Guddiga doorashooyinka Galmudug oo Dhuusamareeb gaaray xilli uu khilaaf jiro

Dhuusamareeb (Caasimadda Online) – Guddiga farsamada iyo dhismaha Galmudug ay dhawaan u magacawday Wasaaradda Arrimaha Gudaha Soomaaliya ayaa maanta waxa ay gaareen magaalada Dhuusamareeb ee caasimada Galmudug .

Guddigan oo ka kooban 13 xubnood ayaa diyaarad qaas ah looga qaaday Muqdisho, iyadoo xilligii ay ka dagayeen garoonka diyaaradaha Dhuusamareeb ammaanka si aad ah loo adkeeyay.

Soodhaweynta ka dib, ayaa waxaa loo sii gudbiyay  xarunta ay ka socoto hawlaha doorashada  iyo qaban qaabadeeda ee lagu magacaabo Shiirkole .

Wararka ayaa sheegaya in xubnaha Guddigan ay kulamo la yeelan doonaan qeybaha kala duwan ee bulshada iyo odayaasha dhaqanka, waxaana wixii hadda ka dambeeya ay guda geli doonaan howsha la xiriira soo xulida liiska Xildhibaanada Baarlamaanka Galmudug.

Guddiga farsamada iyo dhismaha Galmudug ee ay magacawday wasaaradda arrimaha gudaha Soomaaliya ayaan la ogayn qaab ay u shaqayn doonaan ,maadaama uu muran iyo diidmo ka dhashay magacaabistooda taas oo ka timid dhinaca hoggaanka Ahlu-Sunna iyo musharaxiinta qaar .

Shalay ayay aheyd markii Madaxa Xukuumadda Galmudug Sheekh Maxamed Shaakir uu magacaabay Guddiga doorashooyinka iyo xalinta khilaafaadka Galmudug, waxaana tallaabadan loo arkay mid dhalisay khilaaf hor leh oo ka taagan dhismaha Galmudug loo dhan yahay.

Caasimada Online
Xafiiska Muqdisho
Caasimada@live.com