Muqdisho (Caasimadda Online) – Wararka naga soo gaarayo Magaalada Muqdisho ee Caasimadda Soomaaliya ayaa sheegayo inuu halkaas soo gaaray Ra’isulwasaaraha Soomaaliya Xasan Cali Kheyre.
Ra’iisul Wasaare Kheyre ayaa galabta dib ugu soo laabtay magaalada Muqdisho, kaddib todobaad uu magaalada Garowe u joogay shirkii Wadatashiga ahaa, kaasoo natiijo la’aan ku soo dhamaaday.
Ra’isulwasaaraha ayaa waxaa garoonka Diyaaradaha ee Aadan Cadde kusoo dhaweeyey Wasiiro ka tirsan Xukuumaddiisa iyo Xildhibaano ka tirsan Baarlamaanka.
Madaxeynaha Soomaaliya Maxmed Cabdullaahi Farmaajo ayaa ku haray Magaalada Garoowe ee Caasimadda Puntland waxaana sababta uu haray kasoo baxayo warar kala duwan.
Sida ay Caasimadda Online u xaqiijiyeen xubno ka tirsan Villa Soomaaliya, Madaxweyne Farmaajo ayaa Garoowe kusii sugnaano doon illaa laba cisho, waxaa la sheegayaa inuu ka qeyb geli doono kulamo uu qeybaha kala duwan bulshada la qaadan doono.
Waxaa horey Garoowe uga soo tagay Madaxweynaha Galmudug Axmed Ducaale Geelle Xaaf iyo Madaxweynaha Jubbaland Axmed Madoobe kuwaas oo dowladda dhexe ku eedeeyey inay sabab u aheyd fashilka shirkii Garoowe.
Caasimada Online
Xafiiska Muqdisho
caasimada@live.com
