Addis-Ababa (Caasimada Online) – Ra’iisul Wasaaraha Itoobiya Abiy Ahmed ayaa ku hanjabay in wax uu ugu yeeray cadawga Itoobiya ay kala daadin doonnaan, midba mar, xilla ay ka sii dareyso xiisadda gobolka.
Ra’iisul Wasaaraha ayaa hadalkan ka sheegay munaasabad lagu xusayay maalinta qowmiyadaha. Wuxuu ka codsaday dadka Itoobiyaanka ah inay “isu yimaadaan oo u midoobaan nabadda, danta qaranka iyo inay mid noqdaan”.
Xafladan ayaa sanad walba la xusaa.
Xuska sanadkan ayaa lagu qabtay magaalada Hosaayna ee bartamaha dalka Itoobiya, iyadoo ay ka soo qaybgaleen mas’uuliyiin iyo marti-sharaf kale.
Ra’iisul Wasaare Abiy lama maqal cidda uu ula jeedo cadowga, sida lagu arkay muuqaal lala wadaagay warbaahinta gudaha.
Si kastaba ha ahaatee, saraakiisha Itoobiya ayaa ereygan ku tilmaamaya dalalka ay u arkaan inay cadow ku yihiin Itoobiya.
Hadalkiisa ayaa yimid iyadoo ay sii xoogeysatay xiisadda kala dhexeysa Eritrea ee ku aaddan sheegashada badda ee Itoobiya.
Xitaa ka dib markii ay Itoobiya dhamaystirtay biyo-xidheenka GERD kaddib 14 sano oo dhisme ah, waxaa dhawaan soo ifbaxday xiisaddii Masar.
Wasiirka Arrimaha Dibadda ee Masar, Badr Abdelatty, shirka Doha Forum ee toddobaadkan dhacay ka sheegay in dhibaatooyinka maanta ka taagan Soomaaliya ay u baahan yihiin taageero caalami ah oo isku-dubaridan.
“Waxaa jira kuwo isku dayaya inay gobolka [Soomaaliya] ka dhigaan meel lagu tartamo,” ayuu yiri Badr Abdelatty.
Tallaabadan oo kale ayaa khatar gelinaysa midnimada Soomaaliya, waxayna degganaansho la’aan ka dhigaysaa gobolka Badda Cas, ayuu yiri.
Inkasta oo aysan magacaabin kuwaas, haddana dhawaanahan waddamada waaweyn sida Mareykanka, Ruushka iyo Shiinaha ayaa kordhiyay dhaqdhaqaaqyadooda Geeska Afrika iyo dadaalladooda ku aaddan inay ku guulaystaan diblomaasiyadda.
Mareykanka iyo Shiinaha ayaa magacaabay ergaygii ugu horreeyay ee gaar ah ee Geeska Afrika.
Dhinaca kale, Wasiir Badr Abdelatty oo la hadlay BBC-da ayaa sheegay inaanay Itoobiya dib uga wadahadli doonin “kaddib 13 sano oo wadahadallo ah oo aan miro-dhal ahayn”.
Wasiirka Arrimaha Dibadda Itoobiya oo arrintaas ka jawaabaya ayaa, bayaan uu soo saaray, wuxuu si kulul ugu dhaliilay Masar inay isku dayeyso inay abuurto dalal hoos yimaada Koonfur Afrika.