San Diego (Caasimada Online) – Haweeney Soomaali ah, oo walaalkeed uu yahay hoggaamiye sare oo ka tirsan kooxda Daacish-Soomaaliya, ayaa dalka Maraykanka loogu xukumay dambi la xiriira been abuur dhanka magangalyo-doonka ah, kadib markii baaritaan la-dagaallan argagixiso uu daaha ka rogay xiriirka qoysnimo ee ay la leedahay, sida ay ku dhawaaqday Wasaaradda Cadaaladda.
Sowda Axmed Maxamuud, oo 27 jir ah, ayaa lagu xukumay maxkamad federaal ah oo ku taalla magaalada San Diego kadib markii ay qiratay inay bixisay warbixinno been abuur ah oo ku saabsan dokumentiyada socdaalka iyo marag furkeeda. Waxaa laga tarxiili doonaa Mareykanka.
Kiiskeeda waxaa daaha ka rogay Guddiga Wadajirka ah ee La-dagaallanka Argagixisada (JTTF) ee ay hoggaamiso hay’adda FBI-da, kadib markii ay si sharci-darro ah uga soo gudubtay xuduudda Maraykanka iyo Mexico bishii Maarso 2024, waxaana keydka xogta ee dowladda uu muujiyay inay u dhigmi karto qof looga shakisan yahay falal la xiriira argagixisanimo.
Sida ay sheegeen dacwad-oogayaasha, isku daygii Sowda ee ahaa inay marin-habaabiso mas’uuliyiinta socdaalka iyadoo qarinaysa qaraabadeeda ku nool Maraykanka ayaa si aan ku talagal ahayn ugu horseeday baarayaasha walaalkeed, Maxamed Axmed Qaahiye, oo ah shakhsi muhiim u ah Daacish-Soomaaliya, kana mas’uul ah lacag uruurinta iyo hub u soo iibinta kooxda argagixisada ah.
Kashifaadda xiriirka argagixisanimo
Baaritaanka lagu hayay Sowda ayaa billowday kadib markii ay xireen ciidamada Ilaalada Xuduudaha Maraykanka meel u dhow San Diego. Codsigeeda magangalyada iyo marag furkeedii dhaarta ahaa, waxay si been abuur ah ku sheegtay inaysan waligeed sharci ka dalban waddan kale, waxayna si ula kac ah u qarisay walaasheed oo ku nool dalka Maraykanka.
Aqoonsiga walaashan ayaa u sahashay sirdoonka inay ogaadaan xiriirka ay la leedahay Qaahiye, kaasoo Wasaaradda Maaliyadda Maraykanka ay ku dartay Liiska Dadka Gaarka ah ee La Bartilmaameedsaday (SDN) iyo kuwa la xayiray bishii Nofeembar 2022, sababo la xiriira doorkii uu ku lahaa taageeridda Daacish-Soomaaliya.
Daacish-Soomaaliya waa garab yar laakiin joogto ah oo ka go’ay kooxda weyn ee fallaagada Al-Shabaab, wuxuuna saldhigiisu yahay inta badan deegaannada buuraleyda ah ee maamul-goboleedka Puntland ee Soomaaliya. Waxaa hoggaamiya Sheekh Cabdulqaadir Muumin, oo ah hoggaamiye fikir xagjir ah oo bayco la galay Dawladda Islaamka sannadkii 2015.
Sida laga soo xigtay Xafiiska Kontoroolka Hantida Shisheeye (OFAC) ee Wasaaradda Maaliyadda Maraykanka, Qaahiye iyo Muumin waxay horraantii 2020 la kulmeen shakhsiyaad u dhashay Iiraan oo siiyay hoggaanka kooxda lacag ka badan $10,000. Sidoo kale, labada hoggaamiye waxay raadinayeen inay ka helaan Yemen shixnad hub ah oo weyn oo ay ku jiraan gantaalaha garbaha laga tuuro (RPG) iyo qoryaha darandooriga u dhaca ee naqshaddoodu tahay Ruushka.
Ka soo gudbidda xadka illaa tarxiilka
Kadib baaritaan socday muddo sannad ah, caddaymihii ay soo ururiyeen Guddiga JTTF ayaa loo adeegsaday in lagu laalo codsigii magangalyo ee Sowda si aan dib looga noqon karin, taasoo ka dhigan in si joogto ah looga mamnuucay inay magangalyadaas ka raadsato Maraykanka.
Heshiiskeeda qirashada dambiga, waxay ku qiratay inay been ka sheegtay isku daygeedii hore ee ay ku doonaysay inay sharci kaga hesho dalalka Boqortooyada Midowday (UK), Brazil, iyo Maraykanka. Sowda, oo ku xirnayd xarun socdaal muddo 15 bilood ah, waxaa lagu xukumay 48 maalmood oo ay horey u xirnayd, waxaana laga saari doonaa dalka.
“Dacwadda lagu soo oogay Sowda ee ku saabsan been abuurka magangalyada waxay sidoo kale muujinaysaa sida ay noga go’an tahay inaan hubinno in shakhsiyaadka khatarta ku keeni kara amnigeenna qaranka, sababo la xiriira xiriirka qoysnimo ee ay la leeyihiin ururada argagixisada ee shisheeye, si degdeg ah looga saaro Maraykanka,” ayuu yiri Xeer-ilaaliyaha Maraykanka Adam Gordon oo hadal soo saaray.
Sarkaalka Gaarka ah ee Mas’uulka ka ah Xafiiska FBI-da ee San Diego, Mark Dargis, ayaa intaa ku daray in kiiskani “uu muujinayo sida ay FBI-da uga go’an tahay ciribtirka qof kasta oo xiriir la yeelan kara ururada argagixisada shisheeye ee la yaqaan ee damacsan inay waxyeelleeyaan Maraykanka.”
Kiiskani wuxuu iftiiminayaa baaritaanka adag ee lagu sameeyo magangalyo-doonka xuduudda Maraykanka iyo sida loo adeegsado guddi-hawleedyada ka kooban hay’ado kala duwan si loo baaro khataraha amni ee imaan kara ee ku dhex qarsoon codsiyada socdaalka ee ku dhisan been abuurka.