Xasan Sheekh, Cabdi Weli iyo Jawaari oo xalay madaxtooyada kula shiray…

By Asad Cabdullahi Mataan

Muqdisho(Caasimada Online) – Madaxda ugu sareysa dalka Soomaaliya ayaa xalay lakulmay masuuliyiin kala mataleysay maamuladii lixda iyo seddexda gobol ee koofur galbeed Soomaaliya.

Kulankaasi ayaa waxaa sidoo kale ka qeyb galay odayasha dhaqanka, siyaasiyiinta iyo haweenka kasoo jeeda deegaanada koofur galbeed Soomaliya.

Kulankaasi ayaa waxaa ka qeyb galay madaxweynaha dalka, gudoomiyaha baarlamaanka, ra’iisul wasaaraha Soomaliya, gudoomiyaha gobolka Banaadir, xubno matalayay labada gole iyo masuuliyiin ka soconaya labada dhinac ee koofur galbeed.

Madaxweynaha dalka ayaa ka horjeediyay masuuliyiintii lakulmiyay in tani ay qeyb ka tahay dhismaha dowladnimada wuxuuna ugu baaqay dhinacyada kala duwan inay ku kalsoonaadaan madaxda ku jira gudiga farsamada ee soo dhisaya maamul loo dhan yahay.

Wuxuu sheegay Xasan Sheikh in dowladiisa ay taageersan tahay gudiga farsamada oo ay la shaqeynayaan, laakiin wuxuu kula dardaarmay inay soo dhisaan maamul ay taageersan yihiin shacabka kasoo jeeda koofur galbeed Soomaaliya.

Arinta sameynta gudiga xalay lagu dhawaaqay ayaa qeyb ka ah hishiiskii lagu gaaray in lagu aqoonsado maamulka koofur galbeed Soomaaliya ee seddexda gobol.

Caasimada Online

Xafiiska Muqdisho

Caasimada@live.com