Yuusuf Indha-Cade oo VILLA SOMALIA isu diyaarinaya kadib markii ay DFS…

By Asad Cabdullahi Mataan

Muqdisho (Caasimada Online) – Maalin kadib markii xil ka qaadis lagu sameeyay Taliyihii ciidamada Madaxtooyada Soomaaliya Col. Axmed Maxamed Af-caddeey ayaa waxaa soo baxaya warar sheegaya in Jen. Yuusuf Maxamed Siyaad “Indha Cadde” uu u xusul duubayo sidii uu u hoggaamin lahaa ururka Madaxtooyada Somalia oo la filayo in hadda la gaarsiiyo ilaa Hal Guuto.

Taliyaha Xoogga dalka Somalia Jen. Dahir Indha Qarshe ayaa xil ka qaadis ku sameeyay Taliyihii Madaxtooyada, waxaana si KMG ah loogu magacaabay Kuxigeenkiisa oo lagu magacaabo Gaashaanle Duraan. Waxaa sidoo kale xil ka qaadis lagu sameeyay Madaxii Keydka hubka Madaxtooyada Col. Garabeey, waxaana lagu badalay sarkaal la yiraahdo Col. Cosobow.

Waxaa jira qorshe ku aadan sidii Taliyaha Madaxtooyada loogu magacaabi lahaa Sarkaal heysta darajada Jeneraalnimo, isla markaana ciidamada Madaxtooyada loo gaarsiin lahaa Hal Guuto, taasoo ku kaliftay Taliyaha Xoogga dalka inuu bilaabo wadatashiyo ku aadan Jeneraalkii loo magacaabi lahaa Madaxtooyada.

Yuusuf Indha Cadde ayaa ka mid ah dadka u ololeynayo in xilkaasi loo magacaabo, waxaa kaloo jira Saraakiil kale oo haysta darajada Jeneraalnimo oo loolaankaasi ku jiro.

Indha-Cadde, ayaa rajo-weyn ka qaba xilkan, waxaana la sheegayaa in sidoo kale dowladda ay ka fakareyso dhankeeda arrintan, lagana yaabo inay aqbasho dalabka Indha-Cadde.

Isbadaladan lagu sameeyay Hoggaanka taliska madaxtooyada ayaa ka danbeysay weerarkii Madaxtooyada lagu qaaday Hebeenimadii Tallaadada, lana xoojiyo ciidamada ilaalada aqalka Madaxweynaha.

Caasimada Online
Xafiiska Muqdisho
Caasimada@live.com