Muqdisho (Caasimada Online) – Guddoomiye ku-xigeenka amniga iyo siyaasadda gobolka Banadir Maxamed Axmed Diiriye oo ka qeyb-galay kulan amniga looga hadlayay oo ka qabsoomay degmada Hodan ayaa ka hadlay qorshe cusub oo lagu sugayo amniga caasimada.
Qorshahan cusub ayaa waxa uu sare u qaadaya wada-shaqeynta shacabka, taliyayaasha saldhigyada iyo maamulka gobolka, ayada oo guddiyo waaxeedyo loo sameeyay xaafadaha kala duwan, si ay si dhow iskaga warhayaan maamulka gobolka iyo bulshada ku nool magaalada Muqdisho.
“Qorshahan oo lagu rabo in lagu ogaado xogta qarsoon ee ku jira guryaha lagu nool yahay iyo banaankooda intaba wixii ka jira in la ogaado. Inaga oo iskaashaneyna oo dhamaanteen isku xiranahay, kooxdiina halkan fadhida iyo gobolka Banaadir oo ugu sareeyo Madaale, haddaan iskaashano inteena cadow ma fakan karo, mid bulshada dhibayana ma fakan karo,” ayuu yiri.
“Waxaa rabna in aan ka shaqeyno magaaladan horumarkeeda, haddaan dhamaanteen sidaas isku kaashano cadowga kuma dhuumaaleysan karo nooca uu doono ha noqdeen ama ha noqdo kuwa dadka isbaareysanaya oo shaadhka shacabka wata ama ha noqdaan kuwa Khawaarijta ee raba inay dadka handadaan oo dilaan.”
Taliyaha qeybta Waliyow Cadde ee ciidanka Booliska Soomaaliyeed oo isaguna ka hadlay kulankaan ayaa bogaadiyay qorshaha cusub ee sare loogu qaadayo amniga caasimada, isaga oo tilmaamay in wax badan iska badalayaan wada-shaqeynta maamulka iyo talisyada saldhigyada oo markii hore uu madmadow ka dhex jiray.
“Waxaa ballan-qaadeyna in shaqooyinka la isku arko oo habeenkii meelaha laga shikisan yahay guddoomiyaha degmada iyo taliyaha saldhiga hormuud u noqdaan oo kolba habeen waax la baaro, cadowgan guryaha kasoo dhex toosaya ee wax ku dhex farsameynaya waa laga adkaan karaa,” ayuu yiri.
“Guddoomiye waxaa nagu soo noq-noqotay laamayaasha iyo tabeelayaasha xuquuq maleh, waa in xuquuq loo raadsho si cadowga looga adkaado. Caasimadda waxay la jaanqaaday caasimadaha waa in boorka la iska jafo oo shaqooyinka dheeraadka ah ee noo yaalla la galo.”
Guddoomiyaha maamulka gobolka Banaadir, ahne Duqa magaalada Muqdisho, Mudane Yuusuf Xuseen Jimcaale (Madaale) ayaa dhawaan sheegay in aysan cabsi gelin doonin weerarada Al-Shabaab, ayna sameyn doonaan waxkasta oo looga hortagayo abaabulka kooxda.
Maamulka gobolka ayaa muddooyinkii dambe waday dadaalo wax looga qabanayo halista amni ee ka taagan caasimada dalka ee magaalada Muqdisho, ayaga oo shacabka Muqdisho ka dalbaday inay garab istaagaan dowladdooda, si looga adkaado kooxda Al-Shabaab.
