Addis Ababa (Caasimada Online) –Dowladda Itoobiya ayaa cabasho ka dhan ah Eritrea u dirtay dowladda Mareykanka, iyadoo ku eedeysay Eritrea inay diyaarinayso dagaal weyn oo ka dhaca gudaha Itoobiya, kaas oo la qorsheeyey inuu qarxo saddexda bilood ee soo socda.
Warbixin cusub oo ay baahisay Addis Standard ayaa sheegaysa in Itoobiya cabasho rasmi ah u dirtay Mareykanka, taas oo ku saabsan in Eritrea ay wado diyaar-garow dagaal oo ballaaran oo laga fulin doono gudaha Itoobiya.
Sida lagu sheegay warbixinta, Wasiirka Arrimaha Dibadda Itoobiya, Gedion Timothewos, ayaa qoraal arrintan la xiriira u diray Xoghayaha Arrimaha Dibadda Mareykanka, Marco Rubio.
Sidoo kale, Dowladda Itoobiya waxay u aragtaa tallaabooyinka ka imaanaya dhanka Eritrea, kuwo keeni kara xasilooni darro weyn oo ka dhalata gudaha dalkeeda, sida ku cad cabashada ay u gudbiyeen Mareykanka.
Inkastoo dhanka Eritrea aan la helin wax war ah oo rasmi ah, haddana xiriirka labada dal ayaa xumaa tan iyo markii uu dhammaaday dagaalkii Tigray, kaas oo iyagoo xulufo ah ay galeen.
Dowladda Itoobiya waxay sidoo kale ka codsatay Mareykanka inuu arrintan si dhab ah u eego, isla markaana uu Eritrea ku cadaadiyo inay joojiso wax kasta oo keeni kara colaad cusub.
26 June 2025, Wasaaradda Warfaafinta Eritrea ayaa eedeymaha Itoobiya ku tilmaamtay marin habaabin ay wado Itoobiya, ayna ku dabooleyso qorshe duulaan ah iyo in Itoobiya ay aad u raadineyso marinka biyood iyo deked, iyada oo caddeysay in hadii awoodo militari loo baahdo ay isticmaali doonto.