“Dilkii Saado, VILLA SOMALIA ayaa laga soo amray” waxaa sidaas shaaciyey…

By Asad Cabdullahi Mataan

Muqdisho (Caasimada Online) – Xildhibaan Saciid Deeriye oo ka tirsan Golaha Baarlamaanka Maamulka Puntland  oo la hadlaayay Idaacada Shabelle ee Magaalada Muqdisho, ayaa daboolka ka qaaday in Dilkii Xildhibaan Saado Cali Warsame laga soo maleegay Madaxtooyada Somalia.

Saciid Deeriye, waxa uu sheegay in Dowlada Federaalka Somalia ay horay u dishay  Xildhibaan Feysal Warsame Maxamed iyo Maxamed Maxamuud Xeyd, waxa uuna Tilmaamay in Xildhibaanada ku maqan Dowlada ay Seddex ku noqotay Saado Cali Warsame.

Xog ay heshay Caasimada Online ayaa sheegeysa in laba ka mid ah dadkii dilay Saado ay ahaayeen ilaalada ra’iisul wasaare Cabdi Weli. Xog ay bixiyeen raggaasi halkan ka aqri

Saciid Deeriye waxa uu intaa hadalkiisa ku daray in xukuumadda Cabdi Weli ay u gaarsaneyso kaliya Xildhibaanada kasoo jeeda Puntland, wuxuuna arrinkaasi ku tilmaamay mid Siyaasad ku saleysan oo amarkana laga bixiyay madaxtooyada.

Saciid Deeriye waxa uu tusaale usoo qaatay Dilka Allaha u naxariistee Xildhibaan Feysal oo lagu qarxiyay Afafka hore ee Xarunta Madaxtooyada, taasi waxa uu sheegay inay tahay mid cadeyneysa dilalka ay Dowlada Federaalka la kawsaneyso Xildhibaanada Puntland.

Dhanka kale, Saciid Deeriye waxa uu Fashiliyay inay jiraan dilal kale oo lala damacsan yahay Xildhibaanada Puntland ee hadda ku sugan Magaalada Muqdisho, wuxuun ugu baaqay Xildhibaanadooda inay kasoo baxaan Magaalada Muqdisho oo ay kusoo laabtaan Deegaanadooda.

Si kastaba, Waxaa cad in dilalka Muqdisho aysan qabiil ahayn, oo Soomaali oo idil magaalada lagu dilo.

Caasimada Online

Xafiiska Muqdisho

caasimada@live.com