Shirkii ay isugu yimaadeen wasiirada arimaha dibada ee dalalka Islaamka ee ku bahoobay Ururka iskaashiga islaamka ayaa si rasmi ah waxaa loogu soo gabagabeeyay Magaalada Jabuuti ee dalkaasi Jabuut,iyadoona laga soo saaray qodobo badan oo inta badan wax loogu qabanayo arimaha wadamo badan ay Soomaaliya ay ka mid tahay sidii loo taageeri lahaa.

gabagabada Shirka oo ay ka hadleen Mas’uuliyiinta shirka ka soo qeyb gashay ee ka socday wadamada Islaamka ayaa waxa ay dhamaantood cod iskuwada mid ah ay ku taageereen dowlada Soomaaliya islamarkaana ay balan qaadeen in Soomaaliya dhan walba laga taageerayo oo ay tusaale u soo qaateen dhaqaalaha Soomaaliya oo meel hoose maraya iyo in la caawiyo dowlada cusub ee iminka la dhameystiray sidii ay ugudan lahayd waajibadka horyaala.

Kulankaan oo mudo saddex cisho ah socday islmarkaana looga hadlayay amuuraha wadamo badan oo Soomaaliya ay ka mid tahay ayaa waxa la isla afgartay in Ururka iskaashiga islaamka uu taageero aan loo kala harin bixiyaan si ay u fududaato in Soomaaliya markale cagaheeda ay ku istaagto.

shirka inta uu socday waxaa hadalo ka jeediyay Mas’uuliyintii kala duwaneyd ee madasha kulanka ka soo qeyb gashay,waxa ayna dhamaantood ka sinnaayeen inay caawinayaan Soomaaliya.

Dowlada Soomaaliya ayaa waxaa kaga qeyb galay shirkaasi wasiirada arimaha dibada ahna Raysal wasaare ku xigeenka Marwo Foosiyo xaaji Yuusuf Aadan,taasi oo madasha kulanka ka sheegtay in loo baahan yahay in la caawiyo dowlada Soomaaliya ee hada hana qaaday.

Wararka  Madaxtooyada villa Somaliya laga helayo ayaa waxa uu soo sheegayaa in xaflad xilalka ay ku kala wareegayaa wasiiradii hore iyo wasiiradii cusub ee xukuumada Somalia ay ka dhacay.

Goordhow waxaa lasoo gaba-gabeeyey xil wareejintii wasaaradii qorsheynta waxaana wasiirkii hore ee wasaarada qorsheynta iyo xiriirka Caalamiga ahaa waxa uu ku wareejiyey wasiirka cusub ee wasaarada Maaliyada iyo Qorsheynta Qaranka Maxamuud Xasan Suleymaan Cawil.

Cabdulaahi goodax bare oo ah Wasiirkii hore ee wasaarada qorshaynta iyo Xirirka Caalamiga ayaa waxaa uu si rasmi u sheegay in xilkii uu ku wareejiyay Wasiirka Cusub ee wasaaradaas.

Waxaa uu sheegay inay waxbadan soo qabteen intii ay xilkaas ay hayeen.

Sidoo kale waxaa Xaflad xil kukala wareegid ay ka dhacday madaxtooyad Vila soomaaliya halkaas oo ay kukala wareegayeen wasiirkii hore ee Maaliya iyo wasiirka Cusub Maxamuud xasan Suleymaan waxaana ku warejiyay xilkaas wasiiru dowladaha wasaarada maaliyada.

Waxaa iyana ka soconeysa Dugsiga tababarka ciidamada Booliska Somaliyeed Janeral Kaahiyey (Iskool boliisiyo) munaasabad xilalka ku kala wareegi doonaan wasiirkii hore ee arimaha gudaha iyo amniga qaranka iyo wasiirka cusub.

Falastiin iyo dilka ku dhacay dad aan waxba galabsan oo haddana ‘aan isdifaaci karin, muslimna ah. Ayaan ka tiriyay tixdan.

Falastiin Dhibaatiyo waxii dhaawac loo gaystay

Dhalinyariyo waayeel waxaan midna la’dhaafaynin

Dhamaantood Haweenkii ubadkii la’dhaafsiiyay

Dhalaankiyo caruurtuba waxay wada dhaqaaysay

Dhaayahooda sharafta leh waxay ilini Soo dhaaftay

Dhar la’aan waxay haysato dhaxani ay goysay

Dhiiliyo colaad loogu daray baladii loo dhaanshay

Dhalanteed wax loo laayay oo dhuuni loo diiday

Dhulka oogadiisana dhiigoodu badi qooyay

Dhurwaagii Yuhuudigu waxuu dhacayay ciidooda

Dhamaan reer galbeedkuna, dhacan garab ku siinaayay

Dharaartiyo habeenkaba waxay Qudus dhibaatootay

Dhulkan aan ku noolahay naxdini way ka dheertahaye

Dhugta oo bal daya, bariga dhexe dhool ayaa da’aye

Afartaa dhambaal aan u diray dhibir-fayow uun dheh,

Afarkalana waa mid’aan dhacdadan samir ku dhaafsiiyay

Dhafoorkaygu wuu taagmayoo waan ka dhiidhiyaye

Dhambaal baan ka qorayaa, dulmiga dhaayahay aragye

Dhanka Eebahaybaan baryada dhaaxo joogtayne

Dharaartiyo habeenkaba qalbiga waan ku dhigayaaye

Dhursugaay qiyaamaa dhawoo maalinbaa dhigane

Afartaa dhambaal aan u diray dhibir-fayow uun dheh,

Afarkalana dhaliilaha jiraan soo banana dhigiye.

Dhaayahaan idiin saarayaa dheygag loo go’aye

Dhiciskaba intii loo socdaa noloshu dhaaftaaye

Inkastoo islaamkaba dhamaan, Dhiilo wada gaadhay

Dhalashada kuwii ugu xigaa looga soo dhacaye

Dhedig kuwo la’moodaa ku sugan dhinacyadoodaase

Dhuglaawayaashaa carbeed, way dhutinayaane

Dhaqaaliyo markuu Eebahay Dheeman wada siiyay

Dhamaantood barwaaqada aduun dhuunta loo galiyay

Dhaqashiyo inay sii badshaan dheesha mooyaane

Dhuganwaaye falastiin dhibkiyo, dhiifta lagu reebay

Dhacdadii la’yaablehi Naflahay dhaxal u reebtaye

Dhoohane haduu jiray waqtiga waa dhursugaynaaye

Allahayow dhibaatada ka saar, duul kalaa dhibaye.

W/T:  Abdihakim Herer

Chelsea ayaa diiradu u saaran tahay xidiga Fiorentina, kaasoo horaan iska diiday inuu ku biiro Manchester United. Sida uu qoray wargeyska Caught Offside.

Tababare Roberto Di Matteo ayaa isha ku haaya weeraryahanka da’yarka ah ee reer  Serbia Adem Ljajic, wuxuuna ku darsaday liiska uu Janaayo suuqa ka raadsan doono. Sida uu sheegayo wargeyska Talyaaniga kasoo baxa ee Calciomercato.com, halka ay Chelsea wakiilo daawada u dirtay weeraryahanka kale ee isna da’da yar Stevan Jovetic, kaasoo laga yaabo inay soo dhaqaajiyaan Janaayo.

Ljajic ayaa awoodiisa iyo xirfadisa kusoo bandhigaayey Serie A, wuxuuna kooxdiisa u ahaa mid ay ku tashtaan weeraryahakaan tayada leh.

Delio Rossi, oo ah tababarihii hore ee Fiorentina, ayaa da’yarkaani ka dhaawacmay intii lagu jiray kulankii ay la ciyaarayeen Novara, 21 jirkaan Ljajic ayaana maareeye ka ahaa goolal Fiorentina ah.

2010kii ayuu weeraryahanka Serbia u dhowaa inuu ku biiro Manchester United laakiin heshiiska ayaa burburay daqiiqadii ugu dambeysay. Wuxuuna u saxiixay kooxda Talyaaniga ah ee Fiorentina, oo 6.5 kaga soo iibsatay Partizan Belgrade, Manchester United ayaana wax badan taageerayaasheedu ka welwelaayeen xidigaan tayada leh ee gacmahooda ka baxsaday, wuxuuna 5 gool u dhaliyey 59 kulan oo uu u saftay La Violas.

Xiisaha Chelsea ay u heyso Ljajic ayaa wax dhib ah ku imaan doonin, hadii aysan sidii Manchester United oo kale wax iska qaldin.

W/Q: Ahmed Jaangoan

E-mail: [email protected]

Caasimada — Somalia.

Arsenal ayaa diyaar u ah inay Liverpool u dirto dalab ay Theo Walcott iyo sideed milyan oo ginni kaga dooneyso xidiga da’da yar Raheem Sterling.

Gunners ayaa maaro u weysay inay qandaraas cusub ka saxiixato Walcott, oo kooxda gadood ka ah.

“Waa muhim inaad ciyaaryahankaada muhimka ah mar walba ceshto laakiin hadii ay dhacdo inaan Walcott iibino, waxaaan ku bedeli doonaa ciyaaryahan, magac weyn leh.” ayuu yiri tababare Arsene Wenger.

Wadahadlo ayaa bilihii dhowaa u socday 23 jirkaan garabka ka ciyaara ee dalka England iyo kooxdiisa Arsenal.

Waxaana la dareensan yahay inay Arsenal Walcott ka dhaadhicin weysay inuu isbuucii Emirates Stadium ka qaato 90 kun oo ginni.

Wararka ayaa intaasi ku daraya in xitta loo gaaray ku dhowaad 100 kun isbuucii inuu mushaar ahaan u qaato, halka uu Walcott doonayey inuu ogaado in Wenger uu ka ciyaarsiinayo booska gool dhaliyaha.

Walcott ayaa ku jiraa sideedii bilood ee ugu dambeysay qandaraaskiisa wuxuuna si xor ah wixii ka bolowda 1da Janaayo ula hadi karaa kooxo kale.

Dhanka kale, Sterling oo 17 jir ah kuna jira 18kii bilood ee u dambeysay qandaraaskiisa Anfield ayaa ah qofka wadahadaladaan lasoo dhex gelinaayo.

Tababaraha Kop Brendan Rodgers ayaa doonaya Walcott laakiin ma uu rabo inuu lumiyo Sterling.

Wuxuu noqday mid ka mid ah ciyaartoydii ugu da’da yaraa ee u safta xulka England markii uu kulankiisii ugu horeeyey u ciyaaray ciyaartii isbuucaan ee Sweden.

Tageerayaasha Arsenal ayaa hadana waxaa ka tegaaya isku xire kale.

Wnger ayaa ku daray: “Haa, Taageerayaashu qaati ayey ka taagan yihiin. Miyaad u maleysaa inaanan qaati ka taagneyn?

“Waxaan doonayaa inaan heysto ciyaartoygeena ugu fiican. Maalin walba waxaan la hadlaa Theo laakiin hal maalin maahan qandaraaskiisu.”

W/Q: Ahmed Jaangoan

E-mail: [email protected]

Caasimada — Somalia.

Warsaxaafadeed ka soo baxay Xafiiska Madaxweynaha Soomaaliya Prof Xasan Shiiq Maxamuud ayaa halbalyo loogu diray oo ku qotonta guusha uu gaaray Xi Jinping noqday hoggaamiyaha cusub ee Shiinaha.

Anigoo ku hadlaya Magaca shacabka soomaaliyeed iyo dowlada soomaaliya waxaan aad ugu faraxsan nahay halkana hanbalyo ugu direynaa Hogaamiyaha iminka talada qabtay ka dib ee Xi Jinping,waxaana u rajeyneynaa guul iyo hormar,waxaa sidaasi warsaxaafadeedka ku sheegay Madaxweynaha soomaaliya.

Sidoo kale madaxweynaha soomaliya ayaa hadalkiisa waxa uu intaasi ku daray in uu ku kalsoon yahay hogaamiyaha cusub ee dalka shiinaha uu yeeshay in hormar ka dheer kuwii hore ee wadanka soo maray uu la imaannayo Xi Jinping oo hada noqday hogaamiyaha cusub ee dalka shiinaha.

Madaxweynaha soomaaliya Pro Xasan shiiq Maxamuud oo wakiil ka ah shacabka soomaaliyeed iyo xukuumada soomaaliya ayaa isagoo ka hadlaya hanbalyada uu u diray Xi Jinping ayaa sidoo kale waxa uu tilmaamay in dowlada shiinaha iyo soomaaliya uu ka dhaxeeyo xariir saaxiibtinimo oo soo jiraan ah,waxa uuna dhanka kale uu shaaca ka qaaday in uu sii socon doono xariirkaasi.

Waxa uuna madaxweynha oo ku dheeraaday u hanbalyeynta hogaamiyaha cusub ee ku guuleysatay hogaanka dalka waxa uu hadalkiisa ku soo gabagabeeyay in la xoojiyo xariirka saaxiibtinimo ee u dhaxeeya soomaaliya iyo shiinaha,

Kooxda hoose ee hoggaanka dalka Shiinaha, ayaa waxa lagu soo koobay toddobo xubnood, kuwaasi oo dhan ka mid ah yihiin kuwo cusub.

Mr ayaa haatan waxa uu la wareegay aqalka weyn ee shiinaha lagaga aramiyo eek u yaala Bijiin,ka dib markii uu la wareegay jagooyinka sarsare ee Xisbiga iyo militeriga awoodda badan ee Shiinaha.

Roberto Di Matteo ayaa doonaya inuu arko Frank Lampard oo xirfadiisa kusoo afjaraya Chelsea. Wuxuuna tababaraha Blues sidoo kale ku qalqaalinayaa Ashley Cole inuu joogo Stamford Bridge.

Labada ciyaaryahan ee heerka caalami ee dalka England ayuu waxaa xagaaga ka dhacaaya qandaraaskooda kooxda ka dhisan Galbeedka London.

Daafaca dambeedka bidix, waa 31 jir, wuxuuna diirada u saaran yahay tababarihiisii hore Carlo Ancelotti oo haatan leyliya Paris Saint-Germain, inkastoo ay Chelsea ka dalbatay hal sano oo qandaraaska loogu kordhinaayo.

Laakiin Lamps, waa 34 jir, welina lagama dalban wax heshiis ah, wuxuuna Super Frank sheegay inuu ka welwelaayo arinka.

Kooxda Shiinaha ka dhisan ee Guizhou Renhe ayaa wadahadal la furtay Lampard, kaasoo Chelsea kula guuleystay sedax horyaal oo Premier League ah. Afar FA Cup, afar League Cup iyo Uefa Champions League intii lagu jiray 12kii sano ee uu la joogay Blues.

“Wey ogyihiin inaan anigu jeclahay inay sii joogaan. Waa ciyaaryahano cajiib ah kuwaas oo mar walba noogu ciyaara heerka ugu sareysa,” ayuu yiri Di Matteo.

“Waan sameynayaa wax walba oo aan halkaan kula sii ilaashan karo.

“Waxaa jira had iyo jeer warar ku saabsan Frank. Wararka xanta ahi waxay sheegayeen inuu u socdo sidoo kale MLS [Horyaalka Mareykanka].

“Waxaan ku rajo weynahay inaan qandaraas cusub ka dalbano. Laakiin midaasi waxay ka dhexeyneysaa kooxda iyo ciyaaryahanka inay isku raacaan.

“Laakiin kuma qanacsani sida ay wadahadaladu u socdaan laakiin hadii ay labada dhincac is afgartaan, Frank wuu nala sii joogi doonaa.

“Wuxuu Chelsea u ahaa horjooge mudo 10 sano ah, marka waxaan jeclaan lahaa inuu halkaan kusoo afjaro xirfadiisa ciyaareed.

“Sidoo kale Ashley, kuma qanacsani inuu la hadlo kooxda Faransiis ah, sidaas darteed ma hubo inuu u dhaqaaqo Paris!”
W/Q: Ahmed Jaangoan

E-mail: [email protected]

Caasimada — Somalia.

Weeraryahanka kooxda Real Madrid Cristiano Ronaldo ayaa qirtay inuu u xiisay tababaraha kooxda Manchester United Sir Alex Ferguson, 70 jirkaan ayuuna ku sheegay aabihiisa kubada cagta.

27 jirkaan ayaa hada ka hoos ciyaara tababare Jose Mourinho oo maamula Santiago Bernabeu ka dib markii uu lacag rikoor ah Old Trafford uga dhaqaaqay 2009kii oo gaareysa 100 milyan oo euro.

Inkastoo uu xilli ciyaareedkii lasoo dhaafay La Liga ku hugaamiyey los Blancos uuna 46 gool u dhaliyey 38 kulan oo horyaalka ah, kabtanka xulka Portugal ayaa sheegay inuu aad ugu xiisay Alex, ka dib markii uu sedax sano ka hor isaga tegay Manchester.

“Ferguson wuxuu ii yahay qof Fantastic ah. Waana qof bini’adam ahaan fiican. Wuxuu I baray wax badan,” ayuu Ronaldo u sheegay The Sun.

“Sidii aan hada ka hor iri, wuxuu iila mid yahay aabaheyga kubada cagta. Run ahaantii waan u xiisay xiriir fiican ayaana igala dhexeeya.”

W/Q: Ahmed Jaangoan

E-mail: [email protected]

Caasimada — Somalia.

Weeraryahanka kooxda Atletico Madrid Radamel Falcao ayaa ka hadlay dareenkiisa ku wajahan Chelsea, isagoo sheegay in kooxda heysata Champions League ay awoodo wax waliba.

Goal.com ayaa isbuucaan ogaatay in Chelsea ay wadahadalo heshiis ay kula saxiixaneyso oo 60 milyan ah Janaayo kusoo qaadaneyso weeraryahanka reer Colombia, wuxuuna amaan kala dul dhacay kooxda ka dhisan Stamford Bridge, isagoo sheegay in halyeeygii Blues Gianfranco Zola uu yahay ninka uu ku daydo.

“Kama walwalayo ciyaarta xooga ku dhisan ee horyaalka Premier League” ayuu Falcao u sheegay Daily Mail.

“Waxaan goolal kasoo dhaliyay Argentina, Portugal iyo haatan Spain. Kalsooni ayaan ku qabaa inaan la qabsan karo horyaal kasta. Waan soo dhaweyn lahaa inaan ku tartamo Premier League.

“Waxaan daawanayay Premier League waqti dheer. Waxaa yaal tayo badan, waana horyaal xiiso leh. Dabcan waa iska fiican tahay inaan ku fekero inaan ka ciyaari karo.

“Chelsea waa horyaalka yurub, wax ka badan oo la dhihi karo ma jirto. Xitaa ka dib markii ay ku guuleysteen Champions League waxa ay la soo wareegeen ciyaartoyda ugu tayada fiican. Hamigooda waa cad yahay.

“Sidoo kale waxaan taageero weyn u ahaa weeraryahankii hore ee Chelsea Gianfranco Zola markii aan soo korayey.”

W/Q: Ahmed Jaangoan

E-mail: [email protected]

Caasimada — Somalia.

Saddex ka mid majsidyada ugu da’da weyn caalamka ayaa lagu wadaa in la bur buriyo, ayada oo Saudi Arabia ay balaayin dollar dib u habeyn ugu sameyneyso goobta labaad ee ugu barakeysan islaamka.

Howsha laga qabanayo Masjidu an-Nabawi ee magaalada Medina, halkaasi oo uu ku aasan yahay sharaf badne Nebiyullahi Muxammed NNKH, ayaa lagu wadaa inay billaabato dhammaadka bisha soo socota.

Marka howsha lasoo geba gebeeyo ayaa Masjidka waxa uu noqon doonaa dhismaha ugu ballaaran caalamka, oo qaadi kara 1.6 milyan oo qof.

Si kastaba, walaacyo xoogan ayaa laga muujiyay in horumarka lagu sameynayo masjidka uu horseedi doono in goobo taariikhi ah oo ka tirsan Masjidka la bur buriyo.

Inta badan ballaarinta masjidka ayaa ka dhici doonta dhinaca galbeed ee masjidka, oo ay ku yaalaan khubuuraha Nuurkii Islaamka Nabiyullahi Muxammed NNKH iyo asxaabu Rasulillahi Abu Bakar Sadiiq (RC) iyo Cumar Bin Khadab (RC).

Meel dibedda ka ah dhinacan Galbeed, waxaa sidoo kale ku yaalla Masjidyo loo hibeeyay Abu Bakar iyo Cumar iyo sidoo kale Masjidka Qamama, oo laga dhisay goobtii Kor ahaayee Nabi Muxammed NNKH uu ku dujiyay ciidii ugu horeysay.

Dowladda Sucuudiga weli ma aysan shaacin qorshaheeda iyo in Masjidyadaasi ay meel kale u rari doonto ama halkooda lagu dhaafi doono.

“Cidna Ma diidana in Masjidka Madina uu u baahan yahay ballaarin, hase yeehsee habka dowladda ay arrinta u wajaheyso ayaa walaac ah” ayuu yiri Dr. Ifran Al-Calawi oo ka tirsan hay’adda Islamic Heritage Research Foundation.

“Waxaa jira habab kale oo oo looga fogaan karo in la bur buriyo goobaha taariikhiga ah, intii dhammanatood dhulka lala simi lahaa” ayuu yiri Calawi.

Masjidyada Mekka iyo Medina ayaa la xarbinaya inay qaadaan muslimiinta tirada badan ee sanad kasta imaneysa. Sanadkan waxaa booqatay 12 Milyan oo qof, wxaaana la filayaa in tiradaas ay gaarto 17 Milyan sanadda 2025, haddii eebe nagu simo.

Boqortooyada Saudi Arabia waxa ay aaminsan tahay inay mas’uul ka tahay arrintan, sidaa darteedna waxa ay sheegtay inay sameyn doonto wax kasta oo macquul si loo ballaariyo labada masjid.

Dadka u doodaya in la ilaaliyo goobaha taariikhiga ah ee ku dhex yaallla Mekka iyo Medina ayaa sheegaya in mar kasta oo dib u ballaarin lagu sameynayo labada masjid ay meesha ka baxaan meelo badan oo taariikhi ah.

Waxaa la rumeysan yahay in 95% goobihii asalka iyo taariikhiga ahaa ee labada Masjid la bur buriyay, 20-kii sano ee lasoo dhaafay, markaasi oo ballaarin badan lagu sameeyay labada Masjid ee barakeysan.

Tusaale goobihii lagu bur buriyay Mekka waxaa ka mid ah bartii uu ku dhashay Suubane Nebiyullahi Muxammed NNKH oo laga dhigay maktabad iyo gurigii ay lahaan jirtay xaaskiisa Hooyada mu’miniinta Khadiijah oo loo beddelay meelo lagu weysaqaato, sida ay sheegeen dadka u doodaya in la ilaaliyo goobaha taariikhiga ah.

Dowladda waxa ay difaacday tallaabooyinkeeda, sababtoo ah bay tiri “Waa lagama maarmaan si dadka tirada badan loo qaadsiiyo Masjidyada”.

W/Q: Axmed Cali Sheikh

Tifaftiraha Caasimada Online

www.facebook.com/alaxmed     

Safiirka Somalia u fadhiya Kenya Mohamed Ali Amerika ayaa loo aqoonsaday Wadaniga iyo Diblomaasiga Sanadka ee Somalida kadib markii uu labadii sano ee la soo dhaafay ku guuleeystay difaacida iyo waxqabashada Somalida ku nool Kenya ,sida Ganacsatada iyo qaxootiga.

Ganacsatada Somalida Kenya iyo Jaaliyadda ayaa si wadajira xaflad ay ku taageerayaan Safiirka waxay ugu qabteen Nairobi taas oo lagu baahiyay Internet-ka.

Sababaha kor u qaaday sumcada Safiir Amerika waxaa ugu weyn :-

1-Sida uu mar walba uga warqaba qaxootiga Somalida ee ku jira xeryaha Qaxootiga Kenya iyo kuwa jooga Islii Nairobi.

2- Sida uu mar walba u difaaco Ganacsatada Somalida ee Kenya ku nool.

3- Safiirka oo noqday diblomaasigii ugu horeeyay guud ahaan Somalida wax uga qabto hab ka fog qabyaalada taas oo qasabtay in beesha uu ka dhashay ee Hawiye ku eedeeyaan inuu dadka u dhashay beesha Daarood mar walba difaaco.

4- Safiir Amerika wuxuu si cad uga soo horjeestay qorshaha Kenya ku dooneyso inay ku dhaawacdo madax banaanida Somalia, ayada oo maamul ay wadato u dhiseysa Gobollada Jubbooyinka, kana tallaabsaneysa Dowladda Somalia.

Inkastoo Mohamed Ali Amerika noqday Diblomaasiga iyo Wadaniga Somalida ee sanadka hadana waxaa bulshada Soomaaliyeed looga baahan yahay in qofka sida Amerika u dadaalo la garab istaago si dhiirigelin loo siiya maxaa yeelay waxaa hubaala in Safiir ka hoowlgala Kenya ka hadli kari lahayn xaalada Kismayo iyo danaha Kenya ka leedahay Jubooyinka.

Gudoomiye ku xigeenka Baarlamaanka Kenya Farah Macalin ayaa si cad wuxuu u caayay uguna hanjabay Safiir Amerika, mar uu Wareysi siinayay Radio Ogaal ee Magaalada Toronto.

Kelya adeega Wadaniyadeed ee Ali Amerika markii Dowladaha shisheeye loodin waayeen waxay ugu dambeyn ku kiciyeen kuwa Somalinimada kala weyn tahay sandareero la siiyay iyo qabyaalad.

Wasiirka Arrimaha dibada ee Turkiga oo Muqdisho khudbad ka jeediyay ayaa si maldahan ula hadlay Cadawga Somalia ee Kenya hada ugu horeeysa wuxuuna ku yiri ” Cadawgiina u sheega inaad aheyn 10 Milyan balse aad tihiin 10+75 Milyan oo Turkisha, mar walbana ogaadana in Somalia tahay dalkeyga labaad idinkuna Turkiga idiin yahay dalkiina labaad”

Si kastaba ha ahaatee, Qofkasta oo Somali dhaba waa inuu adeegsado halku dhiga caan baxay ee SOMALIA SOMALI BAA LEH”.

Waxaa  Gobolka Minnesota ee dalka Mareykanka ka amba baxay ciyaartooy ka mid noqday  xulka Qaranka Soomaaliyeed, kuwaasi oo ku sii jeeda Magaalada Kampala ee dalka Uganda, halkaasi oo ay uga  qeybgeli doonaan tartanka  bariga iyo bartamaha Africa ee ka furmaya Magaalada Kampala.

Xulka Kubadda Cagta Qaranka Soomaaliyeed ayaa la rajeynayaa in uu natiijo wax ku ool ah ka soo hooyo tartankan bacdamaa ay xulka qaranka lagu soo daray ciyaartoy leh xirfad sare oo dhinaca Kubadda Cagta ah.

Qabanqaabiyaha ciyaartooydan u amba baxday ka qeybgalka tartanka bariga iyo bartamaha Afrika Macallin Cabdi Shukri ayaa sheegay inay hawl adag aheyd in ay diyaariyaan ciyaartoy u ciyaarta xulka qaranka Soomaaliya, kuwaasi oo dalka dibaddiisa ku koray, wuxuuse sheegay in ay taasi nasiib wanaag ku guuleysteen.

“Ugu horreyntii waxaan u mahad celinayaa  macallinka ciyaartooydan Mohamed Ahmed (Carab) oo waqti badan galiyey iyo xiriirka kubadda cagta Somalia gaar ahaan Abdiqani Saciid Carab iyo Macalin Geelle” ayuu yiri Macallin Cabdi Shurki.

Macallin Shukri oo hadalkiisa sii wata ayaa intaas ku daray in howshan uu qabtay ay gacan ka siiyeen rag Isboorti oo ay ka mid yihiin Cabdicasiis Mahdi,  J. Blue iyo dhammaanba Bahda Isboortiga ee had iyojeer  jecel horumarinta Isboortiga Soomaaliya eek u sugan Waqooyiga Ameerika, kuwaasi oo uu sidoo kale ka xusay Khalif Riiko, Dr. Ahmed Wali Hilowle, Macallin Mahdi Cawaale iyo Guddoomiye Bashiir Geelle, Xuseen Cawaale, Inj. Yusuf Shaqaaq, Abdulkadir Madaxeey, Nuune Mohamud Ciise, Macalim Cabdulkadir Sheekha iyo kuwo kale oo badan.

Sidoo kale waxaa uu u mahadceliyay DHAWAC.DALAB .Guled (guush) Xawaaladda Bakaal ULTIMATE TRAVEL  iyo dhammaan maamulka kooxda TC  iyo Macalinkooda Tababare Arab. oo dhammaantood kala jooga Washington, Minneapolis, Toronto, Columbus iyo Mogadishu.

Isha: Hiiraan Online

Kulan wayn oo ay maanta isugu yimaadeen Xukuumadii hore iyo Tan cusub ee hada ayaa maanta waxaaa uu ka dhacay magaalada Muqdisho kaas oo ahaa mid isbarasho.

Waxaa Si fool ka fool ah maanta isaga horyimid Wasiirada Xukuumadii hore ee Cabdi wali Gaas ee KMG ahayd iyo Wasiirada Ra’iisul wasaaraha Soomaaliya Cabdi Faarax Shirdoon Saacid uu soo xushay.

Wasiiradii hore ee Soomaaliya ayaa waxaa loogu baaqay inay la shaqeeyaan wasiirada Cusub ee Xukuumada Soomaaliya.

Kulanka Waxaa ka hadlay Masuuliyiin badan oo uu kamid ahaa wasiirkii hore ee  Warfaafinta Cabduqaadir Maxamad Xuseen Jahwayn oo sheegay inay diyaar uyihiin garab istaaga Wasiirada Cusub.

Sidoo kale Wasiirka warfaafinta Xukuumada Soomaaliya ee hada Cabdulaahi Cilmooge oo isagana madasha ka hadlay ayaa amaanay Wasiiradii hore waxaana uu dhanka kale uu qeexay inay hormar la iman doonaan.

Sida ay qortay wakaalada wararka UPI ee kasoo baxda dalka mareykanka, muwaadin udhashay dalkaas ayaa is daldalay kadib markii uu ka carooday dib udoorashada madaxweyne Brack Obama, muwadinkaan is dilay ayaa waxa uu ahaa taageeraha musharaxa Mitt Romney.

Warbaahinta maxaliga ah ee magaalada Florida ayaa sheegay in booliska magaalada Khamiistii lasoo dhaafay heleen meydka Henry Hamilton oo 64 sano jir ah kaasoo naftiisa daldalay isbuucii lasoo dhaafay.

Aana oo ah madaxa booliska magaalada Florida ayaa warbaahinta usheegtay ineey ninkan is daldalay dhinaciisa ka heleen dhalooyin faaruq ah iyo cirbado uu isku duray kuwaasoo u muuqday sun ineey kujireen, sidookale waxaa ninkaan inta uusan dhiman kahor uu darbiga ku qoray caay ama aflagaado uu ugeeysanayo madaxweyne Obama, taasoo muujineeysa in geeridiisa ama is daldalaadiisa ays abab u tahay doorashada Obama.

Saaxiibka ninkaan is daldalay ayaa warbaahinta usheegay in saaxiibkiis uu ahaa mid aad uga walwalsan mustaqbalka hantidiisa oo ku xirnayd doorashada mareeykanka, waxaa kaluu sheegay in ninkan in habeenkii lagu dhawaaqayay natiijada kama danbeysta ee doorashada ay ahayd markii ugu danbeysay uu arko.

Waxaa kaluu Hamilton saaxiibkiis usheegay in hadii Obama la doorto uu mar danbe sii arki doonin.

Warsaxafadeed ka soo baxaya xafiska Madaxweynaha Soomaaliya prof Xasan Shiikh Maxamuud ayaa waxaa gaashaanka loogu daruuray amaba waxba kama jiraan lagu tilmaamay war ay qortay wakaalada wararka ee Reuters oo ku aadanaa in Madaxweynaha Soomaaliya uu fasaxay in la dhoofiyo dhuxusha Soomaaliya oo haray cunu qabateyn loo saaray.

Warsxaafadeedka ka soo baxay xafiiska madaxweynaha Soomaaliya ayaa sidoo kale waxaa lagu tilmaamay in madaxweynaha Soomaaliya uusan iska badalin mowqifkiisii ku aadanaan in gabi ahaanba la joojiyo dhoofinta dhuxusha iyo jarista dhirta isagoo markaasi tixraacaya qaraar ka soo baxay qaramada midowbay oo lagu joojinayo dhoofinta dhuxusha Kismaayo ka socoto.

Dowlada waxa ay wadaa wadadii xal loogu raadin lahaa arinkaan dhoofinta dhuxusha,Madaxweynaha Soomaaliya waxa uu doonayaa in uu xalbuuxa uu gaaro arintaan dhoofinta dhuxusha ee dhawaan cunaqabateynta lagu soo rogay,sidaasi warsaxafadeedka ayaa lagu sheegay.

Prof Xasan Shiiq Maxamuud Madaxweynaha Soomaaliya ayaa waxa shaaca ka qaaday in dowlada wadanka Soomaaliya wali aysan baalmarin go’aankii ka soo baxay Golaha amaanka ee qaramada midowbay islamarkaana go’aankaasi si ay adag ay u ilaalineyso kuna dhaqmeyso,waxa uuna sidoo kale Madaxweynaha Soomaaliya meel cad ka istaagay wararka ay qortay wakaalada wararka ee Reurters ee lagu sheegay in Madaxweynaha Soomaaliya uu ogalaaday in la dhoofiyo dhuxusha Soomaaliya.

Ugu danbeyntii warsaxaafadeedka ka soo baxay xafiiska madaxweynaha Soomaaliya ayaa imaanaya,iyadoo shirjiraa’id uu qabtay madaxweynaha Soomaaliya uu ku sheegay in si ka badalan sidii uu sheegay u dhigtay Reuters taasina uu ku tilmaamay in tahay mid ka hor imaaneysa sharciga saxaafada iyo mas’uuliyad daro oo ay dusha saarteen dadka warkaasi qoray.

Sida ay sheegayaan dad ka ak dhawaa goobta shilka uu ka dhacay  gaari nuuca dagaalka ah ay ciidamada Amisom leeyihiin uu ku jiiray gabar da’yar degmada Warta Nabada ee muqdisho.

Goob jooge ayaa waxa uu sheegay in gabadhan oo $ jir ahayd oo wadada inay goyso rabtay uu gaariga ku yimid islamarkaana uu dul maray maskaxdeedana halkaasi ay ku daatay.

Falkan oo dhacay duhurnimadii markii salaada Khudbada jimco la geli rabay ayaa dadka deegaanka waxay meydka ka qaadeen goobta iyadoo gaadiidka Amisom hore socdaalkoodii usii wateen.

Gudoomiyaha Degmada Warta Nabada ee maamulka Dawlada Hoose Deeqo Cabduqaadir oo xiriir aan la sameynay ayaa noo xaqiijisay arintaan inkastoo ay ka gaabsatay ka hadalka arintaas.

Ma ahan markii ugu horeysay oo Ciidamada Amisom gaadiidkooda marsiiyaan dadka muqdisho ku dhaqan iyadoo dhowr jeer sidaan oo kale muqdisho dad badan ugu geeriyoodeen gawaari amisom leeyihiin oo dul maray.

Alaha u naxariistee waxaa maanta magaalada Muqdisho lagu aasay Gudoomiyihii hore ee gobolka Banadir Maxamad Cumar Xabeeb Maxamad dheere oo maalintii shalay Muqdisho ku geeriyooday.

Aaska Maxamad dheere ayaa waxaa uu ka dhacay Degmada Warta Nabada waxaana lagu aasay qubuuraha Sheekh Suufi.

Masuuliyiin Dowlada katirsan iyo Shacab ayaa ka qaybgalay Salaada Janaasada ee maanta lagula tuktay Masaajidka Isbahaysiga waxaana halkaas ka hadlay masuuliyiin kala duwan.

Wasiirka wasaarada arimaha gudaha ee Xukuumada Cusub Cabdi kariin Xuseen guuleed oo halkaas ka hadlay ayaa tacsi u diray ehelada uu ku dhintay marxuumka.

Maxamuud Axmad Nuur Tarsan oo gudoomiyaha Gobolka Banaadir oo halkaas xaadir ku ahaa ayaa waxaa uu sheegay in Maxamad dheere uu ahaa qof aad u wanaagsan in kastoo uu sheegay inuu cafinayo Maxamad Dheere maadama  dhawaanahan ay isku dhacsanayeen kadib markii Maxamad dheere qaraxii madaxwaynaha lagu weeraray uu ku eedeeyay Gudoomiyaha Gobolka Banaadir.

Salaad Cali jeele oo isagana ka qaybgalay Aaska Marxuumka ayaa sheegay in Qof walba uu mari doono halkii uu maray Maxamad dheere,geeridana ay xaq tahay.

Rio Ferdinand ayaa qirtay inuu guulihiisa koobabka wax badan ka jecelyahy inuu helo lacag kaash ah. Daafacaan intii uu u ciyaarayey Manchester United ayaa ciyaartoy badani lacag baadi goobteen.

Laakiin wuxuu sheegay in markii uu ka fariisto kubada cagta, uu dib u milicsan doono guulaha uuna ku raaxeysan doono wixii uu ka sameeyey kubada cagta, bedelkii ay lacag ugu jiri laheyd akoonkiisa Bank-ga.

Ferdy ayaa ku guuleystay shan horyaal oo Premier League, Champions League iyo laba League Cup intii uu u ciyaarayey United.

Wuxuuna qiray inaysan maskaxdiisa ka go’in doonin guulaha uu ka gaaray Old Trafford marka ay da’du liiciso uuna soo xasuusan doono koobabkii uu kusoo xareeyey qolka kooxdu dhigato koobabka.

“Dadku waxay ka hadlayaan lacag dhamaan ciyaartoydii kubada cagta beeso ayey raadsanayaan laakiin anigu sidaas ma ihin, guulo u joog ayaan ahay. Maba ka fakaro meeqo lacag ah ayaad heysataa,” ayuu yiri Ferdinand sida uu qoray wargeyska The Sun.

“Marka aad soo afjarto xirfadaada kubada cagta, waxaad rodolka saari doontaa xirfadaadii aad soo dhameysay.

“Hadii aad koobab kusoo guuleysatay aadna koox weyn lasoo qaadatay guulo, waa wax aad ka hadli doonto.

“Marka aan fariisto kama hadlaayo meeqo lacag ah ayaan heystaa. Waxaan ka hadli doonaa wax badan oo fiican oo aan soo qabtay iyo xiliyadeydii ugu fiicnaa.”

W/Q: Ahmed Jaangoan

E-mail: [email protected]

Caasimada — Somalia.