Muqdisho (Caasimada Online) – Ugu yaraan labo baabuur oo ah kuwa xamuulka ayaa xalay lagu gubay gobolka Shabeelaha Hoose, kadib markii ay wadada u galeen kooxo hubeysan.
Gawaarida la gubay ayaa waxaa lagu soo warramayaa in mid ka mid ah uu waday dhuxul, halka kan kale uu faaruuq ahaa, sida ay innoo sheegeen ilo dad deegaanka ah. oo ku sugan duleedka deegaanka Yaaq-bariweyne oo uu falkaasi ka dhacay.
Wararka ayaa sheegaya in sidoo kale jirdil xoogan loo geystay darawalladii la socday gawaarida dabka la qabadsiiyey.
Sidoo kale waxa ay wararku intaasi ku darayaan in ragga ka dambeeyey dhacdadaasi ay ka tirsan kooxda Al-Shabaab oo weeraro ka fulisa halkaasi.
Weli ma jiro wax hadal ah oo ka soo baxay maamulka gobolka iyo saraakiisha ciidamada dowladda oo ku aadan falkaasi.
Si kastaba ha’ahaatee ma’an markii ugu horreysay oo gaadiid dhuxul sida lagu gubo gobolka Shabeelaha Hoose oo ay si aad ugu xoogan yihiin dagaalyahanada Al-Shabaab.
