Kismaayo (Caasimada Online) – Caasimada Online, ayaa ogaatay inay suurtagal tahay inuu dib u dhaco kulanka la filayo in dhinacyada Soomaalida (Madasha Qaran) ay isugu yimaadaan magaalada Kismaayo 10-ka bishan January.
Sababta dib u dhacaan keeneysa ayaa la rumeysan yahay iney tahay, madaxweynaha maamulka Konnfur Galbeed inuu qaadaco imaanshaha magaalada Kismayo sababo la xiriira maamulka dhowaan laga dhawaaqey gobolka Bakool, oo Jubaland iyo Puntland ay gadaal ka riixayaan.
Maamulkaan oo loogu magacdarey Bakool Sare ayaa waxaa aqoonsadey maamulada Jubaland iyo dowlada Puntland taasoo salka ka haysa nidaamka qabaliga ah ee ka jira dalka Somalia.
Dhinaca kale, qodobka kale ee dib u dhacaan keeni kara, ayaa ah in ergeyga qaramada midoobey u qaabislan arrimaha Somalia ee cusub qorsheynayo in shirka Kismayo ka hor uu safaro ku baxsho qaybaha kala duwan Somalia.
Warar aan la xaqiijin ayaa sheegaya in Ra’isla wasaaraha Somalia ku wehelin doona safarkaan ergeyga cusub ee qaramada midoobey kuwaasoo ururin doona fikirka dhinacyada Soomaalida ay ka qabaan qaabka lagu soo xulo doono Baarlamanka 2016.
Kulanka magaalada Muqdishu lagu qabtey sanadkii lasoo dhaafey dabayaaqadiisa ayaa madaxda maamulada Somalia iyo dowlada Federaalka ku gaarin go’aan rasmiya ee la xiriira qaabka lagu soo xulayo Barlamanka Federaalka 2016.
Caasimada Online
Xafiiska Kismaayo
Caasimada@live.com
