Baydhabo (Caasimada Online) – Wararka ka imaanaya Magaalada Xudur ee xarunta gobolka Bakool ayaa sheegaya in halkaa lagu rasaaseeyay diyaarad Qaad siday.
Diyaarada la rasaaseeyay ayaa la sheegay inay ka dagtay Garoonka magaalada Xudur, waxa ayna rasaasta ku bilaabatay kadib markii ay isku dayday inay duusho.
Ciidamada Ethiopia ee ka howlgala Garoonka ayaa la sheegay inay is hortaagen diyaarada xili ay dooneysay inay duusho iyadoo aan dajin rarka Qaadka.
Diyaarada ayaa waxaa rasaaseeyay ciidamada Ethiopia ee ka howlgala Garoonka, waxaana sababta rasaaseynta lagu sheegay in duuliyaha uu dhagaha ka fureystay amarka ciidamada ee ahaa inaanu duulin karin diyaarada.
Sidoo kale, rasaasta ay ciidamada ku fureen diyaarada ayaa ku dhacday cagaha, waxaana ay diyaaradu ku dhacday xaafad ku dhaw garoonka.
Geesta kale, duuliyaha diyaaradda iyo rarka saarnaaba ay hadda gacanta ku hayaan ciidanka Ethiopianka ah ee ku sugan magaalada Xudur.
Caasimada Online
Xafiiska Baydhabo
Caasimada@live.com
