Awdheegle (Caasimada Online) – Guddoomiyaha maamulka gobolka Shabeelaha Hoose, Maxamed Ibraahim Barre oo shir jaraa’id u qabtay Wariyeyaasha ayaa ka hadlay dagaalkii xooganaa ee saaka ka dhacay degmada Awdheegle oo ay weerar ku qaadeen Al-Shabaab.
Guddoomiyaha ayaa sheegay in laga hortegay weerarka kooxda, isla-markaana loo dhigay cashir lama ilaawaan ah, sida uu hadalka u dhigay.
“Saaka nimankii nabad diidka ahaa ayaa waxa ay isku dayeen in ay weerar kusoo qaadaan degmada Awdheegle ee gobolka Shabeelada Hoose, iyaga oo weerarka ay soo qaadeen aanan ku guulaysanin ciidamada Xoogga dalka Soomaaliyeedna ay cashir lama illowaan ah u dhigeen, halkaas oo ay mar dambe ku soo deg-degi doonin” ayuu yiri guddoomiyuhu.
Barre ayaa xaqiijiyay in ku dhowaad 100 xubnood oo ka tirsanaa xubnaha weerarka soo qaaday goobta lagu dilay, ayna ku halaagsameen dagaalkii ka dhacay Awdheegle.
“Waxaa meesha ka dhacay oo aan xaqiijinaynaa illaa iyo tiro boqol ku dhowaad ah oo nabad diidka ah in la dilay, kuwaas oo lasoo khalday” ayuu mar kale yiri Barre.
Sidoo kale wuxuu ku sii daray “Halaag wayn ayaa saaka ka raacay, dhibaato weyn ayaa ku dhacday jab weyna waa gaaray oo ay marnaba kasoo kabsan doonin”.
Maxamed Ibraahim Barre oo hadalkiisa sii wata ayaa shaaciyay inay qaadi doonaan guluf ka dhan ah Al-Shabaab, ayna ugu tegi doonaan meelaha ay kasoo abaabulaan weerarada.
“Waxaan ballaan qaadaynaa in meesha ay weerarka kasoo qaadayaan aan ugu tegi doono oo aysan noqon doonin in lagu sugo degmooyinka” ayuu mar kale yiri guddoomiyuhu.
Al-Shabaab ayaa inta badan weeraro kusoo qaada degmooyinka gobolka Shabeelaha iyo saldhigyada ciidamada dowladda, waxaana ka dhasha khasaare soo gaaray labada dhinac.
