Hargeysa (Caasimada Online) – Fal-celin xooggan ayaa ka dhalatay hadal uu shalay ku taageeray Xildhibaanka Maxamed Abiib damaca Itoobiya ee dekedda Saylac.
Maxamed Abiib oo kamid ah xubnaha golaha wakiilada maamulka Somaliland ayaa shaaca ka qaaday inuu soo dhaweynayo in dekeddaasi lasiiyo Itoobiya, si ay u maalgashato, kadibna faa’iido uga hesho Somaliland.
Hadalkaan ayaa dadka qaarkood si weyn ugu dhaliileen Xildhibaanka, oo isagu ku dooday in Itoobiya ay sifo sharci ah ku rabto dekedda Saylac, taasi oo sidoo kalena ay qabaan qaar kamid ah dadka ka fal-celiyay hadalkiisa.
“Waxan aaminsanahay in ay sifo sharci ah ku doonayaan, meeshan aynu ku noolnahay waad ogtihiin dhibaatada duruufta dadkeena haysata, dekeda Berbera maahee 20 dekedood oo kale in la sameeyaana dadka reer Somaliland ayay dan u tahay,” ayuu yiri Xildhibaan Maxamed Abiib.
Haddaba sidee looga fal-celiyay hadalka Xildhibaanka?
Cabdirasaaq Kayse: “Kan bari horaan ka hadhay waayo waxaanu garan karin hadalka ah ‘waa inaan deked helnaa xoog iyo xeelad midkood’. Maalgashiga maad yeelan ee waa lagu maal-siiyay.”
Cabdijibaar Maxamed Aadam ayuu yiri “War Ina Abiib inuu intaas ka aragti fog yahay ayaanba u haystee saw kaas isku jaray ee baahi gudabiirsigu qabo uun ka hadlay Ethiopia miyaa uu leeyahay waa soo dhaweynaa, war Ethiopia irsaaqad ka heli-mayside danta maanta waxa ka weyn tan mustaqbalka.”
“Inay maal-gashato waa sax hadaan laynaga qaadayn,” ayuu yiri Cabdirisaaq Ismaaciil.
Cabdikariin Suleyman Cali ayuu sidoo kale yiri “Xildhibaankaan horay waan u taageeri jiray balse aad iyo aad baan ugaga soo hor jeedaa qodobkani.”
“Maxamed nin xun maaha laakiin aqoontiisa ma hadlo deg deg iyo ku soco weeyi,” ayuu yiri Mahdi Maxamed.
Maxamed Axmed Ibraahim: “Qaadasha iyo kiraynta way kala tahay. Ethiopia waxay rabta inay si toos uqaadato, arrinka yaan la ogolaanin.”
“Waan soo dhawaynaa sida Berbera in laga dhigo Saylac,” ayuu yiri Mawliid Siciid.
Saciid-Hanad Ciise: “Ninkani tolkii buu la rabaa in deked hesho oo ay ka maarmaan tan Berbera ee kama ahan wadan jacayl iyo dhibka iman kara Ethiopia.”
Suhayb Dugsiiye ayaa sidoo kale waxa uu yiri: “Waan kugu raacsanahay Xildhibaan.”
“Ethoipia hadhow yaa kaa dul kicin dhul horaa ku maqane,” ayuu yiri Axmed Cabdi.
Maxamud Cabdi Yuusuf: “Aragtida Xildhibaanka waan soo dhawayanayaa 100%.”
