Muqdisho (Caasimada Online) – Wasiirka Dekedaha iyo Gaadiidka Badda Soomaaliya Cabdulqaadir Maxamed Nuur (Jaamac) ayaa u soo jawaabay Xildhibaan Cabdiraxmaan Cabdishakuur Warsame oo galabta faallo ka qoray kulan uu Wasiir Jaamac la yeeshay Madaxweynaha iyo Wasiirka Arrimaha Dibadda Turkiga.
Cabdiraxmaan Cabdishakuur ayaa qoraalkiisa ku sheegay in Wasiirka Arrimaha Dibadda Soomaaliya oo Ankara ku sugan uu codsaday in dhiggiisa dowladda Turkiga uu la kulmo, balse intii uu sugayey balanta la arkay Wasiirka Dekedaha Soomaaliya oo Madaxtoyada Turkiga u tegay kulan aysan safaaraddu ka warheyn.
Xildhibaan CC Shakuur oo waji gabax iyo fadeexad uu ku macneeyey arrintaan, ayaa su’aal geliyey sababta ninkaan Wasiirka Arrimaha Dibadda loogu magacaabi waayey, hadii tan oo kale aan laga baaqsa karin.
Waxaan halkaan in kula wadaageynaa qoraallada ay isugu jawaabeen labada masuul, waxaana ku hormareynaa qoraalka Xildhibaan CC Shakuur oo horeeyey, wuxuuna yiri, “Wasiirka Arrimaha Dibadda Soomaaliya ayaa dalbaday in uu dhiggiisa Turkiga la kulmo, isagoo Ankara ku sugan oo weli sugaya ayaa Wasiirkii Arrimaha Dibadda iyo Madaxweynihii Turkiga ku dul-qaabileen wasiir kale, iyadoo aysan safaaradu la socon.”
“Haddii aysan jirin tabar lagu diido xadgudubka gobonnimo iyo maamuuska dowladeed, si wejigabaxa looga baxsado, sow ma habboona in isaga Wasiirka Arrimaha Dibadda laga dhigo.”
Hoos ka akhiro jawaabta Wasiir Jaamac:
*QAXAAN-QAXA SIYAASADEED*
Digaagaddu marka ukxameyso oo dhalmada billaabi rabto ayaa waxaa astaan u ah in qaxaan-qaxdo, balse waxaa jira digaagga qaar ka mid ah oo iska qaxaan-qaxa ukunna aanan dhalin.
Xil. Cabdiraxmaan Cabdishakuur markii aan Wasiirka Cadaaladda noqday wuu iga daba qeylinayay, markii aan wasiirka gaashaandhigga noqday waa iga daba qeylinayay, hadda oo aan Wasiirka dekadaha iyo gaadiidka badda ahayna wuu iga daba qeylinayaa.
Isagu Wasiirna ma noqdo, Raisulwasaarena ma noqdo, Madaxweynena ma noqdo. Waxaan waayay wax aan ku sifeeyo oo aan aheyn qaxaan-qax digaagad ma dhasha ah.
Horay ayaa loo yiri “marba cidda qeylineysa hadey gadaashaada ka qeylineyso macnaheedu waa in aad ka horreyso oo kaliya”.
Hal arrin waan ogahay oo ah in Mashruuca Cabdiraxmaan Cabdishakuur uu ka shaqeeyo ee qarandumiska ah iyo kan aan ka shaqeeyo ee qarandhiska ah in ay kala jeedaan, balse QAXAAN-QAX waa luqad digaag wax nin wayn uu fahmi karo maaha si looga jawaabo.
Cabdiraxmaanow anna shaqaa laygu ogyahay, adna qaxaan-qax aan dhamaan iyo ma gudbenimo siyaasadeed ee soo koorseey saaxibow.
Hoos ka eeg xogta kulamadii Wasiir Jaamac iyo madaxda Turkiga
