Khartuum (Caasimada Online) – Dowladda Suudaan ayaa maanta si rasmi ah ugu dhawaaqday inay dib ugu laabatay caasimada dalkaasi ee Khartuum, kadib muddo ay xukuumaddu si KMG ugu shaqeynaysay magaalada Port Suudaan.
Ra’iisul Wasaaraha Suudaan Kamal Idris oo maanta warbaahinta kula hadlay gudaha magaalada Khartuum, ayaa xaqiijiyay in xukuumaddiisu ay si buuxda ugu soo guurtay caasimadda, si loo dardar galiyo u adeegida bulshada.
Sidoo kale wuxuu shaaca ka qaaday in dib loo billaabay duulimaadyadii caalamiga ahaa ee ka degi jiray garoonka caalamiga ah ee Khartuum.
Tallaabadan ayaa ka dhigan in xayiraaddii saarnayd hawada caasimadda laga qaaday, iyadoo diyaaradihii ugu horreeyay ee caalami ah ay shalay ilaa maanta ka soo degeen garoonka.
Magaalada Khartuum ayaa waxaa ka muuqda soo kabasho, iyadoo kumanaan ruux ay dib ugu soo laabteen, kuwaasi oo hore uga qaxay dagaalka Militeriga Suudaan iyo kooxaha RSF oo billaawday bishii April ee 2023.
Tan iyo bishii Abriil 2023, dagaalka Sudan wuxuu abuuray dhibaatadii barakaca ee ugu weyneyd adduunka, wuxuuna horseeday in dowladda Mareykanku ay si rasmi ah u go’aamiso in ciidanka RSF ay galeen xasuuq.