Muqdisho (Caasimada Online) – Dowladda Federaalka Soomaaliya ayaa gebi ahaanba beenisay inuu jiro xiriir diblomaasiyadeed oo ay la bilowday Israa’iil.
Wasiiru-dowlaha Arrimaha Dibadda ee Soomaaliya, Cali Balcad ayaa meesha ka saaray gabi ahaanba inuu jiro qorshe xitaa xiriir lagula sameynayo Israa’iil, iskaba daa in Soomaaliya ay bilowday.
Wasiir Balcad ayaa sheegay in mowqifka Dowladda Soomaaliya uu yahay mid cad oo aan isbeddelin, isagoo beeniyay warar la xiriiray arrintan oo maalmihii dambe ay baahinayeen warbaahinta Israa’iil.
Beeninta Wasiir Balcad ayaa imaneysa xilli uu Wasiir-ku-xigeenka Arrimaha Dibedda Israa’iil, Sharren Miriam Haskel-Harpaz u sheegay warbaahinta Israa’iil in ay wada-hadallo la yeesheen dalal badan oo Afrikaan ah oo Soomaaliya ku jirto.
Si kastaba, Dowladda Federaalka Soomaaliya ayaa arrintan meel adag ka istaagtay, iyadoo ku tilmaamtay mid aan sal iyo raad toona lahayn.
Soomaaliya weligeed xiriir diblomaasi lama yeelan Tel Aviv.
Arrimahan ayaa imanaya xilli Washington ay xulafadeeda dalalka Carabta iyo dalalka kale ee xiriirka diblomaasiyadeed kala dhaxeeya u caadiyeynayso xiriirka Israa’iil.
Mareykanka oo ah dalka taageerada ugu weyn siiya Israa’iil, ayaa muddo isku dayayey inuu heshiis xiriir dhex-dhigo Sacuudi Carabiya iyo Israa’iil, taasi oo uu sidoo kale Mareykanka ka dammaanad qaaday amniga Boqortooyada.