Muqdisho (Caasimada Online) – Wasiirka Wasaaradda Deegaanka iyo Isbedelka Cimilada ee XFS Khadiija Maxamed Al-Makhzoumi ayaa ka mid noqotay musharixiin loo xushay ka qeybgalka tartanka billadda ee “Africa Sustainability Outliers Award, ee loosoo gaabiyo (ASO Awards 2023).”
Tartankan oo dhawaan ka dhici-doona magaalada Addis Ababa ee dalka Ethiopia ayaa waxaa Wasiir Khadiija Al-Makhzoumi kula tartami 3-rag Afrikaan ah.
Wasiir Khadiija ayaa loogu xushay u tartamidda Billaddan shaqooyinka baaxadda leh ee ay ka qabatay Wasaaradda Deegaanka iyo Isbedelka Cimilada oo ay ka midyihiin:-
U heelanaanta gaarka ah iyo ka go’naanshaha in la abuuro mustaqbalka Waara ee Afrika.
Hirgelinta hindiseyaal badan oo dhiirigelinaaya horumarinta adkeysiga deegaanka iyo horumarinta bulshada.
Sidoo kale Wasiir Khadiija ayaa tartankan loogu xushay Ka-qaybgalkeeda sare iyo doorka hoggaamineed ee ay Soomaaliya ka qaadatay shirkii cimilada ee lagu qabtay magaalada Sharm El Sheikh ee dalka Masar sanadkii tegay ee 2022.
Daah-furka Hindisaha Darbiga Weyn ee Cagaaran, kaas oo qeyb ka ah Hindisaha dowladda Soomaaliya ee “Soomaali Cagaaran.”
Wasiirka ayaa door weyn ka qaadatay abaabulka iyo hir-gelinta howlaha wadatashiga ee daneeyayaasha iyo dedejinta hirgelinta howlahaas, si Afrika loo gaarsiiyo horumar waara.
Dajinta hindisaha iyo aragtida weyn ee lagu beeraayo malaayiin geed, si kor loogu qaado xalalka tamarta la cusboonaysiin karo, awood siinta haweenka iyo dhalinyarada, abuuritaanka jawi nabadeed oo suurtagelinaaya horumarka iyo in dadku ay la qabsadaan isbedelka.
Maaddaama ay si dhab ah dalkeeda iyo dadkeeda ugusoo meteshay dalal badan oo ay aheyd Danjire, waxay u ololeysay wacyi-gelinta guud ee arrimaha deegaanka, si dadku ay si firfircoon ula falgalaan arrimaha deegaankooda, dalkooda, gobolkooda iyo caalamka oo dhan, si xal loogu helo arrimaha taagan ee saameynaaya horumarka waara.
Dadaalkeeda ayaa saameyn weyn ku yeeshay bulshooyinka, horumarinta kobaca dhaqaalaha, ilaalinta khayraadka dabiiciga ah, iyo horumarinta hab-nololeedyo, sidaas darteed u qaabaynaya mustaqbal waara ee Afrika.
Hoggaaminta aragtida iyo habka hal-abuurka leh ee joogteynta ayaa ka dhigaya in ay noqoto musharrax u qalma Abaalmarinta Sustainability Outliers Award.
Abaal-marintaas ayaa haddii Wasiir Khadiija ay ku guuleysato ka dhigan guul weyn oo usoo hoyatay Shacabka, dowladda iyo guud ahaan dadka Soomaaliyeed, waxayna Khadiija horay ugu soo guuleysatay abaal-marinno kala duwan.
