‘’Axmed Madoobe waxa uu howshiisa ka dhigtay nin jecleysi & qabiilkiisa’’…

By Asad Cabdullahi Mataan

Muqdisho (Caasimada Online) – Garaad Saalax Axmed oo ku sugan Magaalada Muqdisho ayaa sheegay inuu kasoo cararay Magaalada Kismaayo sababo la xiriira Amni la’aan iyo qaad qaadka Qabyaalada.

Waxa uu sheegay in isaga iyo Siyaasiyiin kale ay kasoo carareen Magaalada Kismaayo kadib markii shaqada Axmed Madoobe ay kusoo biyo shubatay qancinta Reerkiisa, sida uu hadalka u dhigay.

Isaga oo arrintaasi ka hadlaayay ayaa waxa uu yiri ‘’Aniga iyo dhowr waxgarad oo wax kasoo dhisay Maamulka KMG Jubba ayaa waxan Axmed Madoobe ku khilaafnay qaabka uu wax u wado, waayo waxa uu howsha oo idil ka dhigay jufo-jufo iyo nin garabeysi, ilaa hadda waxa uu garan waayay inuu Odayaasha soo doortay la kulmo’’

Garaad Saalax Axmed waxa uu sheegay in waxbadan uu ka bartay Axmed Madoobe, balse ay wakhti siin-doonaan si uu u garwaaqsado qaladaadkiisa, waxa uuna uga digay inuu kusii fogaado nin jecleysiga, sida uu Garaad Saalax Axmed hadalka u dhigay.

Sidoo kale, Nadiifo C/llahi waxa ay kamid tahay Waxgaradkii soo xulay Axmed Madoobe waxa ay iyana ku eedeysay Axmed Madoobe inuu yahay ruux aan kala garaneynin wanaaga iyo xumaanta, iyadoona ay tusaale usoo qaadatay qaab dhaqameedkiisa xiliyada uu qaabilaayo madaxda Maamulka ama Odayaashii soo doortay.

Waxa ay tilmaantay in Axmed Madoobe uu dayacay  kalsoonidii Odayaasha iyo hablaha ka shaqeynaayay soo bixitaankiisa, waxa ayna sheegtay in Sokeeye iyo xigaalba uu ka dhigtay reerkiisa.

Iyada oo arrintaasi ka hadleysay ayaa waxa ay tiri ‘’Wey adagtahay in lala shaqeeyo ruux ay ku ween tahay jufadiisa, waayo waxa uu wakhti u la yahay Siyaasiyiinta iyo waxgaradkii isaga soo doortay, haddii Axmed Madoobe uu kasoo laaban waayo arrinkaasi ma filaayo in Jubba ay ka bixi doonto dhibaato iyo reer reer ku duulay.

Haddalka Nadiifo iyo Garaad Saalax Axmed, ayaa waxa uu kusoo beegmayaa iyadoo ay Odayaashii ku jiray shirka Kismaayo badi ay u kala carareen, shirka ka furmaayo Gobolka Gedo, kaasi oo looga soo horjeedo Maamulka Axmed Madoobe.

Caasimada Online

Xafiiska Muqdisho

Caasimada@live.com