Gaalkacyo (Caasimada Online) – Wararka naga soo gaaraya Mudug ayaa sheegaya in maanta dab la qabadsiiyay deegaanka Huldooyaale oo dhaca koonfurta gobolkaas.
Deegaankan oo hoostaga degmada Baxda ayaa waxaa gubay maleeshiyaad la sheegay inay soo abuuleen Al-Shabaab, kuwaas oo dab qabadsiiyay guryo ay daganaayeen shacab.
Ujeedka arrintan ka dambeeya ayaa waxaa lagu sheegay inay koxoda gol-leeyahay inay ku fashiliyo wajiga labaad ee dagaalka ka dhanka ah ee haatan ka socda gobollada dalka.
Guddoomiye ku xigeenka maamulka magaalada Baxda oo la hadlay warbaahinta dowladda ayaa shaaca ka qaaday in qorshaha lagu gubay Huldooyaale ay ka dambeeyaan Shabaab.
“Waxay Khawaarijta ugu talagashay inay dagaallada Soomaaliya ka socda oo iyaga lagu dabar goynayo inay ku xagal daaciyaan,” ayuu yiri guddoomiye ku xigeenka Baxdo.
Sidoo kale mid kamid ah saraakiisha ciidamada huwanta ee ku sugan halkaasi, ayaa isuguna sheegay in maleeshiyaadka fuliyay dhacdadaan ay fuliyeen amar ay soo siiyeen Al-Shabaab, isla-markaana qorshahooda uu yahay fashilinta dagaalka gobolka Mudug.
“Dadka meeshaan gubay waxay u egyihiin dad lasoo faray xilligan laguma jiro mar qabiil qabiil loo diriro, waxaan tan u aragnaa in lagu fashilinaayo wejiga labaad ee dagaalka,”.
Dhanka kale ma jiro illaa iyo hadda wax hadal ah oo kasoo baxay dhinaca kooxda Al-Shabaab oo ku aadan eedeyntan cusub ee loo jeediyay.
Si kastaba, Gobollada Galgaduud iyo Mudug ee bartamaha Soomaaliya ayaa waxaa haatan ka socda guluf dagaal oo ka dhan ah Al-Shabaab, kaas oo guullo waa weyn laga gaaray.
