Puntland oo oo 30 cisho u qabatay DF Soomaaliya kaddibna go’aansaneysa…

By Asad Cabdullahi Mataan

Garoowe (Caasimada Online) – Puntland ayaa markii ugu horreeysay shaacisay waqtiga uu furan-yahay wada-hadal ay la galaan dowladda dhexe ee Soomaaliya.

Muddo saddon cisho gudaheeda ayey sheegtay Puntland inay ku ogal-yihiin wada-xaajodka lugu saxayo khilaafadka labada dhinac,haddii waqtigaa uu furmi waayo wada-hadalka waxaa ay sheegtay Puntland inay qaadanayso go’aan cad.

“Dowladda waxaa naga dhaxeeya magaca faderaalka iyo Soomaalinimada,waxaan ay Puntland ilaashanayso waa waxa ay leedahay,haddii ay ka soo dib dhacaan wada-hadalka go’aan qadashada shacabka iyo dowladda Puntland baa leh” Sidaa waxaa yiri afhayeenka Puntland, Cabdullaahi Maxamed Jaamac Quraan-jecel.

Quraan-jecel isagoo la hadlayey warbaahinta gudaha waxaa uu sheegay inaysan waqti galin doonin qorshaha faderaalka,isagoona inta raaciyey inay wadaagan qadiyada Soomaalinimada.

“Puntland mashquul kuma aha maxaa laga yeelay.? yaa soo hadlay.? shirku hadduu qabsoomo waa wixii la doonayay in Puntland iyo dowladda federaalka ay wada hadlaan, kuna wada-hadalaan meel madal ah oo loo wada jeedo. Haddii uu qabsoomi waayo Puntland uma dhutinayso”Ayuu yiri Afhayeenku.

Afhayeen Cabdullaahi Quraan-jecel wuxuu sheegay in Puntland wakhti ay siisay dowladda federaalka ah si loo wado hadlo, maadama beesha caalamka iyo xildhibaanada federaalka ee Puntland ka soo jeeda ay dalbadaan in wakhti la siiyo si wada-hadal loo qorsheeyo.

Docda kale, Quraan-jecel wuxuu sheegay in Puntland iyo shacabkeeda ay ka tashan doonaan aayahooda, hadii dowladda federaalka ah ay cadayn weydo qorshaheeda.

“Dowladda federaalka mushaar ma siiso shaqaalaheena, ceelal nooma qodo, goroomo nooma dhisto,beero nooma waraabiso. Keliya waxaa naga dhexaysa Soomaalinimada”Ayuu yiri Cabdullaahi Quraan-jecel oo intaas ku daray “waxaan ilaashanaynaa waxaana leenahay.”ayuu ku daray hadalkiisa afhayeenka dowladda Puntland.

Caasimada Online

Xafiiska Garoowe

caasimada@live.com