Muqdisho (Caasimada Online) – Siyaasiga C/raxmaan C/shakuur Warsame oo ka mida siyaasiyiinta ku kacsan dowladda Soomaaliya ayaa markii ugu horeysay so dhoweeyay raaligelintii uu madaxweyne Farmajaao ka bixiyey dhiibistii C/kariin Qalbi dhagax, sida uu shaaciyey Guddoomiyaha ONLF oo Asmara kula kulmay madaxweynaha Sooomaaliya.
Siyaasiga ayaa sheegay in cudurdaarka uu bixiyey Madaxweyne Farmaajo ay ka dhiman tahay saddex qodob oo ay ka mid yihhiin inuu raaligelin buuxda shacabka ka siiyo iyo in xukuumadda ka laabato go’aankii ay ururka ONLF uga dhigtay mid argagixiso ah, waxaana qodobadaasi ka mida:
1- Cudurdaar buuxa oo uu Madaxweynuhu siiyo Shacabka Soomaaliyeed, maadaama dhiibista Qalbidhagax ay ahayd danbi laga galay Shacabka. Waxaana taa cadayn u ah falceliska shacabka meel kasta oo ay joogeen iyo duruuf kasta oo ay ku sugnaayeen.
2- Waxaan kaloo madaxweynaha xil ka saaran yahay in Xukuumadu ay ka laabato go’aankii ahaa in ONLF ay urur argagexiso tahay, loona ogolaado in ay Muqdisho xarun ka furato.
3- In uu Madaxweynuhu balanqaad siiyo Shacabka Soomaaliyeed in uusan mar danbe muwaadin Soomaaliyeed shisheeye u gacan gelin doonin.
Mar uu ka hadlayey Cabdiraxmaan Cabdishakuur haddii uusan Farmaajo qaadin seddexaas qodob ayuu yiri”
“… Hadii kale Madaxweynuhu wuxuu u muuqanayaa nin cadaadiska Ajnabiga u nugul oo dhiibista Qalbidhagax ay Itoobiya oo ONLF ka soo horjeeda ku cadaadisay, halka cudurdaarkana Eritrea oo ONLF taageersan ka dalbatay..” .
Caasimada Online
Xafiiska Muqdisho
[email protected]