Hargeysa (Caasimada Online) – Labo caruura oo walaalo ah ayaa maanta ku geeriyooday magaalada Hargeysa, kadib markii uu dab naxdin leh qabsaday Gurigoodii oo ku yaalay xaafada Jameecada ee magaalada Hargeysa.
Caruurtan ayaa u geeriyooday dhaawacyo culus oo ka soo gaaray dabkaasi ka kacay gurigooda, xili ay Ciidamada Dab-demiska Somaliland ay ku howlanaayeen daminta dabkaasi.
Sida ay Caasimada Online u xaqiijiyeen dad goobjoog ahaa Labadan caruurta ah ee walaalada ah ayaa dhaawacyo culus u geeriyoodeen xili lagu howlanaa bad-baadintooda.
Ciidamada Dab-demiska ayaa ugu dambeyntii ku guuleystay inay damiyaan dabkaasi qabsaday guriga ay ku jireen Labadaasi caruurta ah, kaasi oo ka sameysnaa Jiingad.
Dadka deegaanka oo la hadlay Caasimada Online, ayaa u sheegay inay aad ugu xun yihiin masiibadan ay ku geeriyoodeen labadaasi caruur, iyagoona xusay inay aad uga walaacsan yihiin xaalada la soo daristay qoyska dhalay caruurtaasi.
Ciidamada Dab-demiska oo isku deynay inaan wax ka weydiino dabkaasi galaaftay nolosha labada caruurta ah, ayaa gebi ahaanba ka gaabsaday.