Nairobi (Caasimada Online) – Gudida doorashooyinka Kenya ayaa sheegtay in ay ku hawlan tahay in ay sida ugu dhakhsaha badan u shaaciso natiijada kama dambaysta ah ee doorashada madaxtinimada ee dalka ka dhacday.
Gudida ayaa sheegay in Natiijada doorashada Kenya ay shaacin doonaan maanta oo Jimco ah, gaar ahaan xiliyada danbe.
Natiijada hordhaca ah ayaa muujinaysa in uu madaxweynaha xilka haya, Uhuru Kenyatta, kaga adkaaday ninkii la tartamayey ee Rail Odinga codad aad u badan. Laakiin Odinga taageerayaashiisa ayaa iyaguna baahiyey tiro ay iyagu soo saareen taas oo isaga ka dhigaysa in uu ku horreeyo codadkii la dhiibtay, waxaanay sidoo kale sheegeen in kombuyuutarrada gudida doorashooyinka la jabsaday si isaga codadka looga leexsado.
Hase yeeshee gudida doorashooyinka Kenya ayaa dooddaa mucaaradka ee ah in ay guuleysteen ku tilmaantay mid “sharci darro ah oo aan loo fadhiyin”.
Goob joogayaasha caalamiga ah ayaa iyaguna sheegay in doorashadii guud ee dalka ka dhacday ahayd mid xor ah oo xalaal ah.
ISHA BBC
