Muqdisho (Caasimada Online) – Habeen hore waxaa shaqada laga eryay Wasiirkii Maaliyadda dowladda federaalka ah Dr. Cilmi Maxamuud Nuur.
Marka la eego dhacdooyinkii socday maalmahan dadka qaarkii waa filan kareen isbeddel, laakiin maadaama Dr. Cilmi ka tirsanaa xisbigii madaxweynaha ee UPD oo xubin muhiim ah u ahaa kooxda, waa adkeyd in la aamino in xil ka qaadis la sumcad xumeeyay lagu sameyn doono.
Dr. Cilmi waxa uu dhawaan shaqo joojin ku sameeyay agaasimaha dakhliyadda iyo xisaabiyaha guud ee qaranka. Arrintaan waxaa la sheegay inay madaxda sare ee dowladda ka carootay.
Wuxuu u muuqday go’aan uu si shaqsi ah u gaaray. Cadaadis badan kadib Dr. Cilmi waxaa lagu qasbay inuu dib usoo saaro warqad uu kaga laabanayo shaqo joojintaas.
Inkasta oo ay dooddo sharci ah ku furan yihiin awoodda uu wasiirka Maaliyadda u leeyahay inuu shaqada ka joojiyo xisaabiyaha guud ee qaranka.
Haddana midda ugu muhiimsan waa in wasiirkii lagu qanciyay inuu go’aankiisi hore ka laabto, maalinkii xigayna isaga ayaa lagala laabtay xilkii wasiirnimadda.
Dadka qaarkii waxay leeyihiin “si sumcad ahaan aad u hooseysa oo aanu filan karin qof ka tirsan xisbiga madaxweynaha ayaa loola dhaqmay wasiirkii Maaliyadda Dr. Cilmi Maxamuud Nuur.”
Saddex arrimood oo is-biirsatay ayaa loo aaneynayaa sababta keentay xil ka qaadista Dr. Cilmi, iyada oo xilkiisii loo magacaabay Biixi Iimaan Cige oo laga soo wareejiyay wasaaradda shaqada iyo arrimaha bulshada.
1. Khilaaf muddo ka jiray gudaha wasaaradda
Sida ay illo xogagaal ah inoo sheegeen wasiirka iyo qaar kamid ah agaasimayaasha wasaaradda ayaa kala taagna in muddo ah.
Cabashooyinka laga keenay wada-shaqeynta wasiirka ayaa sidoo kale badnaa, iyada oo dhanka madaxweynaha la sheegay inay gaareen cabashooyin ka dhan ahaa wasiir Cilmi.
2. Shaqo joojintii uu dhawaan ku sameeyay xisaabiyaha guud, isaga oo madaxda la tashan
Ninka hadda ku fadhiya booska xisaabiyaha guud ee qaranka wuxuu ka yimid dhanka madaxweynaha, tallaabada laga qaaday waxay toos u taabatay madaxweyne Xasan Sheekh. Iyada oo ay jiraan warar sheegaya in shaqada xisaabiyaha guud uu madaxweynaha illaa hadda ku qanacsan yahay.
In tallaabo sidaas u weyn oo wada-tashi la’aan ah wasiirka uu qaadi karo ayaa lumisay aaminaadii uu ka haystay madaxda sare ee dalka, ayay leeyihiin dadka ka faalloonaya xil ka qaadistii habeen hore lagu sameeyay wasiirkii Maaliyadda Dr. Cilmi Maxamuud Nuur.
3. Mushaarkii shaqaalaha dowladda oo soo daahay bishaan
Shaqaalaha kumeel-gaarka ah ee dowladda, qaar kamid ah kuwa rasmiga ah iyo xafiisyada qaar ayaa weli mushaarkii u dhicin.
Arrintan oo ay sababteeda farsamo xumo qeyb ka tahay ayaa kamid ah waxyaabaha madaxweynaha dhibsaday, sida lasoo warinayo.
Arrimahaan isbiirsaday ayaa sababay in habeen hore xilkii wasiirka Maaliyadda uu waayo Dr. Cilmi Maxamuud Nuur, oo kamid ahaa xisbiga madaxweynaha ee UPD.
