James Swan oo war cusub kasoo saaray doorashada

Zahra Axmed GacalBy Zahra Axmed Gacal

Baydhaba (Caasimada Online) – Xubno ka socda beesha caalamka oo uu hoggaaminayo Ergeyga Gaarka ah ee Xoghayaha Guud ee Qaramada Midoobay James Swan ayaa maanta gaaray magaalada Baydhaba ee gobolka Bay, waxayna halkaas ka sheegeen inay aad muhiim u tahay wada shaqeyn si buuxda u dhex marta dowladda federaalka iyo dowladaha xubnaha ka ah, si bey yirihadeen wadajir looga shaqeeyo danta guud ee Soomaalida.

“Waxaa dhiirri-gelinayaa dib u soo nooleynta wadahadalka u dhexeeya Dowladda Federaalka iyo dhammaan Dowlad-goboleedyada Xubnaha ka ah Federaalka. Tani waxaa ka mid ahaa shirarkii isdaba joogga ahaa ee ka dhacay magaalada Dhuusomareeb bilihii la soo dhaafay iyo shirkii wadatashiga ee ka dhacay magaalada Muqdisho bishii Sebtember oo intii lagu guda jiray lagu gaaray heshiiskii nooca doorashooyinka”  waxaa sidaas yiri Ergeyga Gaarka ah ee Xoghayaha Guud ee Qaramada Midoobay u qaabilsan Soomaaliya, James Swan.

“Waxaan Madaxweyne Cabdicasiis uga mahadcelineynaa hoggaamintiisa ku aadaneyd marxalado badan ee geedi socodkan,” ayuu raaciyay, isagoo ka hadlay shir jaraa’id oo kooban oo uu ku qabtay caasimadda ku meel gaarka ah ee Baydhaba, kadib kulan kooxeed uu la qaatay Madaxweynaha Koonfur Galbeed, Cabdicasiis Xasan Maxamed ‘Laftagareen.’

Ergayga Qaramada Midoobay ayaa socdaal ku tagay magaalada Baydhabo, isaga oo ay weheliyaan Wakiilka Gaarka ah ee Guddoomiyaha Midowga Afrika (AU), Danjire Francisco Madeira; Safiirka Midowga Yurub (EU) ee Soomaaliya, Danjire Nicolas Berlanga; iyo Madaxa Ergada ee Urur-goboleedka IGAD, Jamal Ahmed Ibrahim.

Swan wuxuu hadalkiisa ku sheegay in natiijooyinka shirarkii Dhuusomareeb iyo Muqdisho ay muujiyeen waxa la gaari karo marka madaxda Soomaaliya ay isugu yimaadaan si is afgarad iyo wada shaqeyn leh.

“Waxaan ku boorineynaa madaxda inay sii wadaan diyaar garowga loogu jiro doorashooyinka qaranka si ay u noqdaan kuwo ku saleysan daahfurnaan, cadaalad iyo u wada dhammaansho,” ayaa yiri Ergeyga Gaarka ah ee Qaramada Midoobay” ayuu yiri.

Isagoo sii hadlaayey ayuu yiri “Tani waxay khuseysaa dhammaan dhinacyada geeddi-socodka doorashooyinka, sida sameynta guddiyada doorashooyinka madax-bannaan ee heer federaal iyo heer dowlad goboleed, Guddiga Xallinta Khilaafaadka iyo Guddiga Amniga Doorashooyinka.”

James Swan ayaa sidoo kale xusay ahmiyadda ay leedahay in la yeesho wada shaqayn dhow si loo xaqiijiyo amniga doorashooyinka, wuxuuna garwaaqsaday dadaalada maamulka Dowladda Koonfur Galbeed ee ku aadan arrintan, inkastoo ay jirto khatarta joogtada ah ee Al Shabaab.

Xubnaha beesha Caalamka ayaa sidoo kale ku dhiirrigeliyey madaxda Soomaaliya inay iskaashigooda sii ballaadhiyaan dhinacyada kale, sida dib-u-eegista dastuurka iyo geeddi-socodka kale ee gacan ka geysan kara horumarinta arrimaha hortabinta u leh qaranka, dib-u-habeynta dimuqraadiyadda iyo xorriyadaha asaasiga ah, sida xorriyadda hadalka iyo xorriyadda saxaafadda.

“Kuwani dhammaantood waa qaybo muhiim ah oo ka mid ah nidaam dimoqraadiga ah ee nool oo u oggolaanaya in la maqlo codadka Soomaalida,” ayuu yiri James Swan, isaga oo intaa ku daray “in Midowga Afrika, Midowga Yurub, IGAD iyo QM ay sii wadi doonaan garab istaagga shacabka Koonfur Galbeed iyagoo dhisanaya mustaqbal wanaagsan”.

Dhanka dhaqaalaha, saaxiibada beesha caalamka ayaa qiray “saameynta ba’an ee cudurka safmarka ah ee COVID-19 iyo sida uu u curyaamiyay kobaca dhaqaalaha ee Dowlad Goboleedka Koonfur Galbeed” waxay sidoo kale hoosta ka xariiqeen muhiimadda ay ururinta dakhliga iyo maamul wanaagga u leeyihiin mustaqbalka horumarka dowlad goboleedka Koonfur Galbeed.