Muqdisho (Caasimada Online) – Taliyaha hay’adda Nabad-sugidda iyo Sirodoonka waddanka Kenya Nuuradiin Yuusuf Xaaji ayaa Jimcihii booqasho ku tegay magaalada Muqdisho ee caasimada Soomaaliya, bil kadib un markii Baarlamaanka Kenya uu ansixiyay magacaabistiisa.
Magacaabista Nuuradiin ayaa xoojisay doorka Soomaalida ku leedahay xukunka madaxweyne William Ruto.
Taliye Nuuradiin ayaa kulan saacado qaatay waxa uu la yeeshay dhiggiisa Soomaaliya Mahad Maxamed Salaad. Sidoo kale madaxweynaha iyo ra’iisul wasaaraha ayaa la soo wariyay inuu arkay.
Kulanka Muqdisho ee labada taliye ayaa kusoo aaday waqti muhiim u ah Soomaaliya oo lagu guda jiro diyaar-garowgii u dambeeyay ee wejiga labaad ee dagaalka Al-Shabaab.
Taliyaha hay’adda Sirdoonka iyo Nabad-sugida Soomaaliya Mahad Maxamed Salaad oo maalmahan diirada saarayay hagaajinta xiriirka dibadda ee hay’adda NISA ayaa kulan gaar ah xarunta hay’adda kula qaatay dhiggiisa Kenya.
Haddaba, waxaa eegayna saddex arrimood oo horyaalla labada Sirodoon ee labada dal ee Kenya iyo Soomaaliya, kuwaasi oo kala ah;
1. Wejiga labaad ee dagaalka Al-Shabaab
Kenya waxay kamid tahay dalalka safka hore ee ku yaboohay inay ciidan uga qeyb qaadanayaan wejiga labaad ee dagaalka Al-Shabaab. Horey ciidanka Kenya waxay uga mid ahaayeen howl-galka ATMIS, laakiin ciidanka ka qeyb qaadanaya wejiga labaad ee dagaalka waa kuwa ka baxsan ATMIS sharci ahaan iyo shaqo ahaanba.
Boqolaal dagaal-yahaano ah oo Kenya u dhashay ayaa ku jira kooxda Al-Shabaab, waxaana jira walaac ku saabsan inay u firxadaan dhanka Kenya.
Ajnabiga kale ee u dagaalama kooxda ayaa sidoo kale beegsan kara dhanka dalalka deriska ah. Wada-shaqeyn gaar ah iyo habka loo wajahi karo arrintaas ayaa hortaalla labada Sirdoon ee labada dal.
2. Dib u furida xuduudda
Dhawaan labada dowladood ee Kenya iyo Soomaaliya waxay ku heshiiyeen in dib loo furo xadka labada dal, kaas oo u xirnaa sababo amni. Weli ma dhaqan-galin arrintaas, sababaha ay u dhaqan-gelin waxaa kamid ahaa in aanay NISA iyo NIS ay isla meel dhigin qorshaha cusub.
Mahad Salaad iyo Nuuradiin Yuusuf Xaaji ayaa waxaa looga fadhiya doorkooda si loo dhaqan-geliyo dib u furida xadka.
3. Sahalka socdaalka
Marka laga hadlayo Kenya, hay’adda Sirodoonka iyo Nabad-sugida iyada ayaa gacanta ku haysa faylka Soomaaliya, gaar ahaan dhanka socdaalka.
Madaxweyne Xasan Sheekh Maxamuud iyo dhiggiisa Kenya William Ruto waxay hore ugu heshiiyeen in la fududeeyo socdaalka. Dhanka Kenya weli wax badan iskama beddelin.
Maadaama Nuuradiin oo Soomaali ah uu madax ka noqday hay’adda Sirdoonka Kenya, waxaa muuqata fursad lagu soo afjari karo caqabadaha socdaalka, waana qodob kale oo muhiim ah oo labada taliye looga fadhiyo inay jiheeyaan.
