Kampala (Caasimada Online) – Dowladda Uganda ayaa lagu warramay inay mabda’ ahaan oggolaatay inay ciidamo ku biiriso howlgal caalami ah oo la qorsheynayo in laga hirgeliyo Marinka Gaza, kadib codsi uga yimid Madaxweynaha Mareykanka Donald Trump.
Wargeyska dowladda Uganda ee New Vision, oo soo xigtay ilo sare oo ka tirsan ciidamada, ayaa sheegay in Madaxweyne Yoweri Museveni uu si wanaagsan uga jawaabay codsiga Trump ee ahaa in Kampala ay ka qeybqaadato Ciidanka Xasilinta Caalamiga ah ee Gaza.
Ciidamadan ayaa la filayaa inay hoos tagaan Golaha Nabadda ee dhowaan la dhisay, kaas oo loo xil saaray taageeridda qorshaha xabbad-joojinta, sugidda ammaanka iyo diyaarinta marxaladda dib-u-dhiska Gaza.
Howlgalka la qorsheynayo ayaa la sheegay inuu gacan ka geysan doono ilaalinta kala dambeynta, badbaadinta dadka rayidka ah, fududeynta gaarsiinta gargaarka bani’aadannimo iyo taageeridda dib-u-dhiska Gaza, oo burbur baaxad leh uu kasoo gaaray dagaalladii sannadihii lasoo dhaafay.
Uganda ayaa lagu wadaa inay howlgalka kula biirto dalal ay ka mid yihiin Morocco, Kosovo, Albania iyo Kazakhstan, kuwaas oo la sheegay inay horey u muujiyeen diyaar u ahaanshahooda ka qeybgalka qorshahan.
Saldhig dhinaca saadka iyo diyaarinta ciidamada ah ayaa lagu warramay in laga dhisayo dhinaca Israel ee marinka Kerem Shalom. Saldhiggaas ayaa marka hore qaabili kara ilaa 500 oo askari, kahor inta aan cutubyada loo gudbin gudaha Gaza.
Hase yeeshee, dowladda Uganda iyo taliska ciidamada UPDF weli si rasmi ah uma shaacin tirada ciidamada la diri doono, nooca cutubyada ka qeybgalaya iyo xilliga uu howlgalka bilaaban doono.
Agaasimaha ku-simaha warfaafinta ciidamada Uganda, Kornayl Chris Magezi, ayaa sheegay in UPDF ay tallaabo qaadi doonto marka ay hesho hagitaan cad oo istaraatiiji ah oo kasoo baxa Madaxweyne Museveni, oo ah taliyaha guud ee ciidamada dalkaas.
“Haddii madaxweynuhu bixiyo hagidda istaraatiijiga ah, wuxuu ciidamada UPDF ku amri doonaa inay tallaabada ku habboon qaadaan, annaguna waan fulin doonnaa,” ayuu yiri Magezi.
Qorshaha lagu dhisayo ciidamada xasilinta Gaza ayaa daba socda qaraar uu Golaha Ammaanka ee Qaramada Midoobay ansixiyey bishii November 2025, kaas oo taageeray qorshe nabadeed oo loogu talagalay Gaza, isla markaana oggolaaday sameynta ciidan caalami ah oo ku-meel-gaar ah.
Qaraarka waxaa taageeray 13 dal oo ka tirsan Golaha Ammaanka, halka Shiinaha iyo Ruushka ay ka aamuseen codeynta.
Jeneraal Jasper Jeffers oo ka tirsan ciidamada Mareykanka, loona magacaabay hoggaaminta howlgalka, ayaa la sheegay inuu dalalka ka qeybgalaya u kala qoondeyn doono waajibaadyo ciidan iyo kuwo maamul.
Waajibaadyadaas waxaa ka mid noqon kara taageeridda qorshayaasha amniga, ilaalinta goobaha muhiimka ah, fududeynta gargaarka iyo ka qeybqaadashada dadaallada lagu sii deynayo la-haystayaasha weli ku harsan Gaza.
Uganda waxay khibrad dheer u leedahay howlgalada nabad-ilaalinta, la-dagaallanka argagixisada iyo xasilinta dalalka ay colaadaha ka jiraan.
Ciidamada Uganda ayaa muddo dheer ka mid ahaa dalalka ugu badan ee ciidamada ku biiriya howlgalada Midowga Afrika ee Soomaaliya, waxayna sidoo kale ka qeybqaateen dadaallo nabad-dhis iyo tababbar ciidan ah oo laga fuliyey South Sudan iyo Jamhuuriyadda Bartamaha Afrika.
Haddii ciidamadeeda loo diro Gaza, howlgalkaasi wuxuu noqon doonaa mid ka mid ah hawlgalladii ugu waaweynaa ee Uganda ay ka fuliso meel ka baxsan qaaradda Afrika.
Waxa kale oo uu Kampala gelin karaa kaalinta hore ee dadaallada caalamiga ah ee lagu doonayo in lagu maareeyo ammaanka, gargaarka bani’aadannimo iyo dib-u-dhiska Gaza kadib sannado dagaallo iyo burbur ah.