Muqdisho (Caasimada Online) – Siyaasiga caanka ah Cabdiraxmaan Cabdishakuur Warsame, ahna xildhibaan ka tirsan Golaha Shacabka ayaa ka hadlay arrimo ku aadan inuu damac uga jiro kursiga wasiirka arrimaha dibadda Soomaaliya oo illaa iyo hadda la magacaabin, kaas oo uu horay isaga casilay Abshir Huruuse oo la tartamay Saciid Deni.
Cabdiraxmaan Cabdishakuur ayaa mar la waydiiyey inuu damac uga jiro xilka wasiirka arrimaha dibadda Soomaaliya, wuxuu si cad u sheegay inuusan hadda rabin xilkaasi.
“Aniga hadda wasiir arrimo dibadeed ma rabo bugaagta ayaan iska akhrisanayaa” ayuu yiri Cabdiraxmaan mar la waydiiyay su’aashan.
Sidoo kale wuxuu aad ugu dhaliilay madaxweynaha iyo ra’iisul wasaaraha in dalka aanu xilligan lahayn wasiir arrimo dibadeed, ayada oo lagu jiro dagaal diblumaasiyadeed.
“In wasiir arrimo dibadeed aanu maanta lahayn dalkan waxay tilmaam ka tahay in dowadda aysan daacad ka ahayn dagaalka diblumaasiyadda ee ay ku jirto” ayuu ku daray.
Warsame ayaa kula taliyay madaxweyne Xasan Sheekh inuu nasto, isla markaana uu magacaabo wasiirkii qaban lahaa shaqada arrimaha dibadda ee Soomaaliya.
“Madaxweynaha waxa uu u baahan yahay inuu nasto shaqada wasiirka arrimaha dibadda inta la magacaabo uu qabto” ayuu mar kale yiri xildhibaanku.
Ugu dambeyn wuxuu hoosta ka xariiqay in kuraasta ka maqan golaha wasiirada ay leeyihiin beelo Soomaaliyeed, loona baahan yahay in si deg deg ah loogu magacaabo xilalkaas.
“War Qabiiladii Mariixaan iyo Majeerteen hala magacaabo shalay waxaa la sameeyay kuwa joogo ayaa la’isku bed-bedalay maxaa la’isugu beddalayaa kuwo ayaaba maqanee” ayuu sii raaciyay.
