Muqdisho (Caasimada Online) – Dowlada Sacuudiga ayaa shaaca ka qaaday inay qaadeyso qaar kamid ah Saraakiisha iyo ciidamada dhawaan ku dhaawacmay Qaraxii ka dhacay Xerada Nac-Naca ee Magaalada Muqdisho.
Sargaal ka tirsan dowlada Sacuudiga ayaa sheegay in ciidamadaasi caafimaad loogu qaadi doono magaalada Riyadh ee dalka Sacuudiga.
Waxa uu Sargaalkaasi sheegay inay diyaar u yihiin in dowlada Somalia ay ka caawiyaan dhinac waliba, waxa uuna daboolka ka qaaday in sida ugu dhaqsiyaha badan ay magaalada Muqdisho uga qaadi doonaan ciidamada ku dhaawacmay Qaraxii ka dhacay Xerada Nac-Naca ee Magaalada Muqdisho.
Saraakiisha iyo ciidamada loo qaadayo dalka Sacuudiga ayaa waxaa soo gaaray dhaawac culus, waxaana xusid mudan in caafimaadkooda wax looga qaban waayay gudaha dalka.
Dowlada Somalia ayaa ka mahadcelisay gargaarka ay dowlada Sacuudiga u fidisay dhaawacyada, waxa ayna rajo ka muujisay in is garabtaaga Sacuudiga uu intaa kasii badan doono.
Talaabadani ayaa kusoo beegmeysa xili Xarumaha caafimaadka magaalada Muqdisho ay buux dhaafiyeen dhaawacyo farabadan oo isugu jira Saraakiil iyo ciidamo.
Caasimada Online
Xafiiska Muqdisho
[email protected]