Muqdisho (Caasimada Online) – Madaxweynaha Mareykanka, Donald Trump ayaa si lama filaan ah ugu dhawaaqay in uu si rasmi ah u soo afjaray heshiiskii xabbad-joojinta ee u dhexeeyay dalkiisa iyo Iiraan.
Trump ayaa xukuumadda Tehran ku sifeeyay “cudur dilaa ah oo ka sii daran kansarka”, intii uu ku guda jiray khudbad uu ka jeediyay magaalada Ankara ee dalka Turkiga, isaga oo garab taagnaa Xoghayaha Guud ee NATO, Mark Rutte.
Madaxweyne Trump kuma ekaan dhaleeceynta Iiraan oo keliya, balse wuxuu sidoo kale weerar afka ah ku qaaday qaar ka mid ah dalalka xubnaha ka ah NATO oo ay ku jirto Spain. Sidoo kale, wuxuu mar kale ku celiyay dalabkiisii ahaa in Mareykanku la wareego jasiiradda Greenland oo hadda ka tirsan Denmark.
Kala aragti duwanaanshaha iyo xiisadaha ka dhashay shir-madaxeedka NATO oo galay maalintiisii labaad ayaa lagu falanqeeyay warbixin gaar ah oo ay diyaariyeen suxufiyiinta Roland Oliphant iyo Joe Barnes, kuwaas oo daadihinaya barnaamijka “Iran: The Latest”.
Maxaa dhaliyay in heshiisku burburo?
Xaaladda ayaa la sheegay inay si kedis ah uga sii dartay kaddib markii Iiraan ay weerarro xiriir ah ku qaaday maraakiib shidaal oo marayay marin-biyoodka Hormuz. Wararka ayaa sheegaya in weerarradaas uu markii ugu horreysay ku jiray markab weyn oo laga leeyahay dalka Qatar.
Mareykanka ayaa la sheegay inuu uga jawaabay weerarro uu ku qaaday fariisimo ku yaalla xeebaha Iiraan, isla markaana uu meesha ka saaray ka-dhaafitaankii cunaqabateynta ee u oggolaanayay Iiraan inay dhoofiso shidaalka.
Tallaabadaas ayaa la sheegay inay sababtay in Iiraan ay diyaarado aan duuliye lahayn (drone-yo) iyo gantaallo ku weerarto saldhigyo ku yaalla Baxreyn iyo Kuweyt, taas oo ka dhigan in dagaalka Bariga Dhexe uu mar kale dib u qarxay.