abgaal
Nadar Tabah Maalin Maamule ku xigeen 2-aad Xawaadle
Maxamuud Maxamed Guure Madaxa Qeybta qiimeynta Murusade
Maxamed Cabdirisaaq Xuseen Madaxa qeybta manafeeska Xawaadle
Saciid Cabdullaahi Ducaale Madaxa qeybta Gadiidka Warsangeli (Daarood)
Salaad Maxamed Cabdi Madaxa madaxa qeybta Dhoofinta Murusade
Axmed Maxamed Ibraahim Madaxa qeybta shaqaalaha Raxan weyne
Xasan Dhicisow Madoobe Madaxa qeybta Khasnada Abgaal
Muuse Rooble Faarax Madaxa qeybta Hubinta Murusade
Saalax Cumar Cabdullaahi Madaxa qeybta xisaabaadka Reer Ow Xasan
Cumar Maxamed Barre Madaxa Madaxa Qeybta IT Abgaal
Liiska kore waxaa ka muuqda shaqsiyaad kasoo jeeda beelo aan deegaan iyo shaqo ku lahayn Muqdisho sida Reer Aw-Xasan, Warsangeli Daarood iyo kuwa kale, sidaas oo ay tahayna beesha Habar-Gidir wax xil ah lagama siin, ayada oo laga qaaday kuwii ay haysataya.
Ra’isulwasaaraha Soomaaliya Xasan Cali Kheyre oo ay dabada ka riixayaan shaqsiyaad ka tirsan Beeshiisa ayaa dagaal culus ku hayo Beesha Habargidir, ilaa haddana la ogo sababta rasmiga ah ee keentay inay dagaal noocaan oo kale ah la galaan beel ay walaalo yihiin.
Ra’isul wasaaraha Soomaaliya iyo wasiiradiisa ayaa xil ka qaadis ku sameeyey shaqsiyaad badan oo kasoo jeedo Beesha Habargidir oo ay ugu horeeyeen Agaasimihii guud ee wasaaradda Warfaafinta Bahlaawi iyo Hanto dhowrihii qaranka Dr. Nuur Faarax Jimcaale.
In la isku badalo xilalka maahan mid dhibaato ah balse dagaalka ay Ra’isul wasaaraha iyo xirtiisa kula jiraan Habargidir ayaa ah mid toos ah oo dowladda dhan laga tirtirayo in lagu arko shaqsiyaad Habargidir kasoo jeedo oo xil hayo.
Tallaabooyinka ay qaadeen Ra’isul wasaaraha iyo kooxdiisa ayaa noqon doono mid ay ka dhalato cawaaqib xumo, islamarkaana mucaarad xooggan usoo jiida dowladda iyo madaxweyne Farmaajo.
Waxaa hadda socdo ololo ay wadaan Xildhibaanada Labada aqal iyo siyaasiyiinta kasoo jeeda beeshaan, waxaana dhawanahaan lasoo saari doonaa go’aano ku aadan Xasan Cali Kheyre iyo dowladda Farmaajo.
Madaxweynaha Soomaaliya Maxamed Cabdullaahi Farmaajo ayaa ilaa hadda si rasmi ah iyo si hoose intaba uga hadlin dagaalkaan lagu hayo Beesha Habargidir, waxaana dhowr jeer kulamo la qaatay xildhibaanada Habargidir oo markii dambe ka dhawaajiyey inuusan madaxweynaha diyaar u aheyn inuu wax ka qabato dhibaatada taagan.
W/D: Mascuud Yuusuf
Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada caasimada@live.com Mahadsanid
