Suuqa kala iibsigu haatan waa xiran yahay, laakiin ma dhamaadaan wararka xanta ahi, halkaan ka aqriso wararkii ugu dambeeyey ee xanta ahaa ee maanta la isla dhex maraayey.

Xanta tooska ah ee maanta la isla dhex maraayo.

Arsenal ayaa dooneysa inay dalab toos ah u dirto ciyaarayahanka garabka uga ciyaara Crystal Palace Wilfried Zaha, 20-jirkaan ayuu Wegner doonayaa inuu ku daro qorshihiisa weerarka inta lagu jiro Janaayo (Daily Telegraph)

Manchester United ayaa qarka u saaran inay 5 milyan oo ginni looga duufsado 31-jirka garabka bidix ee daafaca ka ciyaara Patrice Evra oo ay dooneyso Paris Saint-Germain, daafacaan ayaa sheegay inuu xiiseynayo inuu ka ciyaaro PSG, hadii ay xidigaan soo dhaqaajin weyso kooxda Faransiiska waxay u jeesan doontaa 27-jirka daafaca bidix uga ciyaara Manchester City Gael Clichy (Independent)

Daniele De Rossi, oo 29 jir ah, ayaa la kulmay saraakiil ka socota Manchester City si ay uga wada hadlaan macquul ahaanshiyaha uu kaga soo dhaqaaqi karo Rome (Talksport)

Laakiin Manchester City ayaa ka haritaankoodii Koobka Kooxaha Yurub ku weyn kara fursad ay kula soo saxiixdaan 29-jirka qadka dhexe ee Rome Daniele De Rossi ama 28-jirka qadka dhexe ee Inter Milan Wesley Sneijder, kaasoo diiday inuu aqbalo in la dhimo mushaarkiisa kooxda (Daily Star)

Tababaraha kooxda Swansea Michael Laudrup ayaa ka digay inay gool dhaliyadooda Michu madaxiisa dul dhigi doonaan 30 milyan oo ginni si ay u heystaan xidiga reer Spian, waa 15 jibaar qiimihii ay xagaaga 26-jirkaan kaga soo qaateen Rayo Vallecano (Daily Telegraph)

Manchester United iyo Arsenal ayaa isku heysta 22-jirka qadka dhexe ee kooxda Montpellier Remy Cabella (The Sun)

Weeraryahanka kooxda Shakhtar Donetsk Fernandinho, oo 27 jir ah, ayaa sheegay inuu Janaayo ka ciyaari doono magaalada Manchester, laakiin xidiga heerka caalami ee dalka Brazil ma uusan sheegin kooxda uu ku biiri doono United ama City (Talksport)

Tababaraha kooxda Stoke  Tony Pulis  ayaa u sheegay kooxaha Barclays Premier League inaysan ciyaartoydiisu iib aheyn. Manchester United iyo Liverpool ayaa xiiseynayeyn 26-jirka daafaca ka ciyaara Ryan Shawcross iyo sidoo kale 25-jirka goolka qabta Asmir Begovic (Daily Star)

Kooxda ka dhisan Ruushka Zenit St Petersburg ayaa diyaar u ah inay Janaayo dagaal madax-ka-madax ah Chelsea kula gasho saxiixa 25-jirka qadka dhexe Everton Marouane Fellaini (Metro)

Tababaraha kooxda Manchester United Alex Ferguson ayaa doonaya inuu dhigiisa Manchester City Roberto Mancini uga adkaado saxiixa laba ciyaaryahan oo diirada u saaran. Agaasimaha United David Gill ayaa u duulay isbuucaan gudihiisa Croatia si uu macluumaad kaga soo helo saxiixa ciyaaryahanka lagu qiimeeyo 15 milyan oo ginni Alen Halilovic, oo 16 jir ah iyo sidoo kale 20-jirka daafaca ka ciyaara Sime Vrsaljko (Daily Mail)

Xanta aan tooska aheyn ee maanta la isla dhex maraayo.

Guul darradii Chelsea ee koobka kooxaha Yurub ayaa kasbi karta inay waayaan 20 milyan oo soo gashay sanadii hore, iyadoo ay horaanba ku dhibaatoonayeen sharciga dhaqaale anaagsan Uefa (Daily Telegraph)

Robbie Savage ayaa sheegay inuu yimid waqtigii ku haboobaa ee uu tababare Arsene Wenger ka tegi lahaa kooxda Arsenal (Daily Mirror)

30-jirka qadka dhexe ee kooxda Arsenal Mikel Arteta, ayaa cadeeyey in ciyaartoyda Gunners uu dhaawac soo gaaray lagana codsaday tababar dheeraad ah waqtiga kalena ay daawadaan kulamadoodii uu ku celis ah (Daily Mirror)

Ma jeceshahay inaad maalin walba la socoto wararka xanta ah ee suuqa la isla dhex maraayo? Naga soo booqo www.caasimada.net, Isha wararka sugan.

Waxaa Diyaariyey: Ahmed Jaangoan

E-mail: [email protected]

Caasimada – Mogadishu.

Kooxaha Arsenal iyo Chelsea ayaa u weecan kara xiisaha ciyaaryahanka qadka dhexe Paris St. Germain Marco Verratti ka dib markii ay Juventus sheegay inaysan saxiixiisan dooneyn, sida uu qoray wargeyska Talk Sport.

Verratti ayaa waayo fiican ka muujinaya PSG bandhigiisa ayaana soo jiitay kooxaha Barclays Premier League.

Labada kooxda ayaa doonaya inay si deg deg ah ula soo wareegaan, maadaama, ay doonayaan inaysan xidigaan ku qabsan kooxda Juventus.

Tababare Carlo Ancelotti ayaa cadaadis ku saaran yahay PSG waxaana laga yaabaa in la ceyriyo, kooxda Paris ayaana lumin karta mid ka mid ah ciyaartoydeeda ugu sareysa kaasoo la sheegayo inay si dhow ula socoto Juventus.

Waxaa Qoray: Ahmed Jaangoan

E-mail: [email protected]

Caasimada – Mogadishu.

Juan Mata ayaa daaha ka qaaday inuu u hiloobay halyeeygii Chelsea Didier Drogba wuxuuna waayitaankiisa ku micneeyey sida ‘Koronto la’aan oo kale’.

Kubad sameeyaha xulka Spain ayaa ka mid ah ciyaartoy Blues ah oo ciyaaray xilli ciyaareedkoodii abid ugu fiicnaa balse wuxuu sheegay in ka tegitaankii Drogba ee kooxda uu ay ku notay mid adag.

Drogba ayaa dhaliyey goolkii barbaraha ay kooxdiisa ku keensatay Allianz Arena markaasoo ay Chelsea garaacday Bayern Munich ayna ku guuleysatay Champions League, wuxuuna kubadiisii ugu dambeysay ee Chelsea shabaqa ku hubsaday goolku laadkii guusha.

Wuxuu si xor ah ugu biiray kooxda Shiinaha Shanghai Shenhua ka hor inta uusan bilaaban xilli ciyaareedkaani.

“Ka tegitaankii Drogba wuxuu inala ahaa sida Korontadu inay naga tagday. Wuxuu ahaa dagaal yahan,” ayuu Mata u sheegay The Sun.

“Waan la qabsanay inaan la’aantiis sababtoo ah wuxuu sanado badan ayuu ahaa mid usoo halgama Chelsea.

“Hadii aan Drogba tababarka la qaadaneyno oo aan la ciyaareyno waa wax fiican.

“Hadii aan kubada siiso waad hubtaa inuu ugu yaraan Laad xor ah ka keeni karo kooxda kaa soo horjeeda.

“Hadii ay dhamaan ciyaartoyda waa weyn kubada helaan, Didier xitta wax badan ayuu ka dhiifoon yahay.”

Waxaa Qoray: Ahmed Jaangoan

E-mail: [email protected]

Caasimada – Mogadishu.

Sir Alex Ferguson ayaa shirqoolanaya bisha Janaayo ugu yaraan laba ciyaaryahan oo diirada u saaran kooxda ay xafiiltamaan ee Manchester City, sida uu qoray wargeyska Sportsmail.

Sportsmail ayaa ogaatay inuu gudoomiyaha Manchester United David Gill Talaadadii u duulay dalka Croatia si uu kooxda Dinamo Zagreb ugala soo hadlo saxiixa da’yarka lagu qiimeeyo 15 milyan oo ginni Alen Halilovic.

Xilli ay kooxda Ferguson dhib ku qabto daafaca, Gill ayaa sidoo kale ka hadlay wax ku saabsan 20-jirka daafaca midig Sime Vrsaljko waxaana laga yaabaa inuu qudhiisu yahay 20 milyan oo ginni waana laba heshiis oo ah ciyaartoyda waqtigaan ugu shidan Croatia.

Gill ayaa Arbacadii kusoo laabtay Manchester, wuxuuna la shiray agaasimeyaasha kooxda ka dib kulankii ay guul darradu kasoo gaartay Cluj, kalsooni ayeyna ku qabaan inay booska kala baxaan lacagaha xoogan ee City.

Ciyaaryahanka sedaxaad ee City diirada u saaran, waa qadka dhexe ee Dinamo Dinamo Mateo Kovacic, sidoo kale Gill ayaa kooxda kala hadlay. United ayaana weydiisay qiimaha xagaaga lagu heli karo laakiin waxaa la dul dhigay 10 milyan oo ginni.

Halilovic, oo 16 jir ah, ayaa horumar ka sameeyey qadka dhexe sida Luka Modric wuxuuna sidoo kale diirada u saaran yahay Real Madrid marka laga tago labada Manchester.

United ayaa xidigaan u jeesatay iyadoo deriskeeda loo sheegay hadal aysan jecleysan kaasoo ahaa inuu Agaasimaha Ispoortiga ee Dinamo Zdravko Mamic, ku yiri: “Waan arkay wararka ay saxaafadu qoreyso ee ah inay City 7 milyan ku dalbatay Alen, laakiin xittaa ma iibiso lacagtaasi lugtiisa bidix.”

Bin Hammam oo horay Kubada cagta looga ganaaxnaa inta ka dhiman Nolashiisa markii ay Maxkamad ku heshay dambi ah inuu Laaluushay oo uu codad gatay bishii July, laakiin Fifa ayaa mar kale ganaax garka u gelisay.

Michael Garcia, oo ah gudiga baaritaankiisa loo xil saaray, ayaa talaadadii sii dhameystiray baaritaanada waxayna Dukumentiyadii u direen Hans-Joachim Eckert, oo ah maxada baaritaanada, Fifa ayaa tiri: “Madaxweynihii hore ee xiriirka kubada cagta Asia Bin Hammam waxaa la siiyey ilaa Janaayo dhexdeeda inuu uga soo jawaab bixiyo warbixinta Ganaaxa. Wuxuu qabay 45 cisho oo ganaax ah, oo ku eg Jimcada, waxaana loo kordhiyey ka dib markii lagu helay eedeymihii loo heystay.

Ka dib markii uu isku deyey inuu tartan la galo madaxweynaha Fifa Sepp Blatter sanadii hore, waxaa lagu eedeeyey inuu isticmaalay Laaluush iyo codad gadasho.

Bin Hammam ayaa laga ganaaxay inta ka dhiman noloashiisa ka dib markii lagu helay dambigaas.

Kooxaha ciyaara Horyaalka Barclays Premier League, Manchester United iyo Arsenal ayaa ku dagaalamaya xidiga qadka dhexe ee kooxda Montpellier Remy Cabella, sida uu qoray wargeyska The Sun.

22-jirkaan, kooxdiisa xilli ciyaareedkii hore ku hugaamiyey Horyaalkoodii ugu horeeyey dalka Faransiiska, ayaa lagu qiimeeyaa 5 milyan oo ginni.

Madaxweynaha kooxda Faransiiska ka dhisan Louis Nicollin ayaa sheegay inuu xidigaani ku socdo wadadii uu kooxda kaga tegi lahaa, wuxuu yiri: “Waxa ay noqon doontaa inaan ka fikirno inaan lacag badan ku iibsano hadii uu naga tegaayo.”

Arsenal ayaa dooneysa inay xidigaan ku xaliso qadkeeda dhexe ee aan fadhin halka Manchester United ay dooneyso inay bedel uga dhigto waayeeladeeda kasii gaboobaya kubada cagta sida Paul Schools.

Waxaa Qoray: Ahmed Jaangoan

E-mail: [email protected]

Caasimada – Mogadishu.

Halyeeyga kooxda Chelsea Didier Drogba ayaa casho sharaf u sameeyey ciyaartoydii Chelsea ee ku guuleysatay Uefa Champions League bishii May, inkastoo uu weerarayahanka reer Spain Fernando Torres xaflada ka maqnaa.

Drogba ayaa soo agaasimay xafladaan ka dhacday Wyndham Hotel oo ku yaala Chelsea Harbour ka dib markii ay kooxdu bishii May si la yaab leh ku hanatay Koobka Kooxaha Yurub, markaasoo ay Bayern Munich garoonkeeda uga soo qaadeen.

Waxaa soo xaadiray ciyaartoydii ay isku kooxda ahaan jireen iyo shaqaalaha kooxda iyadoo lagu bixinaayey xaflada Faraantiyaal si gaar ah loo sameeyey, waxaana lasoo werinayaa inay qiima ahaan ku keceen 800 kun oo ginni.

Weeraryahanka Qaranka Ivory Cost ayaa xafladaan ula dan lahaa inuu ku dhiso niyada ciyaartoyda, ka dib markii ay Blues noqotay kooxdii ugu horeysay ee iyadoo koobka difaacaneysa ku harta wareega Group-yada.

Torres oo ahaa ninkii kooxda u bedelay booskii Drogba ayaa xaflada ka maqnaa, si kastaba wiilkiisa Leo ayaa shalay laba jirsaday waxaana macquul ah inuu arinkaasi sabab u ahaa. Juan Mata iyo Petr Cech ayaa iyana xaflada ka maqnaa.

Drogba ayaa Chelsea ka hayaamay sanadii hore wuxuuna ku biiray kooxda Shanghai Shenhua laakiin kooxda London ayuu kusoo laabtay si uu tababar ula qaato inta ka dhiman African Cup of Nations oo bilaabanaya sanadka cusub.

Halyeeyga Blues ayaa ahaa ninkii dhaliyey Rigooradii guusha ay Munich kaga gaareen Allianz Arena bishii May, wuxuuna kulankaasi ahaa kulankiisii ugu dambeeyey ee uu xirto Funaanada Chelsea.

Waxaa Qoray: Ahmed Jaangoan

E-mail: [email protected]

Caasimada – Mogadishu.

Kadib sanad deganaasho iyo bidhaan nabadeed ah, Muqdisho waxa ay iminka arkeysaa dib u dhis baaxad weyn iyo “Ninkii guri lahow taajir”.

Hase yeeshee, wax kasta oo dhaca waxa ay lee yihiin cirib dambeed, sammaan iyo xummaan midey doontaba ha ahaatee.

Horumarka iyo dib u dhiska Muqdisho ka socdana, waxa uu caqabad nololeed ku noqday dad badan oo magaalada degan, balse dan yar ah.

Ayaga oo u ciil qaba inay hantidooda dhuleed ka taajiraan, ayaa dadka leh guryaha ku yaalla caasimada, waxa ay kumanaan qof oo aan iska bixin karin qiimaha sare ee guryaha ay ku qasbayaan inay ka baxaan guryahooda.

Taa beddelkeeda, waxaa guryaha laga saaro kuwa aan lacagta badan heysan ee qiimaha yar ku deganaa laga iibinayaa kuwa jeebku u weyn yahay ama laga kireynayaa. Taasi kumanaan qof ayay guryo la’aan dhigtay oo xeryaha qaxootiga isku shubay.

Gudaha Muqdisho, qiimihii iyo kirada ayaa laba jibaarmay, sanaddi u dmabeysay.

Gurigii lagu iibin jiray 50 kun oo dollar inti u dhaxeysay 2006 illaa 2011, waxa uu gaaray 100 kun sanadkan 2012 ee dhammaadka ah. Qiimahaasi waxaa la filayaa inuu sii kordho 2013.

“Sanad iyo bar ka hor waxaa macquul ahayd inaan bishii iibiyo wax aan ka badneyn 3 guri, laakin iminka maalin kasta ayaan guri iibiyaa” waxaa sidaas Caasimada Online ku yiri Cabdi Xasan Axmed oo ah dalaal guryaha iibiya.

Waxaa sidoo kale laba laabmay kirada guryaha. Villadii (Dhisme 5 ama 4 qol ah), nooca dhowaanahan la dhisay, oo lagu kireyn jiray ugu badnaan 200 oo dollar, iminka waa 500 oo dollar bishii.

Dhismooyinka ku dhow Garoonka Diyaradaha Aden Caddey, qiimaha intaasi aad ayuu uga sii badan yahay.
Goobaha sidoo kale qaaliga ah, waxaa ka mid ah guryaga ku dhow waddada Makka Almukaramah, oo ay ku yaalaan hoteelo iyo meelo laga dakuumeysto oo qurux badan.

“Tani waxa ay caqabad ku tahay Dowladda, xitaa qaxootiga jooga magaalada waa halis xagga amniga ah” ayuu yiri Cabdixakiim Guuleed oo ah guddoomiye ku xigeenka Guddiga Maareynta Musiibooyinka Somalia.

Sheekooyinka muragada leh waxaa ka mid ah “Ku dul beeca”. Dadka lacagta heysta ayaa sameynaya ficillo aan la mahdin. Waxa ay u tagayaan milkiilayaasha guryaha ayaga oo u sheegaya inay siin doonaan lacag laba jibaar ama saddex jibaar ah, haddii qofka guriga degan ay uga saaraan.

Kumanaan qof ayaa sidaasi looga saaray guriyihii ay deganaayeen oo iminka ku nool xero qaxooti, waayo guri kuma kireysan karaan boqolaal dollar, xilli noloshiiba aysan meel saarneyn.

Lama filayo in xaalkan uu soo wanaagsanaado. Sida xaalka iminka uu ku socdo, Muqdisho waxaa nolosheeda ku hari doona kaliya qofkii guri leh, ama mid taajir ah oo lacag badan heysta.

Wareysiyada iyo xogta warbixintan waxaa soo ururiyay Weriyaha Caasimada Online ee Muqdisho, waxaana qoray Tifaftiraha Caasimada Online Axmed Cali Sheikh.

Jaamac waatii la yiri Gabadha meel kusoo ogoow, wuxuuna ku fakaray inuu habeen u tago maadaama fursadu u diiday maalintii.

Habeen mugdi ah ayuu tegay gurigii reerka Safiya, laakiin marmarsiyo ayaa loo helay maadaama uu daadshay Labeentii ay Gabadhu dooneysay inay berri [Subixii] ku subkato.

Safiya ayaana inta ku kacday shanqartiisa tiri: “Jaamac ma labeenta ayaad caano mooday oo aad cabi rabtay?”

Waala kululeystay Jaamac, wuxuuna kala garan waayey halka uu joogo maxaa kugu saladay Labeentaan ayey ka taagan tahay, ciil dartiis yaamar kusoo celiya wuu is leeyahay laakiin ma noqoneyso waxayna u ekaatay: “Ciyaar maxaa loo tumaa habeenkii hadii aan qiso laga laheyn”

Micnaha, maxaa labeentaan banaanka dhigay oo loo gelin waayey Bowdka xerada ariga ama Edega waxaraha hadii aan wax laga damacsaneyn, waxaa niyada uga jirta in falkaan loogu talo galay, laakiin ma ahan ee waa wax isku soo aaday.

Wuxuu sameeyey la tashiyo kale wuxuuna u tegay odayaal kale isagoo leh: “War sidaan kusoo xero geliyaa gabadhaan?”

Waxaa talo lagu soo siiyey inuu maalin uun ugaarsi aado uuna gabadha u keeno hilib Cowl ama wax u dhigma una sheego inay maqaarka Cowlka ka sameyso Ceyn Owrta lagu dhaansho, si ay ugu aragto inuu yahay nin ku fiican Ugaarsiga maadaama dadku reer guuraagu ku kala fiican yihiin Ugaarsiga, tan kalena Ceynku uu yahay wax aysan gabar walba sameyn Karin uuna xujo uga dhigo.

Laakiin waa kasoo baxday Safiya xujadaas Ceynkiina sameysay waa gabadhii la oran jiray: “Shan ka roon”

Galab goor ay cadceedu sii gaabaneyso ayuu Jaamac jid uga soo dhacay Safiya oo ari ka goosmay wuxuuna  ku yiri: “Ariga ma kula goobaa?”

Waxay ku tiri: “Haa, ila goob waayo meeshaani waa meel hili-qaaq ah [Laga kala guuray]”

Waa uu la raadshay wuxuuna habeenkaas ku helay fursad fiican oo uu wax uga dhaadhiciyo laakiin iyada ahaan, warkaasi kuma socone Ariga ayaa u darnaa, isna mood inuu dari helay.

Cidii ayaa guurtay maalinkii dambe wuxuuna maagay inuu cidda wax ka raro maadaama uu yahay nin dan leh.

Wuu ka raray laakiin wuxuu arkayey inaysan gabadhaani dhinciisa usoo jeedin.

Cidii markii la furay ayuu galab ugu yimid iyadoo Subkaneysa wuxuuna u sheegay inuu doonayo inuu guursado, wax walbana uu diyaar ula yahay, laakiin gabadhaan waxay dooneysaa inay aduun kale soo aragto Jaamac uguma baxdo.

Naq degii dambe ayaa gabadhii nin kale haasaawe la sameysay waana nin qanciyey iyada ahaan, Jamaal iyo Joog leh laakiin aan u xoolo badneyn sida Jaamac.

Ahkristeyaal halkaas ha inoo joogto qeybtii Labaad ee sheekadii la magac baxday Jaceylkii baadiyo beled miyuu I biday?

Waxaa Diyaariyey: Ahmed Jaangoan

E-mail: [email protected]

Muqdisho (Caasimada Online) Shir ay maanta isugu yimaadeen Golaha Wasiiradda oo uu shir-guddoominayey Ra’iisul Wasaaraha Xukuumadda Federaalka Soomaaliya Mudane Cabdi Faarax Shirdoon “Saacid” ayaa looga hadlay arrimo dhowr ah oo ay ka mid yihiin Ganacsiga iyo adkaynta Amniga.

Ugu horayntii Ra’iisul wasaaraha ayaa ka warbixiyey booqashadii uu shalay ku tagay cirifyada magaalada Muqdisho isagoona u kuur galayey xaalada Amniga iyo sidii loo xoojin lahaa dadaalkii looga sifeeyey Isbaarooyinka goobo badan oo ku yaala Caasimadda.

Sidoo kale golaha ayaa ka dooday sidii loo howl galin lahaa Maxjarka Xoolaha ee ku yaala degaanka Al-jaziiro halkaas oo ganacsato Soomaaliyeed ugu diyaarsheen Xoolaha Dalka laga dhoofinayo dhamaan agabyadii ay u baahnaayeen sida Naaxinta, Baarista Caafimaadkooda, iyo Cawskii lagu calfin lahaa mudadda ay safarka sii yihiin. Maxjarkan ayaa ah kan kaliya ee ku yaala Bartamaha iyo Koonfurta Soomaaliya waxaana ay bilaamaysaa xoolo dhoofintu 31 bishaan.

·   Goluhu waxay isku raaceen in la sameeyo gudi ka kooban shan Wasiir oo kala shaqeeya gacanstada dhoofinaysa Xoolaaha sidii ay ugu fududaan lahayd howlahooda shaqo. Waxaana gudigaas ka mid ah Wasiirka Arimaha Gudaha iyo Amniga Qaranka, Wasiirka Maaliyadda, Wasiirka Howlaha Guud, Wasiirka Ganacsiga iyo Wasiirka Khayraadka Dalka Mudane Cabdirisaq Cumar Maxamed oo ah Gudoomiyaha Gudiga.

·   Sidoo kale Golaha ayaa isku raacay in laga bilaabo maanta aan laga ganacsan karin qalabka ciidamadda sida, Hubka noocyadiisa kala duwan, Rasaasta, Tuutaha, Booshashka iyo dhamaan qalabka ay isticmaalaan Ciidamadu.

Ugu danbayntii Golaha ayaa Amaan u soo jeediyey shacabka sida ay ugu heelan yihiin is bar-bar taaga dowladooda iyagoona ku tilmaamay in wada shaqayn dhex marta shacabka iyo dowlada ay tahay tan kaliya oo lagu sugi karo amniga.

Akara (Caasimada Online)  Madaxweynaha Waddanka Turkiga Cabdalla Guul ayaa Arbacadii sheegay in dalkiisa uu ballaarin doono taageerada lagu bixinaayo dib-u-dhiska Sooomaaliya.

Madaxweynaha ayaa hadalkan ka sheegay shir jaraa’id oo ay wada qabteen isaga iyo dhiggiisa Soomaaliya Xasan Sheekh Maxamuud oo hadda booqasho rasmi ah ku jooga waddanka Turkiga.

Madaxweyne Guul ayaa yiri Waxa la dhisi doonnaa kaabayaasha muhiimka ah, si calaamad wanaagsan ugu noqoto beesha caalamka.

Wuxuu kaloo caddeeyay xiriirka Soomaaliya iyo Turkiga in si weyn loo xoojin doono.

“Soomaaliya waa cusub ayaa u bilowday” ayuu yiri Guul

Turkiga door weyn ayuu ka qaatay markii abaaraha ka dilaaceen koonfurta Soomaaliya sannadkii hore, waxa soo booqday Muqdisho ra’iisal wasaaraha Turkiga Recep Tayyip Erdogan , xiriirka labada dalna halkaas ayuu si fiican uga xoogeestay.

“Turkiga Soomaaliya waxay ku lee yihiin Safaarad, sidoo kale diyaaradda Turkish Airlines  waa diyaaradda kaliye ee caalami ah oo duulimaad Muqdisho sameesa” sidaas waxa yiri madaxweynah.

Madaxweyne Guul ayaa intaas ku daray in 1,600 oo arday Soomaali ah a iyo kuwa Jaamacadaha ka soo baxay ay hadda wax ku bartaan waddanka Turkiga.

Madaxweynaha ayaa daaha ka qaaday in Turkiga uu gacan weyn ka geesan doono siddii dib loogu soo dhisi lahaa waaxyaha Bilayska iyo Millatariga Soomaaliya.

Turkiga iyo Soomaaliya ayaa kala saxiixday heshiis ku saabsan dhinaca ciidamada oo ka dhexeya labada waddan.

Caasimada Online 

Xafiiska Wararka Ankara