Dhuusamareeb (Caasimada Online) – Khilaafkii siyaasadeed ee muddooyinkii dambe u dhaxeeyay madaxweynaha dowlad-goboleedka Galmudug Axmed Cabdi Kaariye (Qoor-Qoor) iyo ku xigeenkiisa Cali Daahir Ciid ayaa ugu dambeyntii la xaliyay.
Cali Ciid oo wareysi siiyay telefishanka Universal ayaa waxa uu shaaciyay in la dhameeyay khilaafkii kala dhaxeeyay madaxweyne Qoor-Qoor, islamarkaana wada-shaqeyntoodu ay kusoo laabatay sidii hore iyo si ka wanaagsan, sida uu hadalka u dhigay.
“Waa laga gudbay arrintaan yarta aheyd (khilaafkii) ee soo baxday. Galmudug saddex sano iyo bar ayau dhisan tahau waa khilaafkii koowaad ee banaanka usoo baxa, iyadana waa laga wada-hadlay waana laga gudbay,” ayuu yiri Cali Ciid.
Waxa uu intaas kusii daray “Waqti fiican oo waddanka wax ugu qaban karno oo ku xoreyn karno ayaa inoo dhiman oo sanad iyo wax la jiro ah, waxaana looga gudbayaa midnimo iyo wada-jir.”
Inkasta oo Cali Ciid uusan sheegin waxa lagu dhameeyay khilaafkii kala dhaxeeyay madaxweyne Qoor-Qoor ayaa haddana waxaa soo baxeysa in madaxweyne Xasan Sheekh oo bil ka badan ku sugan Dhuusamareeb uu labada dhinac cadaadis ku saaray “in waxa la isku hayo dhinac la iska dhigo” oo loo midoobo dagaalka Al-Shabaab.
Muxuu salka ku hayay khilaafka labada masuul?
Khilaafka labada nin oo mar gaaray meel sare ayaa waxa uu salka ku hayay awoodda maamulka Caabudwaaq, taasi oo uu kasoo jeedo madaxweyne ku-xigeenka Galmudug Cali Ciid.
Madaxweyne Qoor-Qoor iyo Cali Ciid ayaa isku qabtay awoodda maamul ee degmadaas, ayada oo Qoor-Qoor uu ka horyimid xil ka qaadis lagu sameeyay guddoomiyihii degmadaasi, taasi oo keentay in Cali Ciid uu tego Caabudwaaq uuna dhiso maamul cusub, isaga oo u adeegsanaya xubno ka tirsan golaha deegaanka degmada oo isaga taabacsanaa.
Sidoo kale intii ay taagneyd xiisadda ayaa waxa uu madaxweyne ku-xigeenka uu soo saaray qoraal uu shaqada kaga joojinayo wasiirka arrimaha gudaha oo uu markaas ku eedeeyay in uu xagal-daaciyay dagaalkii lagula jiray Al-Shabaab.
Daqiiqado kooban kadibna waxa soo baxay qoraal uu madaxweynaha Galmudug Axmed Cabdi Kaariye Qoor-Qoor uu ku beeninayo qaraarka madaxweyne ku-xigeenka.
Madaxweyne Qoor-Qoor ayaa sharci-darro ku tilmaamay shaqo-joojinta ku-xigeenkiisu ku sameeyay wasiirkiisa arrimaha gudaha, oo la sheegay inay aad iskugu dhow yihiin.
Sidoo kale Qoor-Qoor ayaa qoraalkaas ku diiday xil ka qaadis golaha deegaanka degmada Caabudwaaq ay todobaadkii hore ku sameeyeen guddoomiyihii degmadaas, taasi oo cirka kusii shareertay khilaafka labada nin.
Maxkamadda gobolka Galgaduud ayaa iyaduna markaas kadib kusoo biirtay xiisadda, ayada oo amartay in lasoo xiro afar kamid ah xubnaha golaha deegaanka ee Caabudwaaq, gaar ahaan kuwa taageersan madaxweyne ku-xigeenka maalin un kadib markii doorasho gole deegaan oo uu goobjoog ahaa Cali Ciid ku qabsaday magaaladaasi.
Xubnahaas ayaa waxaa ku jiray guddoomiyaha iyo ku xigeenka ay shalay iska dhex doorteen afartaasi xubnood, waxayna kala yihiin Cabdinaasir Maxamuud, Maxamed Xasan Nuur, Jaamac Cabdullaahi Cabdulle iyo Axmed Cabdisalaan Cabdi oo dhammaantood ka tirsan golaha deegaanka Caabudwaaq.
Isku soo wada duubo, in xilligaan hoos loo dhigo khilaafyada siyaasadeed iyo xifaaltanka awoodeed, loona midoobo dagaalka kooxda Al-Shabaab ayaa wax badan ka goysa hiigsiga Soomaaliya xor ah, oo ka caagan argagixisada.
