Hargeysa (Caasimada Online) – In la abuuro xaalad cabsi ku ah dadka ama dowladnimada, iyada oo ujeedka uu yahay xukun dheereysi waxay noqotay fal-safad caan ah oo madax badan adeegsadaan.
Somaliland labadii sano ee u dambeysay waxaa ka jiray xasarado. Bishii November ee sanadkii hore waxaa dhamaaday muddo xileedka Muuse Biixi Cabdi.
Tan iyo xilligaas waxaa dhacay xasarado dhowr weji leh, dadka qaar ayaa tuhunsan in nidaamka Biixi uu xasaradaha qaar u abuuray si ku tala-gal ah, si dadka looga jeediyo muddo kororsiga.
Dhawaan koox jabhad ah ayaa qabsatay deegaanka la yiraahdo Gacan-Libaax, waana xiisad kale oo billow ah oo ku biireysa xaaladaha cakiran ee Somaliland.
Dadka reer Somaliland hadda kama hadlaan doorasho, waxay si maalinle ah uga fal-celinayaan mushkiladaha gudaha laga abuuray. Sababaha xoojinaya tuhunka ah in mushkiladaha qaar uu maamulka Muuse Biixi Injineer ka yahay waa sida loo wajahayo xalintooda.
Maamulka waqti ma uusan gelin daminta colaadahan. Xilliyadaan oo kale shacabka waxay u qeybsamaan kuwo si xagjirnimo ah ula safta hoggaanka maamulka, kuwo si lamid ah u diidan iyo kuwo ka walaacsan halka ay wax ku dambeyn doonaan.
Su’aasha ay dad badan qabaan waxay tahay ma u miro-dhashaa madaxda mushkiladaha u abuura si ay uga faa’iidaan cimri dheereysi xukun. Waa macquul inay ku helaan dhowr sano oo muddo kororsi ah, laakiin xasaradaha ay abuuraan madaxdaan ayaa marka dambe sabab u noqda in xukunka laga qaato.
Aan tusaale usoo qaadano middii u dambeysay ee Muqdisho. 2021-kii maamulkii madaxweyne Farmaajo ayaa abuuray mushkilado waaweyn oo qaar ay gacan ka hadal sababeen, qaarna ay u dhowaadeen inay dalka dagaal sokeeye galiyaan.
Marwalba oo dhibaatooyinka bataan dadka waxgalka ah waxaa ku bata walaaca ah mustaqbalka dalka iyo dowladnimada, kadibna waxaa abuurmata baahi loo qabo hoggaamiye nabaddoon ah oo aan gacan ka hadal aqoonin, kaasi oo xalin kara mushkiladaha uu abuuray hoggaanka xafiiska jooga.
Farmaajo mushkiladihii uu alifay waxay u dhaleen hal sano iyo saddex billood oo muddo kororsi ah. Laakiin waxa uu dhinaca kale abuuray rabitaan ah in loo baahan yahay hoggaamiye nabaddoon ah oo dalka ka badbaadin kara gacan ka hadal, taasi oo dhaafisay kursigii madaxtinimada keentayna Xasan Sheekh Maxamuud oo markaas loo arkaayey qofka ugu nabaddoonsan tartamayaasha.
Hadda iyo Muuse Biixi, sida muuqata muddo kororsigiisi waa shaqeynayaa, laakiin durba reer Somaliland waxay ka doodayaan sida loo heli karo hoggaamiye nabaddoon ah oo isku soo celin kara maamulka, ka badbaadin kara dagaal sokeeye, oo xalin kara mushkiladaha uu abuuray nidaamka hadda jira.
Su’aasha ah Muuse Biixi mushkiladahaan shan sano oo cusub ma u dhali karaan waxay dad badan uga jawaabayaan maya, laakiin maxay kula tahay adiga?
