Muqdisho (Caasimada Online) – Dowlada Britain ayaa shaaca ka qaaday inay ka shaqeyneyso midnimada Somalia, kadib markii uu magaalada Muqdisho soo gaaray Xoghayaha Arrimaha Dibadda Dowladda Britain.
Xoghayaha Arrimaha Dibadda Dowladda Britain, ayaa mudadii uu ku sugnaa Magaalada Muqdisho kulan gaara la qaatay Xildhibaano ka tirsan BFS.
Xildhibaan Zakariye Maxamuud Xaaji Cabdi oo kamid ah Xildhibaanada la kulmay Xoghayaha ayaa sheegay inuu ballanqaaday wax ka qabashada kala irdhoobida Soomaalida.
Xildhibaan Zakariye waxa uu tilmaamay in Xoghayaha uu ballanqaaday inay ka shaqeynayaan midnimada Somalia, iyadoo loo maraaya dhinacyo kala duwan.
Xoghaye Boris, waxa uu tilmaamay in Britain ay ka go’an tahay mideynta Soomaalida waxa uuna carab dhabay in Somalia ay u aqoonsan yihiin hal dal oo hal mad-hab leh.
Xildhibaan Zakariye waxa uu sheegay in Xoghaye Boris uu ballanqaaday xitaa inay ka qeybqaadan doonaan wadahadalada lagu mideynaayo DFS iyo Maamulada shisheeye taageerka ah.
Xildhibaan Zakariye Maxamuud Xaaji Cabdi ayaa sheegay Dowladda Ingiriiska in ay ka shaqeyneyso in Soomaaliya ay ku soo noqoto sideedii hore, sidoo kalena ay midoobaan shacabka Soomaaliyeed.
Docda kale, Xoghaye Boris ayaa shalay safar lama filaan ah ku yimid Magaalada Muqdisho, wuxuuna kulan la qaatay Madaxweynaha Soomaaliya Maxamed C/laahi Maxamed (Farmaajo) iyo qaar ka tirsan Madaxda Maamul Goboleedyada.
Caasimada Online
Xafiiska Muqdisho
Caasimada@live.com
