New York (Caasimada Online) – Duqa magaalada New York, Zohran Mamdani, ayaa sheegay in maamulkiisu uu baarayo awoodda sharci ee uu u leeyahay in la xiro ra’iisul wasaaraha Israel Benjamin Netanyahu, marka uu magaalada yimaado bisha September si uu uga qeyb-galo shirarka Golaha Guud ee Qaramada Midoobay.
Mamdani ayaa sheegay in wada-hadallo sharci oo arrintan ku saabsan ay hadda u socdaan maamulka magaalada iyo waaxda sharciga ee New York, inkasta oo aan weli la caddeyn in duqa magaalo uu amri karo booliska inay xiraan hoggaamiye shisheeye oo dalka u yimid arrimo diblomaasiyadeed.
“Waxaan aaminsanahay in ra’iisul wasaare Netanyahu uu ka tirsan yahay dadka ay tahay inay hor-tagaan maxkamadda Hague,” ayuu Mamdani ku yiri barnaamijka “The Interview” ee wargeyska The New York Times.
“Waa qof lagu eedeeyay dambiyo dagaal oo ay waaran xarig u jartay Maxkamadda Dambiyada Caalamiga ah,” ayuu yiri Mamdani, oo ka tirsan garabka dimoqraadiyiinta hantiwadaagga ah ee Mareykanka.
Mamdani ayaa intaas ku daray in aragtida uu qabo ay la qabaan dad badan oo ka careysan khasaaraha iyo burburka ka dhashay howlgallada milatari ee Israel ka waddo Marinka Gaza.
Maxkamadda Dambiyada Caalamiga ah ee ICC ayaa November 2024 waaran xarig u jartay Netanyahu iyo wasiirkiisii hore ee gaashaandhigga Yoav Gallant.
Garsoorayaasha maxkamadda ayaa sheegay inay heleen sababo macquul ah oo lagu rumeysan karo in labada mas’uul ay mas’uuliyad ka qaadi karaan dambiga dagaal ee gaajeysiinta shacabka loogu adeegsaday hab dagaal iyo dambiyo ka dhan ah bani’aadannimada, oo ay ku jiraan dil iyo cadaadis.
Netanyahu iyo dowladda Israel ayaa si adag u diiday eedeymaha, iyaga oo ku doodaya in maxkamaddu aysan awood sharci u lahayn inay baaritaan ku sameyso ama amar kasoo saarto madaxda Israel. Netanyahu weli ma uusan hor-tegin ICC, lagumana xukumin eedeymaha loo haysto.
Mamdani wuxuu qiray in su’aalo waaweyn ay ka taagan yihiin awoodda uu duqa New York u leeyahay inuu Booliska New York, ee NYPD, ku amro fulinta waaran ay soo saartay maxkamad aanay dowladda Mareykanku aqoonsaneyn awooddeeda.
“Wax kasta oo sharcigu ii oggol yahay inaan ka sameeyo magaalada New York, waan sameyn doonnaa,” ayuu yiri. “Laakiin ma qori doonno sharciyo noo gaar ah si aan u gaarno ujeeddadaas.”
Duqa magaalada ayaa sheegay in maamulkiisu uu arrintan kala tashanayo Waaxda Sharciga ee New York, si loo ogaado tallaabooyinka ay qaadi karaan hay’adaha magaalada haddii Netanyahu uu yimaado Manhattan.
Caqabado sharci
Hase yeeshee, isku day kasta oo lagu doonayo in lagu xiro Netanyahu ayaa la filayaa inuu dhaliyo iska hor-imaad sharci iyo mid siyaasadeed oo dhex mara maamulka New York iyo dowladda federaalka Mareykanka.
Mareykanka iyo Israel kama mid aha dalalka ansixiyay heshiiska Rome ee lagu dhisay ICC, halka siyaasadda arrimaha dibadda, xiriirka dowladaha iyo xasaanadda hoggaamiyeyaasha shisheeye ay inta badan hoos tagaan awoodda dowladda federaalka.
Sidoo kale, madaxda shisheeye ee u socda xarunta Qaramada Midoobay ayaa heli kara ilaalin iyo xasaanad la xiriirta safarradooda rasmiga ah. Khubaro sharci ayaa sheegay in dowladda federaalka ay u badan tahay inay Netanyahu u aqoonsato hoggaamiye leh xasaanad, taas oo si weyn u adkeyn karta tallaabo kasta oo ay qaadaan mas’uuliyiinta magaalada.
Netanyahu ayaa la filayaa inuu ka qeyb-galo doodda guud ee kalfadhiga 81-aad ee Golaha Guud ee Qaramada Midoobay, oo ka furmi doonta New York 22-ka September 2026.
Mamdani ayaa intii uu ku jiray ololihii doorashada duqa magaalada sannadkii hore ballan-qaaday inuu NYPD ku amri doono inay fuliso waaranka ICC haddii Netanyahu uu yimaado New York. Hadalkiisa cusub ayaa muujinaya inuu weli ku adkeysanayo ballan-qaadkaas, balse uu hadda xoogga saarayo in tallaabo kasta lagu saleeyo sharciga jira.
Netanyahu ayaa dhankiisa ku eedeeyay Mamdani inuu la safan yahay ururka Xamaas, oo weerarkii 7-dii October 2023 ku qaaday Israel uu horseeday dagaalka Gaza.
“Waa inuu fiiriyaa cidda uu cambaareynayo iyo cidda uu taageerayo,” ayuu Netanyahu ku yiri wareysi uu siiyay weriyaha idaacadda New York Sid Rosenberg.
“Wuxuu cambaareynayaa Israel, oo ah dimoqraadiyadda garab taagan qiyamka Mareykanka. Yuu taageerayaa? Xamaas,” ayuu raaciyay Netanyahu, oo sidoo kale ku eedeeyay Mamdani inuu si qarsoon u neceb yahay Mareykanka.
Mamdani ayaa marar badan cambaareeyay weerarkii Xamaas ee 7-dii October, balse xuquuqda Falastiiniyiinta iyo dhaleeceynta ololaha milatari ee Israel ayaa noqday qeyb muhiim ah oo ka mid ah mowqifkiisa siyaasadeed.
Wuxuu howlgallada Israel ee Gaza ku tilmaamay xasuuq, eedeyn ay dowladda Israel si adag u diidday. Guddi madax-bannaan oo baaritaan oo ay Qaramada Midoobay leedahay ayaa September 2025 soo gabagabeeyay in Israel ay xasuuq ka geysatay Gaza, halka Israel ay warbixintaas ku tilmaantay mid qalloocan oo dano siyaasadeed laga leeyahay.
Danjiraha Israel u fadhiya Qaramada Midoobay, Danny Danon, ayaa sheegay in hadalka Mamdani uusan waxba ka beddeli doonin qorshaha Netanyahu.
“Ra’iisul wasaare Netanyahu wuxuu imaan doonaa New York, wuxuuna si sharaf leh ula hadli doonaa Golaha Guud ee Qaramada Midoobay,” ayuu Danon yiri. “Wuxuu dunida hor-tegi doonaa xaqiiqada Israel iyo xaqa aan laga tanaasuli karin ee ay u leedahay inay difaacdo muwaadiniinteeda.”
Muranka ayaa kusoo beegmaya xilli taageerada xisbiga Dimoqraadiga ee Israel ay si muuqata u wiiqmeyso, kadib ku dhowaad saddex sano oo dagaal ah oo ka socda Gaza.
Aqalka Wakiillada Mareykanka ayaa toddobaadkan codad gaaraya 314-104 ku diiday soo-jeedin lagu joojin lahaa $3.3 bilyan oo Mareykanku sannad kasta gargaar milatari ahaan u siiyo Israel.
Inkastoo soo-jeedinta la diiday, 103 mudane oo Dimuqraadiyiin ah ayaa taageeray, taas oo muujisay isbeddel weyn oo ku yimid mowqifka xisbiga ee ku aaddan Israel, oo muddo dheer loo arkayay mid ka mid ah xulafada ugu dhow Mareykanka ee Bariga Dhexe.
“Way adag tahay in la helo siyaasad ka sii fashilan habka uu dalkeennu ula dhaqmay Gaza iyo Falastiin,” ayuu Mamdani yiri.