Laascaanood (Caasimada Online) – Hay’adda caalamiga ah ee Laanqayrta Cas (ICRC) ayaa sheegtay in 43 mayd laga soo ururiyey toddobaadkii lasoo dhaafay jiidda hore ee dagaalladii ugu dambeeyey ee ka dhacay magaalada Laascanood.
Qoraal ka soo baxay ICRC ayaa lagu sheegay in Somaliland iyo xoogagga SSC-Khatumo ay dagaalka ku kala qabsadeen boqolaal maxaabiis ah, iyadoo ICRC ay soo booqatay 300 oo maxbuus oo xooggaga Khatumo ay qabteen.
Sidoo kale waxay hey’adaan xaqiijisay in dadkaas ay ku jirin afar maxbuus oo dhaawacyo qaba kuwaas oo loo gudbiyey isbitaalka, waana markii ugu horeysay oo laga soo waramay tirada iyo aragtida ciidamadii Somaliland ee u gacan galay SSC.
Bayaankaan oo soo baxay Jimcihii maanta waxay ICRC ku sheegtay in 110 oo kale ay geeyeen isbitaalka, kuwaas oo dhaawacyo ay kasoo gaareen dagaalkii saldhigga Goojacadde.
Somaliland oo maalin ka hor war kasoo saartay sida loola dhaqmo ciidamadii looga qabtay dagaalka ayaa xoogagga SSC xasuusisay xeerka caalamiga ah ee Geneva oo dhigaya xuquuqda maxaabiista dagaalka iyo dhaqanka islaamka.
Boqolaal qof ayaa lagu kala qabsaday dagaaladii ugu dambeeyey ee dhexmaray Somaliland iyo Khaatumo, waxayna ICRC markii ugu horeysay ku guuleysatay inay booqato maxaabiista labada dhinac, si loo ogaaday nolosha lagu hayo.
Shaqaalaha hey’adaas ayey Somaliland u ogolaatay inay booqdaan maxaabiis laga qabtay xoogagga SSC, kuwaas oo ku xiran xabsiyada magaalada Hargeysa.
Eedeynaha ku xusan warbixintaan ayaa muujinaya inuu jiro beegsi lagu sameeyey xarumihii qaabili lahaa dhaawacyada ee isbitaallada, inkastoo wasaaradda gaashaandhigga Somaliland ay horay u beenisay in ciidamadeedu ay duqeeyeen isbitaalka magaalada guud ee Laascaanood oo dhibaatada ugu badani ay soo gaartay.
