Muqdisho (Caasimada Online) – Agaasimaha Guud ee Hay’adda Socdaalka iyo Jinsiyadda Soomaaliya, Mustafe Sheekh Cali Dhuxulow oo xalay Muqdisho ku qabsaday xaflad uu ugu dabaal-dagayay sanad-guuradiisa koowaad markii loo magacaabay xilka ayaa ka hadlay arrimo ku aadan dhalinyarada TikToklayda oo qaarkood ku sugnaa munaasabadda.
Agaasimaha ayaa sheegay in dhowr safaaradood ay kala hadleen in dhalinyaradan oo isugu jiro gabdho iyo wiilal la siiyo Visaha dalal ay kamid yihiin Mareykanka, Ingiriiska iyo Talyaaniga, si ay barnaamijyo uga soo diyaariyaan, kadibna ay dib ugu soo laabtaan dalkooda
“Safaradaha waxaan kala hadlay in gabdhaha iyo wiilasha TikToklayda la siiyo Visaha si Talyaaniga, Ingiriiska iyo Mareykanka ay uga soo diyaariyaan Barnaamijyo” ayuu yiri agaasimaha guud ee Hay’adda Socdaalka Jinsiyadda.
Sidoo kale Agaasimaa Hay’adda Socdaalka iyo Jinsiyadda ee Jamhuuriyadda Federaalka Soomaaliya ayaa soo bandhigtay Warbixin Sanadeedka Waxqabadka ee Sannadka 2025, iyadoo hal-ku-dheggu yahay “Secure Borders, Safe Somalia / Xakamaynta Xuduudaheenna – Ilaalinta Dadkeenna.”
Warbixintan ayaa muujinaysa horumar ballaaran oo Hay’addu ka gaartay sugidda amniga xuduudaha dalka, casriyeynta adeegyada socdaalka, iyo hirgelinta isbeddel dhijitaal ah oo saldhig u ah hufnaan, daahfurnaan iyo adeeg tayo leh. Sidoo kale, waxaa lagu falanqeeyay dib-u-habeynta sharciyeed, nidaamyo iyo qaab-dhismeed hay’adeed oo waafaqsan qorshaha istiraatiijiga ah ee HSJ (2025–2029).
Sannadka 2025, Hay’adda Socdaalka iyo Jinsiyadda waxay guulo la taaban karo ka gaartay hirgelinta Nidaamka Oggolaanshaha Safarka Elektarooniga ah (e-TAS), casriyeynta baasaboorrada waafaqsan heerarka ICAO, xoojinta la-dagaallanka tahriibinta iyo dambiyada la xiriira socdaalka, iyo horumarinta nidaamyada xog-ururinta, ilaalinta xogta iyo maamulka waxqabadka.
Hay’adda Socdaalka iyo Jinsiyadda ayaa mar kale adkaysay sida ay uga go’an tahay ilaalinta amniga qaranka, fududeynta safarka sharciga ah, dhowrista xuquuqda aadanaha, iyo hirgelinta hannaan casri ah oo ku dhisan xog, tiknoolajiyad iyo isla-xisaabtan.
