Sawirro: Maxay looga hadlay kulankii maanta dhex-maray Qoor-Qoor iyo James Swan?

Caasimada OnlineBy Caasimada Online

Dhuusamareeb (Caasimada Online) – Madaxweynaha maamulka Galmudug, Axmed Cabdi Kaariye (Qoor-Qoor) ayaa madaxtooyada kulan kula qaatay Ergeyga gaarka ah ee xoghayaha QM u qaabilsan arrimaha Soomaaliya, Amb. James Swan, kadib markii uu maanta gaaray magaalada Dhuusamareeb.

James Swan iyo wafdi uu hogaaminayo oo ay kamid ahaayeen wakiilada EU, Midowga Africa Francisco Madeira iyo IGAD Jamaal Xaaji Axmed, ayaa gaaray xarunta maamulka Galmudug, halkaasi oo si weyn loogu soo dhaweeyay.

Kulanka Qoor-Qoor iyo Swan ayaa looga hadlay arrimo dhowr ah, iyada oo si gaar ah diirada loogu saaray doorashooyinka, xoojinta amniga iyo iskaashiga dowladda federaalka & dowladaha xubnaha ka ah.

Waxay labada dhinac isla qaateen dar-dar gelinta arrimaha doorashooyinka oo dhawaan magaalada Muqdisho looga gaaray heshiis loo dhan yahay, kaasi oo meesha ka saaray muddo kororsi laga cabsi qabay.

James Swan ayaa inta uu ku sugan yahay magaalada Dhuusamareeb ee xarunta Galmudug ayaa la filayaa inuu hirgelin doona xarun ay leedahay QM oo laga hago howlaha horumarineed ee deegaanadaasi.

Inta ay joogaan wafdigan uu hogaaminayo Swan waxay kulamo kala duwan la qaadan doonaan madaxda sarre ee maamulka Galmudug, iyaga oo kala hadli doona arrimaha doorashooyinka iyo amniga.