Muqdisho (Caasimada Online) –Madaxweynihii hore ee Soomaaliya Shariif Sheekh Axmed ayaa mar kale caawa si toos ah ka hadlay arrinta dhulka, isagoo sheegay inuu aad uga xunyahay in dowladda Soomaaliya oo looga baahnaa inay difaacdo dalka iyo dadka ay maanta ku mashquulsan tahay barakicinta shacabka.

Shariif ayaa sheegay in shacabka Soomaaliyeed ee Muqdisho ku nool ay waayeen hooy, kadib markii dowladda Soomaaliya ay ka barakicisay dhulkiisii, sida uu hadalka u dhigay.

“Qofku markii uu hoy waayo oo qoyskii meel deganaa uu waayo meel uu ku asturmo waa dhibaato rasmi ah oo soo food saartay, ka warama kumanaan qoys hadii xaaladaas lagu qasbay, arrintaas suurtagal maaha, qof wax gartana ma sameyn karo,” ayuu yiri Sheekh Shariif.

Wuxuu farriin u diray dowladda, ganacsatada iyo ciidamada “waxaan idin leeyahay ka fogaada waxaad ku howlan tihiin, xafkeedii waa dhaaftay, maanta waxay joogtaa nin wax lahaa iyo nin aan wax laheynba in dhibku gaaray,” ayuu yiri.

Madaxweyne hore Shariif Sheekh ayaa sheegay inuu hoosta ka xariiqayo in dalkaan uu shacabka Soomaaliyeed leeyahay, “dowladdu dadka ayey maamushaa, dhulkeeda hadii ay ka maaran tana shacabka ayey siisaa, marka dowladu dhul ma kala gado, ee dalka waxaan ka joojiya,” ayuu hadalkiisa ku sii daray.

Sheekh Shariif, ayaa shacab uu caawa la kulmay u sheegay in mucaaradku ay talo isugu laabanayaan, kadibna ay ku soo warcelinayaan, si go’aan wadajir ah looga gaaro dhul boobka ay dowladdu ku lug yeelatay ee ka socda Muqdisho.

Mucaaradka ayaa dhowr jeer oo hore sidaan oo kale uga hadlay arrimaha dhulka, balse dowladdu dheg-jalaq uma siiso, waxaana sidii ku socda barakicinta dadka Muqdisho ee degan dhulka danta guud.

Hoos ka daawo Sheekh Shariif

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa caawa Madaxtooyada ku qaabilay Wasiirka Arrimaha Dibadda dalka Jabuuti Cabdulqaadir Xuseen Cumar oo booqashadiisii ugu horreysay ku yimid Soomaaliya.

Wasiirka Arrimaha Dibadda Jabuuti ayaa Madaxwaynaha Jamhuuriyadda soo gaarsiiyay salaan iyo dhambaal uu ka siday dhiggiisa Madaxweynaha Jamhuuriyadda Jabuuti Mudane Ismaaciil Cumar Geelle.

Intii uu kulanka socday, Madaxweyne Xasan Sheekh Maxamuud ayaa Wasiirka la wadaagay xaaladda guud ee dalka, gaar ahaan dadaallada socda ee dib u dhiska, horumarinta iyo howlgallada lagu ciribtirayo Khawaarijta Daacish iyo Al-Shabaab.

Madaxweynaha ayaa uga mahadceliyay shacabka iyo Dowladda Jabuuti hiilka walaalnimo ee ay la garab taagan yihiin walaalahooda Soomaaliyeed.

Sidoo kale, kulanka ayaa la iskula qaatay in la sii xoojiyo xiriirka istaraatiijiga ah ee Soomaaliya iyo Jabuuti ka dhexeeya, kaas oo ku dhisan walaaltinimo iyo iskaashi qotodheer, gaar ahaan dhinacyada amniga iyo arrimaha gobolka.

Wasiirka Arrimaha Dibedda Jabuuti iyo wafdigiisa waxaa maanta garoonka diyaaradaha Aadan Cadde ee magaalada Muqdisho ku soo dhaweeyey dhigiisa Soomaaliya Cabdisalaan Cabdi Cali iyo masuuliyiin kale oo ka tirsan labada gole ee dowladda.

Wafdiga Wasiir Cabdulqaadir ee Muqdisho soo gaaray waxaa qeyb ka ah safiirka Soomaaliya u fadhiya dalka Jabuuti, Mudane Salaad Cali Jeelle iyo masuuliyiin kale, wuxuuna sii joogi doonaa muddo labo cisho ah.

Wasiirka Arrimaha Dibedda Soomaaliya, Cabdisalaan Cabdi Cali, oo hadal kooban ka jeediyay kulankii soo dhoweynta ee ka dhacay hoolka nasashada ee garoonka ayaa ka warbixiyey booqashada Wasiirka Arrimaha Dibedda Jabuuti, Cabdulqaadir Xuseen Cumar iyo wafdigiisa ay ku yamaadeen Soomaaliya.

Dhankiisa, Wasiirka Arrimaha Dibadda Jabuuti, Mudane Cabdulqaadir Xuseen Cumar, oo ka mahadceliyey soo dhoweynta walaalnimadu ku dheehan tahay ee isaga iyo wafdigiisa loogu sameeyey Muqdisho ayaa sheegay in booqashadaan ay qaadan doono muddo labo cisho ah.

Cabdulqaadir Xuseen Cumar ayaa Wasiirka Arrimaha Dibedda Jamhuuriyadda Jabuuti loo magacaabay bishii April ee sanadkan, isagoo bedelay Wasiirkii hore ee Arrimaha Dibedda Jabuuti, Mudane Maxamuud Cali Yuusuf oo hadda ah Guddoomiyaha Guddiga Midowga Afrika.

Muqdisho (Caasimada Online) – Hay’adda Socdaalka iyo Jinsiyadda Soomaaliya ayaa si rasmi ah ugu dhawaaqday hirgelinta adeegga E-VISA, kaas oo maanta uu daah-furay Wasiirka Amniga Gudaha.

Adeegga E-VISA/ETAS ayaa dalka lagu soo geli doono laga bilaabo 1-da bisha September 2025, sida ay ku dhawaaqday hay’adda socdaalka.

Adeeggan ayaa lagu soo dalban karo qaab elektaroonig ah, iyada oo loo marayo mareegta rasmiga ah ee hay’adda. Tani waa tallaabo taariikhi ah oo Soomaaliya ku biirinaysa dalalka isticmaala nidaamka casriga ah ee fiisooyinka elektaroonigga ah.

Wasiirka Amniga Gudaha, Cabdullaahi Fartaag ayaa sheegay in laga bilaabo 1-da September ajaanibka dalka soo galaya ay ku soo geli doonaan nidaamka E-VISA.

Sidoo kale waxa uu hoosta ka xariiqay in nidaamkan casriga ah uu muhiim u yahay sugidda amniga dalka, oggolaanshaha iyo la socodka dadka soo galaya, iyo sidoo kale xoojinta hufnaanta dhaqaalaha, iyadoo qidmada dalku-galka si toos ah ugu dhici doonto koontooyinka Wasaaradda Maaliyadda.

Agaasimaha Guud ee Hay’adda Socdaalka iyo Jinsiyadda, Mustafa Dhuxulow ayaa xusay in maanta ay Soomaaliya qaadday tallaabo weyn oo taariikhi ah, taas oo muujinaysa in dalka uu la jaanqaadayo nidaamyada casriga ah ee caalamka.

Waxa uu sheegay in nidaamka E-VISA uu door muhiim ah ka qaadan doono sugidda amniga dalka, ilaalinta xogta, kobcinta dhaqaalaha, iyo fududeynta adeegyada socdaalka.

Sidoo kale, Agaasimaha ayaa caddeeyay in qaybo ka mid ah dadka ajaanibta ah laga dhaafay shuruudaha ETAS, sida kuwa haysta fiisooyinka wadar-jeer lagu soo geli karo dalka (Multiple Visa), kuwa haysta degenaanshaha, diblomaasiyiinta, baasaboorka UNLP, iyo dalalka Soomaaliya kula jira heshiisyada isku-socodka xorta ah.

Dhankiisa, Agaasimaha Waaxda Ajaanibta iyo Dalku-galka, Isxaaq Xasan Taakow ayaa sheegay in muddo dheer la soo diyaarinayay nidaamkan casriga ah ee codsiga fiisaha onlaynka ah, kaas oo fududeyn doona in dadka ajaanibta ah ay ka dalban karaan dalku-galka meelkasta oo ay joogaan, laguna heli karo muddo kooban gudahood.

Waxa uu intaas ku daray in howl-wadeenno gaar ah loo tababaray si ay u hubiyaan bixinta fiisaha si hufan oo deg-deg ah.

Muqdisho (Caasimada Online) – Dowladda Federaalka Soomaaliya ayaa faah-faahin ka bixisay ujeedka socdaalka wafdiga Imaaraadka ee uu horkacayay Wasiiru-dowlaha Wasaaradda Arrimaha Dibadda dalkaasi, kaasi oo shalay soo gaaray magaalada Muqdisho.

Dowladda Soomaaliya ayaa beenisay in socdaalka wafdiga Imaaraadka uu la xiriiro xiisadda Suudaan, iyo wafdigii Taliyaha sirdoonka dalkaasi ee soo gaaray dalka.

“Wafdiga uu hoggaaminayey Sheikh Shakhboot Bin Nahyan Al Nahyan, Wasiiru Dowlaha Wasaaradda Arrimaha Dibadda ee Imaaraadka, waxa uu ahaa socdaal muddo labo toddobaad ah la qorsheeyay, kaasoo salka ku hayay sii xoojinta xiriirka walaaltinimo ee labada dal iyo iskaashiga soo jireenka ah ee ka dhexeeya,” ayaa lagu yiri bayaaan kasoo baxay dowladda.

Sidoo kale waxaa lagu yiri qoraalka: “Waxaa jiray warar been abuur ah oo saacadihii la soo dhaafay lagu faafiyay warbaahinta bulshada, kuwaasoo socdaalka wafdigaan la xiriirinayay imaanshihii mid ka mid ah wufuudda caalamiga ah ee soo booqday dalka.”

Dowladda ayaa sheegtay in uusan jirin wax xiriir ah oo ka dhexeeya labada socdaal, iyada oo qorshaha booqashada wafdiga ka yimid Dowladda Imaaraadka Carabta uu yahay safar hore loo qorsheeyay muddo laba toddobaad ah ka hor.

Safarkaan ayay sheegtay inuu khuseeyo oo kaliya xiriirka ka dhexeeya Soomaaliya iyo Imaaraadka Carabta, isla markaana uusan daba socon wafdigii Suudaan ka yimid iyo xiisadda dagaal ee ka taagan dalkaas.

Tan ayaa imaneysa xilli ay soo baxayaan xogo sheegay in wafdiga Imaaraadka uu la xiriiro arrinta Suudaan oo Imaaraadku si toos ah ugu lug leeyihiin. Wafdiga Muqdisho yimid ayaa hoggaaminaya masuulka galka arrimaha Soomaaliya u qaabilsan Imaaraadka, wuxuuna socdaalkiisa ku soo aaday, iyadoo xiriirka Soomaaliya iyo Imaaraadka uu muddooyinkii u dambeeyay mugdi galay.

Dowaldda Federaalka Soomaaliya ayaa toos u eeganeysa Imaaraadka oo ku lug yeeshay qadiyado dhaawacaya Midnimada iyo Qarannimada Soomaaliya, halka Imaaraadku ay xitaa isku dayaan inay aragtida dowladda federaalka jiheeyaan.

Dowladda Soomaaliya ayaa horay ku taageertay dowladda Suudaan guulaha ay ka gaartay dagaallada ka dhanka ah Kooxda RSF ee Imaaraadku taageero, waana halkaas meesha seddaxda dal ay iska arkeen.

Imaaraadka oo xoogga saaraya in dowladda sharciga ah ee Suudaan uu meesha ka saaro ayaa taageera kooxda falaagada ah ee RSF oo dagaal ba’an kula jirta dowladda, halka dowladda Soomaaliya ay toos u taageertay jiritaanka iyo guusha dowladda sharciga ah ee Suudaan.

Laascaanood (Caasimada Online) – Cabdirisaaq Khaliif Axmed oo haatan ah murashax u taagan xilka madaxweynaha maamulka Waqooyi Bari ayaa Dowladda Federaalka Soomaaliya ku eedeeyay in ay fara-gelin ku hayso doorashada maamulka.

Khaliif oo bixiyay wareysi gaar ah ayaa si cad u sheegay in Dowladda Federaalka ay ka shaqeynayso sidii dib loogu dooran lahaa Cabdulqaadir Firdhiye, oo asagu maamulkan kasoo saaray kumeel-gaarka, isla markaana si weyn ugu xiran hoggaanka Dowladda Soomaaliya.

“Firdhiye waa xubin ka tirsan xisbiga Madaxweyne Xasan Sheekh, waxayna dowladdu u aragtaa baari si buuxda u fulinbkara danaha ay ka leedahay dhismaha maamulka Waqooyi Bari, ” ayuu yiri Cabdirisaaq Khaliif Axmed.

Hoggaamiye Firdhiye ayuu sheegay inuu ku fashilmay isku haynta midnimada maamulka, “Waxaanu u dhiibnay hoggaamiye Firdhiye dad iyo deegaan mideysan oo siyaasin, dhaqaale, ciidan iyo qabiil ahaan u mideysan, maantana dhamaan intaas majirto, qeylada yeeraysana waa maqashaan,” ayuu yiri.

Waxa uu intaas kusii daray “Midnimadii oo aheyd wixii aasaasiga aheyd baa dhamaanba luntay. Wixii aanu helnay ugu weyn ee aan ku dagaal galnay nidnimo ayey aheyd.”

Khaliif ayaa sheegay in waxyaabaha sugaya hoggaamiyaha cusub ay tahay wax ka qabashada midnimada luntay ee maamulka Waqooyi Bari, taas oo uu ku eedeeyay inuu lumiyay hoggaamiyaha KMG ah, Cabdulqaadir Firdhiye.

Dhinaca kale, Khaliif oo horey usoo noqday guddoomiyaha baarlamaanka Somaliland ayaa beeniyay wararka sheegaya in ololihiisa doorashada ay taageerayaan maamulo kale sida; Somaliland ama Puntland.

“Miisaanka aan ku leenahay saaxadu ayaa dad badan kuleylka gaarsiiyay, dabadeedna ay keentay in xitaa laga gudbo qiyamkii iyo akhlaaqiyaadkii ay aheyd in la dhowro, oo ah in qofka sharaftiisa meel looga dhicin,” ayuu yiri Cabdirisaaq Khaliif.

Waxa uu intaas kusii daray “Ninka maanta aniga igu tuhmaya Somaliland, garaadkiisa iyo garashadiisu halka ay gaadhsiisan tahay ayay ka tarjumaysa. Arrinta Puntland wax waanu wada laheyn, wixii aan wada lahayn maalin baa ku kala baxnay, wax naga dhaxeeya oo aan ku kala go’i karin waa jirtaa, taladayada anagaa leh.”

Muqdisho (Caasimada Online) – Golaha Wasiirada Soomaaliya ayaa maanta kulankoodii caadiga ahaa ku yeeshay magaalada Muqdisho, kaas oo ay uga hadleen arrimo xasaasi ah oo la xiriira xaaladda dalka, iyada oo sidoo kale lagu ansixiyay heshiisyo difaac oo muhiim ah.

Golaha wasiirada ayaa sidoo kale meel-mariyay heshiisyo is-afgarad, kuwaas oo muhiimad weyn u leh xoojinta difaaca dalka iyo dhismaha ciidamada qalabka sida ee Soomaaliyeed.

Heshiisyadan oo lala soo galay saddex dal ayaa kala ah, Heshiis is-afgarad oo u dhexeeya Wasaaradda Gaashaandhigga JFS iyo Wasaaradda Gaashaandhigga Boqortooyada Urdun, Heshiis is-afgarad oo u dhexeeya Wasaaradda Gaashaandhigga JFS, iyo Wasaaradda Gaashaandhigga Dowladda Qatar, Heshiis is-afgarad oo u dhexeeya Wasaaradda Gaashaandhigga JFS iyo Wasaaradda Gaashaandhigga ee Jamhuuriyadda Islaamiga ah ee Pakistan.

Sidoo kale golaha wasiirada ayaa dhageystay warbixinno la xiriira howlaha wasaaradaha, kuwaas oo ay soo bandhigeen qaar kamid ah xubnaha golaha, waxaana shirka guddoomiyay ra’iisul wasaare ku xigeenka koowaad Mudane Saalax Axmed Jaamac.

Waxaa kale oo kulanka looga hadlay xaaladda amniga dalka iyo howlgallada socda ee lagu ciribtirayo kooxaha Khawaarijta ah ee kooxaha Daacish iyo Al-Shabaab.

Soomaaliya ayaa haatan ku jirto marxalad xasaasi ah, iyada oo heshiisyada la galay ay kusoo aadeen, iyada oo horay sidaan oo kale ay heshiisyo difaac loola soo galy dalal waawayn oo kamid ah waddamada Turkiga, Masar iyo dowlado kale oo muhiim ah.

Muqdisho (Caasimada Online) – Madaxweynihii hore ee Soomaaliya Mudane Maxamed Cabdullahi Maxamed (Farmaajo) ayaa maanta soo saaray qoraal ah uu ku cambaareeyay xarigga Nabaddoon Xuseen Maxamed Maxamuud (Xaadoole) oo ka mid ah odeyaasha dhaqanka Gobolka Banaadir, kaas oo ay gurigiisa kasoo xireen ciidamada booliska Soomaaliya.

Farmaajo ayaa sheegay in Nabadoonka loo xiray in laga hortago guuxa dadweynaha iyo dadaalka waxgaradka ee ka dhanka ah ku takri-falka hantida danta guud, wuxuuna baaq deg-deg ah u diray Madaxweyne Xasan Sheekh Maxamuud.

Sidoo kale  Madaxweynihii hore ee dalka ayaa eedeeyay ciidamada soo xiray Nabadoon Xadool, wuxuuna tilmaamay in loo adeegsadeen dano shaqsiyadeed oo gaar ah.

“Waxaan cambaareynayaa xarigga iyo tacaddiga loo geystay Nabaddoon Xuseen Maxamed Maxamuud (Xaadoole) oo ka mid ah odeyaasha dhaqanka Gobolka Banaadir. Nabaddoon Xaadoole oo u kacay difaaca dadka nugul ee la barakiciyey ee ku dhaqan Muqdisho, waxa loo xiray in laga hortago guuxa dadweynaha iyo dadaalka waxgaradka ee ka dhanka ah ku takri-falka hantida danta guud. Arrinkani waxa uu muujinaya in laamaha amniga loo adeegsanayo dano shakhsiyadeed oo gurracan” ayuu qoraalkiisa ku yiri Maxamd Farmaajo.

Waxaa kale oo uu baaq deg-deg ah u diray Madaxweyne Xasan Sheekh Maxamuud oo uu ka codsaday inuu sii daayo Nabadoonka, si uu u helo xoriyaddiisa. Maxamed Farmaajo ayaa sidoo kale ku baaqay in laga waantoobo in cabashada iyo codka dadweynaha lagu wajoho caburin iyo xarig.

“Madaxweynaha waxaan ku adkeynayaa in degdeg loo sii daayo Nabaddoon Xaadoole, lagana waantoobo in cabashada iyo codka dadweynaha lagu wajoho caburin iyo xarig, taas oo dhaawacaysa dowladnimada iyo kalsoonida shacabka keeni kartana kacdoon khalkhal galiya xasiloonida dalka” ayuu mar kale yiri Madaxweynihii hore ee Soomaaliya.

Sidoo kale wuxuu raaciyay “Sida ku cad qodobada 15aad, 18aad iyo 20aad ee Dastuurka kumeel gaarka ah, oo qeexaya xorriyadda kulanka, bannaanbaxa, cabashada iyo codsi wadareedka, waxa uu qof kasta xaq u leeyahay xorriyadda hadalka kana qeyb-qaato ama abaabulo kulammo uu ku muujinayo cabasho. Sidaas darteed waxaan ka digaynaa caburinta dadweynaha iyo ficillada noocaan ah ee lagu beegsanayo hormuudka bulshada”

Dhanka kale, Madasha Samatabixinta Mucaaradka ayaa xalay si kulul uga hadlay xarigga Nadoonka, iyaga oo si adag u cambaareeyay tallaabada ay qaadeen ciidanka soo xiray.

“Madasha Samatabixinta Soomaaliyeed waxay si adag u cambaaraynaysaa xarigga sharci-darrada ah ee lagula kacay Nabaddoon Xuseen Maxamed Maxamuud Xaadoole, oo ciidamada boolisku ka afduubteen hoygiisa, kadib markii uu si geesinimo leh uga hor yimid boobka iyo xaraashka dhulka danta guud ee uu hormuudka ka yahay Madaxweyne Xasan Sheekh Maxamuud,” ayaa lagu yiri bayaanka Madasha Samatabixinta Soomaaliyeed.

Nabaddoon Xaadoole waa oday dhaqameed oo saameyn ku leh bulshada, wuxuuna codkiisa ku difaacayay hantida shacabka Soomaaliyeed, sida ay sheegeen xubnaha mucaaradka.

Muqdisho (Caasimada Online) – Garabka Madasha Samatabixinta Soomaaliyeed ee uu hoggaamiyo madaxweynihii hore Shariif Sheekh Axmed ayaa war-saxaafadeed ka soo saaray xarigga Nabaddoon Xuseen Maxamed Maxamuud Xaadoole, oo ciidamada booliska Soomaaliya ay kasoo xireen hoygiisa ku yaalla magaalada Muqdisho.

“Madasha Samatabixinta Soomaaliyeed waxay si adag u cambaaraynaysaa xarigga sharci-darrada ah ee lagula kacay Nabaddoon Xuseen Maxamed Maxamuud Xaadoole, oo ciidamada boolisku ka afduubteen hoygiisa, kadib markii uu si geesinimo leh uga hor yimid boobka iyo xaraashka dhulka danta guud ee uu hormuudka ka yahay Madaxweyne Xasan Sheekh Maxamuud,” ayaa lagu yiri bayaanka Madasha.

Nabaddoon Xaadoole waa oday dhaqameed saameyn ku leh bulshada, wuxuuna codkiisa ku difaacayay hantida shacabka Soomaaliyeed, sida ay sheegeen xubnaha mucaaradka.

“Nabaddoonku xaqiisa dastuuriga ah ayuu si nabad ah ugu cabbiray aragtidiisa ku aaddan ku takrifalka awoodda iyo hantida qaranka,” ayaa lagu yiri war-saxaafadeedka Madasha.

Sidoo kale, mucaaradka ayaa xarigga Nabaddoon Xaadoole ku macneeyay isku day lagu cabburinayo codka shacabka, laguna handadayo qof kasta oo u taagan xuquuqdiisa dastuuriga ah.

“Xorriyadda hadalku waa xaq dastuuri ah oo aasaas u ah nidaamka dowladnimada, xabsina kuma muteysan karo ruux difaacaya hantida ummadda Soomaaliyeed,” ayaa lagu yiri qoraalka Madasha.

Xubnaha Madasha oo farriin u diray Madaxweyne Xasan Sheekh ayaa yiri: “Madashu waxay ugu baaqaysaa Madaxweynaha inuu joojiyo xaraashka dhulka danta guud, sidoo kale, waxay ku baaqaysaa in si degdeg ah xorriyaddiisa loo siiyo Nabaddoonka.”

Waxay sheegeen in xarigga Nabaddoon Xaadoole uu ka marqaati kacayo dulqaad-yarida Madaxweyne Xasan Sheekh iyo baqdinta uu ka qabo codka shacabka, sida ay hadalkooda u dhigeen.

“Waxaan ugu baaqaynaa shacabka Soomaaliyeed, gaar ahaan reer Muqdisho, inay isu soo baxaan oo codkooda si geesinimo leh u cabbiraan, si loo badbaadiyo hantida ummadda, loogana hortago barakicinta danyarta,” ayaa lagu yiri war-saxaafadeed ka soo baxay Madasha Samatabixinta ee uu hoggaamiyo Sheekh Shariif.

Muqdisho (Caasimada Online) – Faah-faahin dheeraad ah ayaa kasoo baxaysa howl-gal qorsheysan oo ciidamada xoogga dalka Soomaaliyeed ee Kumaandooska Danab ay ka fuliyeen tuulada Farsooleey ee gobolka Shabeellaha Hoose.

Howl-galkan ayaa lagu beegsaday horjooge ka tirsan kooxda Al-Shabaab iyo ilaaladiisa. Horjoogahan oo lala dilay saddex ilaaladiisa ayaa kooxda u qaabilsanaa dhanka qaraxyada.

“Horjoogahaan oo ka mid ahaa shakhsiyaadka ugu halista badan kooxda. Sidoo kale, waxaa lagu khaarajiyay saddex maleeshiyaad oo la socday,” ayaa lagu yiri qoraal kasoo baxay dowladda.

Qoraalka dowladda ayaa sidoo kale lagu sheegay in ninkan uu ka mid ahaa xubnaha ugu khatarta badan ee kooxda, isla markaana uu door weyn ku lahaa qorsheynta weeraro qaraxyo ah oo shacabka Soomaaliyeed lagu waxyeelleeyay.

Sida lagu xusay war-saxaafadeedka, qaraxyada uu maamulayay horjoogahan ayaa sababay dhimasho iyo dhaawac culus oo soo gaaray dad rayid ah.

Howl-galkan ayaa qayb ka ah dadaallada ciidamada xoogga dalka ay ku xoojinayaan gulufka ka dhanka ah Al-Shabaab, gaar ahaan deegaanada ku teedsan Sh/Hoose.

Waxa uuna imanaya xilli ay hoos u dhaceen howl-galladii tooska ahaa ee ka dhanka ahaa kooxda, kaas oo iska garabsanayeen ciidanka xoogga iyo dadka deegaanka ee Macawisleyda

Muqdisho (Caasimada Online) – Wasiirka Arrimaha Dibedda Jamhuuriyadda Jabuuti, Mudane Cabdulqaadir Xuseen Cumar, iyo wafdi uu hoggaaminayo oo soo gaaray Soomaaliya ayaa si diiran loogu soo dhaweeyey garoonka diyaaradaha Aadan Cadde ee magaalada Muqdisho.

Wafdiga Wasiir Cabdulqaadir ee Muqdisho soo gaaray waxaa qeyb ka ah safiirka Soomaaliya u fadhiya dalka Jabuuti, Mudane Salaad Cali Jeelle iyo masuuliyiin kale.

Masuuliyiin ka tirsan dowladda Soomaaliya oo uu hoggaaminayo Wasiirka Arrimaha Dibedda Soomaaliya, Mudane Cabdisalaan Cabdi Cali, qeybna ay ka yihiin wasiirro, xildhibaano iyo Safiirka Dowladda Jabuuti u jooga Soomaaliya Amb. Maxamedrashiid, ayaa garoonka Aadan Cadde ku soo dhaweyey wafdiga wasiirka ee ka yimid Dalka Jabuuti.

Wasiirka Arrimaha Dibedda Soomaaliya, Cabdisalaan Cabdi Cali, oo hadal kooban ka jeediyay kulankii soo dhoweynta ee ka dhacay hoolka nasashada ee garoonka ayaa ka warbixiyey booqashada Wasiirka Arrimaha Dibedda Jabuuti, Cabdulqaadir Xuseen Cumar iyo wafdigiisa ay ku yamaadeen Soomaaliya.

Dhankiisa, Wasiirka Arrimaha Dibadda Jabuuti, Mudane Cabdulqaadir Xuseen Cumar, oo ka mahadceliyey soo dhoweynta walaalnimadu ku dheehan tahay ee isaga iyo wafdigiisa loogu sameeyey Muqdisho ayaa sheegay in booqashadaan ay qaadan doono muddo labo cisho ah.

Cabdulqaadir Xuseen Cumar ayaa Wasiirka Arrimaha Dibedda Jamhuuriyadda Jabuuti loo magacaabay bishii April ee sanadkan, isagoo bedelay Wasiirkii hore ee Arrimaha Dibedda Jabuuti, Mudane Maxamuud Cali Yuusuf oo hadda ah Guddoomiyaha Guddiga Midowga Afrika.

Wasiir Cabdulqaadir ayaa inta uu joogo Muqdisho wuxuu kulamo la qaadan doonaa masuuliyiinta ugu sareysa dowladda Soomaaliya oo Madaxweyne Xasan Sheekh uu ugu horeeyo, iyagoo ka wadahadli doona ajendayaal muhiim u ah labada dal ee walaalaha ah.

Jabuuti (Caasimada Online) – Urur-goboleedka Bariga Afrika ee IGAD ayaa Arbacadii soo dhoweeyey heshiis siyaasadeed oo taariikhi ah oo laga gaaray Soomaaliya, iyagoo ku ammaanay madaxda dalka horumarka ay ka sameeyeen heshiiskaas oo looga gol leeyahay in lagu soo afjaro is-mari-waagii muddada dheer soo taagnaa, isla markaana gogol-xaar u noqda doorashooyin qof-iyo-cod ah.

IGAD ayaa soo dhoweysay heshiiska Isniintii ay magaalada Muqdisho ku kala saxiixdeen dowladda federaalka iyo garab weyn oo ka tirsan mucaaradka Madasha Samatabixinta. Heshiiskaas ayaa qeexaya khariidad-waddo horseedaysa doorashadii ugu horreysay ee “qof iyo cod ah” oo Soomaaliya ka dhacda muddo ka badan 50 sano.

War-saxaafadeed uu soo saaray, Xoghayaha Guud ee IGAD, Dr. Workneh Gebeyehu, wuxuu ku ammaanay dhinacyada heshiiyey “hoggaankooda iyo go’aankooda siyaasadeed,” isagoo heshiiska ku tilmaamay “tallaabo muhiim ah oo loo qaaday dhinaca midnimada, xasilloonida, iyo dib-u-heshiisiinta Jamhuuriyadda Federaalka Soomaaliya.”

Wuxuu ugu hambalyeeyey Madaxweyne Xasan Sheekh Maxamuud “bisaylkiisa siyaasadeed iyo sida ay uga go’an tahay inuu dalka u hoggaamiyo dhinaca nabadda iyo loo-dhan-yahay.” Sidoo kale, urur-goboleedku wuxuu ku boorriyey dhammaan dhinacyada ay khusayso arrimaha Soomaaliya inay qaataan tanaasul, isagoo mar kale xaqiijiyey taageeradiisa joogtada ah ee geeddi-socodka nabadda.

Heshiiskan, oo la saxiixay kadib wada-hadallo xooggan, wuxuu muujinayaa isbeddel weyn oo ku yimid marxaladda siyaasadeed ee cakiran ee Soomaaliya. Wuxuu dalka dib ugu celinayaa nidaamka baarlamaanka, halkaas oo xildhibaannadu ay doortaan madaxweynaha, laakiin, tan ugu muhiimsan, wuxuu dejinayaa waddo looga gudbayo nidaamka awood-qaybsiga ee ku salaysan qabiilka, kaas oo siyaasadda dalka qaabeeyay tobanaan sano.

Soomaaliya kama aysan dhicin doorasho toos ah oo dadweyne codkooda ku dhiibtaan tan iyo 1969-kii, sanadkii uu afgambi militari talada kula wareegay Siyaad Barre. Tan iyo burburkii xukuumaddiisa ee 1991-kii, oo ay daba socdeen sanado dagaal sokeeye ah, dalku wuxuu ku tiirsanaa hab doorasho oo dadban, halkaas oo odayaasha dhaqanka iyo ergooyinku ay soo xulaan xildhibaannada, waana hannaan si weyn loogu dhaliilay inuu yahay mid madmadow badan, aan loo simanayn, oo u nugul musuqmaasuq.

“Kuma sii dhaganaanaan karno nidaam uusan dunidu aqoon,” ayuu yiri Madaxweyne Xasan Sheekh kadib markii heshiiska lagu dhawaaqay. “Soomaaliya waa inay qaaddaa tallaabooyin dowladnimadeeda la jaan-qaadsiinaya xeerarka caalamiga ah.”

Heshiiska ayaa sidoo kale soo bandhigaya sharci cusub oo loogu talagalay in lagu xoojiyo nidaamka xisbiyada siyaasadda ee Soomaaliya, kaas oo aqoonsi qaran siinaya urur siyaasadeed kasta oo hela ugu yaraan 10% kuraasta baarlamaanka.

Horumarkan ayaa yimid kadib is-mari-waa muddo dheer soo jiitamayay oo u dhexeeyay Madaxweyne Xasan iyo Madasha Samatabixinta, oo ah isbahaysi mucaarad ah oo awood leh, kuna jiraan shakhsiyaad magac leh, oo ay ka mid yihiin madaxweynayaal iyo ra’iisul wasaarayaal hore. Madasha ayaa loo aasaasay inay ka horyimaadaan qorshaha Xasan Sheekh ee dib-u-habaynta dastuurka iyo doorashooyinka, kaas oo dadka dhaliilaa ay ku doodayeen inuusan jirin is-afgarad ballaaran oo laga gaaray.

Heshiiska waxaa saxiixay garab ka tirsan madasha oo go’aansaday inuu ka go’o oo uu la hadlo dowladda, tallaabadan oo muujinaysa kala-qaybsanaan ka dhex-dhalan karta mucaaradka.

Cumar Cabdirashiid Cali Sharmaarke, oo ah ra’iisul wasaarihii hore iyo wada-xaajoodiye muhiim u ah garabka mucaaradka, ayaa xaqiijiyey in horumar laga gaaray dhowr cutub oo dastuurka ka mid ah, isagoo xusay in heshiisku uu gacan ka geysan doono “in laga fogaado kala-qaybsanaan” ku timaada nidaamka siyaasadeed.

Si kastaba ha ahaatee, xubnaha weli ku harsan Madasha Samatabixinta ayaan weli si fagaare ah u taageerin heshiiska, taasoo abuuraysa hubanti la’aan ku aaddan inay aakhirka ku biiri doonaan geeddi-socodka iyo in kale.

In kasta oo heshiiskani yahay tallaabo weyn oo horay loo qaaday, caqabadaha horyaalla Soomaaliya ayaa weli ah kuwo aad u waaweyn. Labada dhinacba waxay ballan-qaadeen inay xoojinayaan amniga ayna dardar-gelinayaan hawlgallada wadajirka ah ee ka dhanka ah kooxda xagjirka ah ee Al-Shabaab.

Dhinacyada heshiiska saxiixay waxay sidoo kale ka go’an tahay inay dhameystiraan dastuurka ku-meel-gaarka ah ee Soomaaliya, waana tallaabo muhiim ah oo dib u dhac badani ku yimid, kuna saabsan dadaallada dowlad-dhisidda qaranka.

Yinchuan (Caasimada Online) – Ra’iisul wasaaraha xukuumadda Soomaaliya, Mudane Xamza Cabdi Barre oo haatan ku sugan dalka Shiinaha ayaa khudbad ka jeediyay Bandhigga 7-aad ee Carabta iyo Shiinaha (China-Arab States Expo) ee lagu qabtay magaalada Yinchuan, isaga oo soo bandhigay fursadaha muhiimka ah ee ka jira dalka.

Ra’iisul wasaaraha ayaa madasha ka sheegay in Sooomaaliya ay dooneyso in ay noqoto xarun muhiim ah oo isku xirta Afrika, Carabta iyo Aasiya.

Sidoo kale wuxuu tilmaamay in Soomaaliya ay qaadday waddo cusub oo horumarineed, taas oo diiradda lagu saarayo nabadda, amniga, dib-u-habeynta sharciyada, iyo dhiirrigelinta maalgashiga.

“Soomaaliya waxay rabtaa in ay noqoto xarun muhiim ah oo isku xirta Afrika, Carabta iyo Aasiya, iyada oo ka faa’iideysaneysa kheyraadkeeda maadaama ay goob istiraatiiji ah dunida kaga taallo. Waxaana xoogga saareynaa iskaashiga dhinacyada tamarta, beeraha, kalluumeysiga, kaabayaasha dhaqaalaha iyo tiknoolajiyadda.” ayuu yiri Xamza.

Waxaa kale oo uu intaasi kusii daray in ganacsiga ka dhexeeya Soomaaliya iyo Shiinaha uu yahay mid xoogeysanaya, iyada oo uu kor u kacay 20% sanadkii la soo dhaafay ganacsiga labada dal.

Ra’iisul wasaare Xamza ayaa xusay in xiriirka qotada dheer ee ka dhexeeya Soomaaliya iyo Shiinaha, uu yahay mid soo jireen ah isla markaana ay Soomaaliya tahay dalkii ugu horreeyay Afrika ee xiriir diblomaasiyadeed la yeesha Shiinaha sanadkii 1960.

Xamza ayaa kahor shirkan la kulmay Ra’iisul wasaaraha iyo hoggaamiyaha gobolka Ningxia, ahna xoghayaha guud ee xisbiga Gobolka, Mudane Li Yifei, waxayna ka wada-hadleen xoojinta xiriirka taariikhiga ah ee ka dhexeeya Soomaaliya iyo Shiinaha.

Wafdiga Ra’iisul wasaare Xamza ayaa sidoo kale soo bandhigay fursadaha maalgashi ee ka jira Soomaaliya, sida beeraha, kalluumeysiga, tamarta iyo xoolaha.

Muqdisho (Caasimada Online) – Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta qasriga Madaxtooyada ku qaabilay wafdi uu hoggaaminayey Wasiiru-Dowlaha Arrimaha Dibadda ee Isutagga Imaaraadka Carabta, Mudane Sheekh Shakhboot bin Nahyan.

Kulanka ayaa waxaa diiradda lagu saaray xoojinta xiriirka walaaltinimo iyo iskaashiga qotodadheer ee ka dhexeeya labada dal, iyada oo si gaar ah loo eegay dhinacyada dhaqaalaha iyo amniga.

Sidoo kale, Wasiiru-Dowlaha Arrimaha Dibadda ayaa intii kulanka lagu gudajiray Madaxwaynaha Jamhuuriyadda soo gaarsiiyay dhambaal khaas ah oo uu uga siday Madaxweynaha Isutagga Imaaraadka Carabta, Sheekh Maxamed bin Zayed Al Nahyan.

Madaxweyne Xasan Sheekh Maxamuud, oo uga mahadceliyay Wasiirka booqashadiisa iyo garab-istaagooda Soomaaliya, ayaa ku amaanay sida shacabka iyo Dowladda Imaaraadku taageerada u muujiyeen walaalahooda Soomaaliyeed.

Madaxweynaha Soomaaliya, aya dhankiisa farriin gaar ah u gudbiyay Madaxwayne Maxamed bin Zayed Al Nahyan, taas oo wasiiru dowlaha uu ugu dhiibay, isagoo adkeeyay sida Soomaaliya uga go’an tahay in ay sii xoojiso iskaashiga ay la leedahay Imaaraadka Carabta.

Sidoo kale, Madaxweyne Xasan Sheekh, ayaa tilmaamay dadaallada socda ee lagu xaqiijinayo amniga, dimuqraadiyeynta iyo horumarka dalka.

Sida ay Caasimada Online u xaqiijiyeen ilo wareedyo ka tirsan Madaxtooyada, waxyaabaha laga wada hadlay waxaa ku jirta arrinta Suudaan oo Imaaraadku si toos ah ugu lug leeyihiin.

Wasiiru dowlaha maanta Muqdisho yimid waa masuulka galka arrimaha Soomaaliya u qaabilsan Imaaraadka, socdaalkiisa ayaa ku soo aaday, iyadoo xiriirka Soomaaliya iyo Imaaraadka uu muddooyinkii u dambeeyay mugdi galay.

Dowaldda Federaalka Soomaaliya ayaa toos u eeganeysa Imaaraadka oo ku lug yeeshay qadiyado dhaawacaya Midnimada iyo Qarannimada Soomaaliya, halka Imaaraadku ay xitaa isku dayaan inay aragtida dowladda federaalka jiheeyaan.

Madaxtooyada Soomaaliya oo maanta faahfaahin ka bixisay safarkii uu Muqdisho ku yimid Taliyaha Sirdoonka ee dalka Suudaan G/Sare Axmed Ibraahim Cali Mufadal, ayaa sheegtay in Madaxweyne Xasan Sheekh uu soo gaarsiiyay dhambaal uu ka soday Guddoomiyaha Golaha kumeel-gaarka Qaranka Suudaan Gen, Abdelfarah Burhaan oo ku aaddan xoojinta xiriirka iyo iskaashiga dhinac kasta oo dan u ah labada dal.

Dowladda Soomaaliya, ayaa horay ku taageertay dowladda Suudaan guulaha ay ka gaartay dagaallada ka dhanka ah Kooxda RSF ee Imaaraadku taageero, waana halkaas meesha seddaxda dal ay iska arkeen.

Imaaraadka oo xoogga saaraya in dowladda sharciga ah ee Suudaan uu meesha ka saaro ayaa taageera kooxda falaagada ah ee RSF oo dagaal ba’an kula jirta dowladda, halka dowladda Soomaaliya ay toos u taageertay jiritaanka iyo guusha dowladda sharciga ah ee Suudaan.

Muqdisho (Caasimada Online) – Wasiirkii hore ee arrimaha dibadda Soomaaliya, Axmed Ciise Cawad, ayaa mar kale weerar afka ah ku qaaday wasiirka gaashaandhigga Soomaaliya, Axmed Macalin Fiqi, kadib markii su’aal laga weydiiyey waxa ay isku hayaan ee sababay in maalmihii lasoo dhaafay ay iska weeraraan warbaahinta.

Wasiir hore Cawad, ayaa sheegay in Wasiir Fiqi uu yahay nin isagoo masuul qaran ah aad u isticmaala qabyaalada, isla markaana uu jeclaan lahaa in isaga iyo Fiqi dood loo qabto, si Soomaalidu u barato ninka wasiir ku haboon labadooda.

Hadalka Cawad oo baraha bulshada ku faafay saacadihii u dambeeyey waxaa qoraal kooban uga soo jawaabay wasiirka gaashaandhigga, Axmed Macalin Fiqi, oo yiri “Salaadda ha u dhawaanina idinkoo sakhraansan ilaa aad ka garanaysaan waxaad sheegaysaan.”

Cawad oo qoslaya ayaa yiri “Horta waa fiicnaa laheyd in aniga iyo Fiqi aad dood nooqabataan, markaas waxaa ogaan laheydeen qofka labadeena wasiir u qalma, laakiin hadda waxaan idiin sheegayaa in Fiqi uu caan ku yahay inuu ku dhaarto wax uusan awoodin in uu qabto.”

Jawaabta kooban ee Fiqi oo mar kale Cawad ku tilmaamay nin sarqaama, ayaa hadal-heyn kale iyo falanqeyn abuurtay, iyadoo dadka qaar ay muujinayeen in hadalkaasi u uku habooneyn in qof hadda wasiir ah uu ku yiraahdo wasiir hore, isla markaana uu sumcad dil ku yahay dowladnimada iyo is ixtiraamka Soomaalida.

Axmed Cawad ayaa ku faanay in waayihii uu wasiirka ahaa uusan waligiis u hanjabin dad kale ama hadallo kicin qabiil ah uusan adeegsan, halka Fiqi u uku eedeeyey in waligiisba uu jeclaa inuu xanafta qabyaalada adeegsado.

“Anigu markii aan lahaa Fiqi waa Feysal-ka Soomaaliya, waxaan kala jeeday waxaad aragteen marar badan oo wasiir uu ka ahaa Galmudug iyo dowladda federaalka in adeegsanayo hadallo muujinaya inuu aaminsan yahay in dowladda Soomaaliya uu isagu iska leeyahay, mar wuxuu yiri nin ahaan jiray Ra’iisul Wasaare ayaa dalka wax ka sheegay, laakiin waxaan isaga dhaafeynaa seedinimo, mararka qaar wxuuu u dhaartaa qabaa’ilka, marka idinkaaba qiimey kara Fiqi waxa uu yahay,” ayuu yiri Cawad.

Isagoo sii dhaliilaya ayuu sheegay in Fiqi uusan waxba ka qabanin wasaaradaha loo dhiibo, “Idinkuba qiimeeya muxuu qaban karaa qof iska dhaaranaya oo wax uusan qaban karin sheegaya, oo wasaaradihii uu ka shaqeeyey la arki karo in waxba uusan ku soo kordhin,” ayuu hadalkiisa ku sii daray Axmed Ciise Cawad.

Hoos ka daawo

Yinchuan (Caasimada Online) – Ra’iisul Wasaaraha Xukuumadda Federaalka Soomaaliya, Mudane Xamsa Cabdi Barre, oo safar ku jooga dalka Shiinaha, ayaa kulan la yeeshay Ku-xigeenka Guddoomiyaha Guddiga Joogtada ah ee Golaha Shacabka Qaranka Shiinaha, Mudane He Wei, isagoo kala hadlay arrimo muhiim u ah Soomaaliya iyo iskaashiga labada dal.

Ra’iisul Wasaaraha ayaa ku celiyay in saaxiibtinimada xooggan ee taariikhiga ah ee ka dhaxaysa Soomaaliya iyo Jamhuuriyadda Shacbiga ee Shiinaha ay tahay mid xooggan, oo mudan in lasii Dardar geliyo.

Xamsa Barre ayaa hoosta ka xarriiqay in Soomaaliya ay ka go’an tahay in saaxiibtinimadan loo beddelo iskaashi wax ku ool ah oo si toos ah u taabanaya shacabka Soomaaliyeed.

Sidoo kale, Xamsa ayaa xusay in kor u qaadistii dhawaan lagu sameeyay xiriirka labada dal ee la gaarsiiyey heer Iskaashi Istiraatiiji ah ay tahay tallaabo taariikhi ah oo muhiim u ah labada shacab, isla markaana loo baahan yahay in loo rogo faa’iido dhab ah.

Wuxuu caddeeyay in go’aanka Soomaaliya ee ah in ay sii xoojiso kalsoonida siyaasadeed ee labada dal iyo ku adkaysiga mabda’a Midnimada Shiinaha (One-China Principle) uu yahay mid cad.

Ra’iisul Wasaaraha ayaa xusay sida Soomaaliya ay ugu diyaar tahay ballaarinta iskaashiga dhinacyada muhiimka ah sida kalluumeysiga, beeraha, tamarta, kaabayaasha dhaqaalaha iyo horumarinta awoodda bini’aadamka.

Sidoo kale, Ra’iisul Wasaare Xamsa ayaa iftiimiyay in horumarka Soomaaliya ku tallaabsatay sanadihii ugu dambeeyay, oo ay ku jiraan cafinta deymaha, dib-u-habeynta dhaqaalaha, xoojinta amniga, iyo ku biirista Soomaaliya ee Bulshada Bariga Afrika (EAC) iyo Golaha Ammaanka Qaramada Midoobay, ay Soomaaliya ka dhigayaan mid lagu kalsoonaan karo dhan walba.

Ku-xigeenka Guddoomiyaha Guddiga Joogtada ah ee Golaha Shacabka Qaranka Shiinaha, Mudane He Wei, ayaa dhankiisa bogaadiyay adkaysiga Soomaaliya, wuxuuna ku celiyay sida Shiinuhu diyaar ugu yahay in uu si dhow ula shaqeeyo Soomaaliya si loo fuliyo qodobadii lagu heshiiyay kulamadii dhexmaray Madaxweynaha Soomaaliya, Mudane Xasan Sheekh Maxamuud, iyo Madaxweynaha Shiinaha, Mudane Xi Jinping, isaga oo carrabka ku adkeeyay in Shiinuhu sii wadi doono taageerada madax-bannaanida, midnimada iyo wadajirka dhuleed ee Soomaaliya.

Muqdisho (Caasimada Online) – Ra’iisul Wasaare ku-xigeenka labaad ee xukuumadda Soomaaliya, Jibriil Cabdirashiid Cabdi ayaa maanta xafiiskiisa ku qaabilay Danjiraha dowladda Itoobiya u fadhiya Soomaaliya Mudane Suleiman Dedefo Woshe.

Ra’iisul Wasaare ku-xigeenka labaad iyo Danjiraha Itoobiya ayaa kulankooda waxaa lagu lafaguray sidii loo xoojin lahaa xiriirka labada dal, iyadoo xoogga la saaray dhinacyada amniga, siyaasadda iyo dhaqaalaha.

Bayaan kooban oo kasoo baxay xafiiska Ra’iisul Wasaare ku-xigeenka labaad ayaa lagu caddeeyay in dhinacyadu isku raaceen baahida loo qabo adkaynta iskaashiga iyo kobcinta xiriirka soo jireenka ah ee labada dowladood ka dhaxeeya.

Kulanka ayaa yimid kaddib hadallo uu jeediyay Safiirka Itoobiya ee Soomaaliya, Suleiman Dedefo, kaas oo ku dooday in ciidamadiisu aysan qayb ka ahayn dagaalkii dhawaan ka dhacay degmada Doolow ee gobolka Gedo.

Danjire Dedefo ayaa xusay in ay jiraan kooxo doonaya in ay si khaldan u muujiyaan dhacdadaas, iyagoo abuuraya dareen xiisadeed oo u dhexeeya labada dal.

Safiirka ayaa sidoo kale sheegay in dowladdiisu magacaabi doonto guddi farsamo oo baaritaan sameeya, si loo ogaado xaqiiqada ka dambeysa dhacdada, iyadoo labada dowladoodna horey uga heshiiyeen muhiimadda baaritaankaasi.

Gobolka Gedo oo haatan ay gacan ku hayntiisa isku hayaan Dowladda Federaalka Soomaaliya iyo maamulka Jubbaland ee uu hoggaamiyo Axmed Madoobe ayaa waxaa ka dhacay dagaallo toos ah oo u dhaxeeya labada dhinac, iyadoo Itoobiya lagu eedeeyay inay qeyb ka noqotay xiisaddan, ayna la safatay maamulka Madoobe.