Dowlada Soomaaliya ayaa afar taliye waxaa ay u xirtay qaraxii gaariga ahaa ee ka dhacay afaafka hore ee xarunta Golaha Shacabka oo Baarlamanka ay ku shiraan.

Taliska Booliska Dowlada ayaa maalmahan waxaa ay ku howlanaayeen baaritaano ku aadan sida uu ku yimid qaraxa,waxaana baaritaankaas ka soo baxaya faah faahino badan.

Jen.Axmada Xasan Maalin oo ah Taliyaha dambi baarista Dowlada soomaaliya ayaa sheegaya in baaritaankaas uu maal fiican  u marayo yna u xireen ilaa afar Taliye.

Xiritaan Taliyaashaan ayaa waxaa uu Jen. Axmad Xasan Maalin  uu sheegayaa inuu soo maray gaaariga qarxay isgoysyo Baabuurta lagu baaro oo iyaga ay masuul ka ahaayeen.

Afarta Taliye ee loo xiray qaraxaas ayaa waxay kala yihiin Taliyaha Saldhiga Booliska Xamarweyne, Xamar Jajab, Waabari iyo Wardhiigley, kuwaa oo dhamaantood tuhun laga qabo kulug lahaanshaha qaraxa.

Tababaraha Liverpool Brendan Rodgers ayaa qirtay in weeraryahan Luis Suarez uu baaqi kusii ahaan doono Anfield, inkastoo lala xiriirinaayey inuu kooxda ka dhaqaaqayo Janaayo.

Saxaafada ayaa soo jeedineysay in Manchester City ay 40 milyan oo ginni ku dalbaneyso ciyaaryahanka heerka caalami ee dalka Uruguay marka uu suuqu dib u furmo.

Laakiin taas bedelkeeda 25 jirkaani wuxuu lasii joogi doonaa kooxdiisa sida uu sheegay tababre Rodgers, iyo Luis oo aan qarsan jaceylka uu u qabo Reds.

“Ma jirto cid ku dagaalami doonta saxiixiisa. Waxaa uu sii joogi doonaa halkaan,” ayuu yiri tababare Rodgers.

“Hadii aan weyno Luis markaas ma heysano gooldhaliye. Ma qabo inaan awoodno inaan weyno isaga.

“Hubaashii ma ahan qof aan dooneyno inaan iibino. Waxa uu yahay ciyaaryahan cajiib ah oo lala shaqeyn karo, waxaan dooneynaa inaan kooxdeena ciyaaryahano ku soo kordhino ee ma dooneyno inaan iska iibino gaar ahaan xidig sidiis oo kale ah.”

Luis Suarez ayaa isna ka halday arinka wuxuuna yiri: “Hada halkaan ayaan joogaa, wax walba nafsadeyda ayaa ku qanacsan waxaana isku dedeyayaa inaan  halkaan sii joogo sanado badan hadii aan awoodo, sababtoo ah waxaan joogaa koox aan ku farax sanahay, reerkeygu halkaan ayey ku farax san yihiin, waxaan halkaan ka helay koox Fantastik ah iyo tababare aan wax badan ka bartay.”

W/Q: Ahmed Jaangoan

E-mail: [email protected]

Caasimada — Somalia.

Maxamuud Axmad Nuur Tarsan Gudoomiyaha Gobolka Banaadir ayaa ka sii hordhacay Go’aanka Madaxwaynaha uu qorshaynayo cida loo dhiibi doona Gudoomiyaha gobolka banaadir.

Tarsan ayaa waxaa uu waayadan dambe uu ka warhayay xanta Suuqa ugu jirta oo ah in Gudoomiyaha la badali doona maadaama Dowlada Cusub ay u baahantahay madax Cusub.

Gudoomiyaha Gobolka Banaadir ayaa sheegay inuu ka dagi doono Xilkiisa dhawaan kadib markii uu ka hadlay Dibad bax 15-kii bishaan ee maalintii shalay ahaa lagu taageerayay Ra’iisul Wasaaraha Soomaaliya uu ka hadlay kana cadeeyay inuu diyaar u yahay in xilka uu iska wareejiyo.

Waxaa uu sheegay  Maxamuud Axmad Nuur Tarsan inuu soo dhawaynayo cidkasta oo isaga lagu badalayo waqti xaadirkaan.

Gudoomiye Tarsan waxaa toddobaadkan uu waayey kursigii xildhibaanimo oo ay beeshiisu horey u siisay, kaasoo maalintii Talaadada loo dhaariyey Dr, Cusmaan Dufle oo ay isku beel yihiin gudoomiyaha kadib markii uu dhamaaday waqti hal bil ahaa oo horey gudoomiyaha baarlamaanka Maxamed Cismaan Jawaari uu ugu qabtay gudoomiye Tarsan inuu ama baarlamaanka xubin ka noqdo ama ka tanaasulo.

Hadalka Gudoomiyaha ayaa waxaa uu Imaanayaa iyadoo Madaxwayne Xasan uu u fadhiyo arinta badalitaanka Maamulka Gobolka Banaadir

Chelsea ayaa ugu dambeyn rajo ka qabta inay 4.5 milyan oo ginni dhamaadka ibuucaan kula soo saxiixato daafaca dadabka midig ee dalka Brazil Wallace, oo 18 jir ah, wuxuuna imaan doonaa Stamford Bridge, isagoo dib amaah loogu siin doono kooxdiisii hore Fluminense.

“Waxaa jira wada xaajood xowli ku socda oo ay kula jirto Chelsea saxiixana horaan ayaa la isla meel dhigay,” ayuu yiri wakiilka daafaca Frederico Moraes

Waxaa jiray warar kale oo sheegay in kooxda Talyaaniga ka dhisan ee Rome ay xidigaan qaadaneyso laakiin sidoo kale taas meesha waa laga saaray.

“Hadii uu Wallace aado Chelsea, halkaas ayuu ka ciyaari doonaa,” ayuu ku daray Moraes. “Waxaa qandaraas usoo bandhigay Rome iyo kooxo badan oo kale oo Talyaani ah, laakiin waxay aheyd waqti hore.”

W/Q: Ahmed Jaangoan

E-mail: [email protected]

Caasimada — Somalia.

Cali Maxamed Maxamuud oo ah Soomaali dilay wiil ay dhashay xaaskiisa ayaa waxaa lagu abaal mariyay 25 sano oo xabsi ah, magaalada Buffalo ee gobolka New York ee dalka Mareykanka.

Hase yeeshee xitaa ciqaabtaas adag, weli ma jirto sharaxaad dhab ah oo ku saabsan dhimashadii Cabdifitax Maxamuud oo 10 jir ahaa.

Dacwad oogaha Xaafadda Erie, Frank A Sedita III ayaa dilka Ali oo 41 jir ah uu u geystay Cabdifitax ku tilmaamay mid ka mid ah dambiyadii ugu xumaa ee uu arko, 24 sano oo uu ahaa dacwad ooge.

Ali ayaa dilay wiilkii ay dashay xaaskiisa 17-kii April ee sanadkan, markaasi oo uu ku marjiyay fiilo koronto illaa ay nafta ka baxdo.

Dhibka ayaa yimid kadib markii Cafdifatax uu ka cararay adeerkiisa, kadibna adeerka uu ka daba orday oo uu soo qabtay, markaasi oo uu afka uga buuxiyay iskaalshooyin, kadibna ku marjiyay fiilo koronto.

Qareenada difaacaya Cali ayaa ku dooday inuusan ugu tala gelin inuu dilo wiilka ay dhashay xaaskiisa, hase yeeshee uu lumiyay maamulka kadib markii uu carooday.

Taasi kama aysan bad baadin in xeer beegtida ay ku hesho dilka darajada labaad, waxaana Cali uu 25 sano ku qaadan doonaa darbiga gadaashiisa.

Qaban qaabo lagu aasayo Gudoomiyihii hore ee Gobolka Banaadir Maxamad Cumar Xabeeb Maxamad dheere ayaa waxaa ay maanta ka socotaa magaalada Muqdisho.

Marxuum Maxamad dheere ayaa soo noqday Gudoomiyihii hore ee Gobolka Banadir iyo Gobolka Shabeelaha dhexe ka hor inta uusan dhiman.

Alaha Unaaxariistee Maxamad dheere ayaa waxaa uu ku dhintay Xarunta Xalane ee Amisom ay dagan yihiin waxaaana uu u dhintay xanuuno hayay mudo badan.

Saacadaha Soo aadan ee maanta ayaa la filayaa in Marxuumka in lagu aaso Magaalada Muqdisho oo waayadii dambe uu ku xanuunsanayay.

Ka dib markii uu Zlatan Ibrahimovic afar gool ka dhaliyey England, kulankii ay Sweden ku booqdeen Friends Arena, aan dib idiin xasuusino Toban bandhig oo caalami ah oo ciyaarhano halyeeyo ah ka dhigeen kubada cagta galayna taariikhda dahabka ah ee kubada cagta.

1: Kalusha Bwalya (Zambia v Italy – 1988)

Kalusha Bwalya ayaa soo bandhigay mid ka mid ah bandhigyadii ugu caalamisanaa ee ciyaaryahan muujiyo kubada cagta Olimbikada, wuxuuna sedaxleey ku shubay shabaqa Italy 1988di, sedaxleedii uu ku dhaliyey Gwangju ayaana ka caawisay inay Zambia, kusoo baxdo Group B, isagoo goolkiiisa labaad ku dhaliyey lugta bidix wuxuuna ahaa mid aan ka go’in indhaha intii daawatay. Wuxuu lix sano u ciyaarayey PSV wuxuuna 1996dii ku guuleystay abaal marinta Fifa World Player of the Year

2: Fabio Cannavaro (Germany v Italy – 2006)

Wuxuu ahaa daafac aan la sahlan ka hor kulankaanba balse tayadiisii ugu sareysay ee dhamaan ciyaaraha World Cup ayuu muujiyey Fabio Cannavaro, markaasoo uu xulkiisa ku hugaamiyey Finalka. Daaficii dambeedka Juventus ayaa la gudbi waayey isbaarada uu hor dhigay shabaqa Azzurri 120 daqiiqo, ka hor inta aysan dhamaadkii ciyaarta Italy goolal ka helin Alessandro Del Piero iyo Fabio Grosso.

3: Geoff Hurst (England v West Germany – 1966)

Geoff Hurst hadaba waa ciyaaryahanka keliya  ee abid sedax gool [hat-trick] ka dhaliyey Finalka Koobka aduunka markii ay England gegeda Wembley 1966dii ku suuxisay xulka West Germany. Ka dib markii uu u barbareeyey goolkii uu ku furay ciyaarta Helmut Haller, Hurst ayaa ciyaarta iska lahaa waqtigii dheeriga ee lagu daray, xilli ay Three Lions 3-2 ku qaaday koobka.

4: Diego Maradona (Argentina v England – 1986)

Argentina ayaa guul ka gaartay xulka England, waana mid ka mid ah guulaha uu ku caan baxay World Cup markii uu labo gool oo mucjisa ah weeraryahan Diego Maradona ka dhaliyey Three Lions. Goolkiisii ugu horeeyey gacanta ayuu ku dhaliyey xilli uu garsooruhu ansaxshay ‘waana midda Diego Maradona weli looga neceb yahay gudaha England’ iyadoo maalintaasi laga xuso Ingiriiska.
Laakiin goolkii labaad ee Maradona, wuxuu ahaa mid ilaa iyo haatan laga yaabay inta kala barka garoonka kubada kasoo jiiday uuna kasoo talaabsaday lix ciyaaryahan oo England ah  ka hor inta uusan dhulka seexin Shilton ayuu weeraryahankii Napoli shabaqa kubada dhex geliyey. Waxaana sidaas oo kale goolkiisa loogu magac daray ‘Goal of the Century’ in 2000.

5: Pele (Brazil v Sweden – 1958)

Koobkii aduunka 1958dii wuxuu leeyahay xusuus u gooni ah waana markii ugu horeysay ee Selecao ay ku guuleysato,laakiin Finalkii Sweden wuxuu Pele u ahaa waqtiga meel gaar ah uga qoran buugiisa xusuusta. Weeraryahankii halyeeyga ahaa ayaa laba gool ka dhaliyey ciyaartii ku idlaatay 5-2 da, 17 jir ayuuna ahaa markii uu halyeeyga reer Brazil xulkiisa ku hugaamiyey koobkaan.

6: Ferenc Puskas (England v Hungary – 1953)

Ingiriisku waqtigaas wuxuu ahaa lama taabtaan isagoo ahaa horyaalka Olimbikada, wuxuuna ku darsaday inaan 24 kulan dhiniciisa dhulka la dhigin, laakiin waxaa u qubeeyey Hungary oo guul darro 6-3 ah dhabarka u saartay, iyadoo uu bandhig fiican ku lahaa Ferenc Puskas. Halyeeyga Real Madrid ayaa laba mar shabaqa soo taabtay intii ay ciyaartu socotay

7: Paolo Rossi (Italy v Brazil – 1982)

Sedaxleeydii Paolo Rossi uu ka dhaliyey Brazil koobkii aduunka ee 1982dii ayuu ku noqday halyeey si kastaba wuxuu xiligaas wareeriyey daafacyada Selecao isagoo Azzurri lix gool u dhaliyey intii uu socday koobkaani.

8: Archie Thompson (Australia v American Samoa – 2001)

Wuxuu wax ka keenay guushii ugu weyneyd ee kubada cagta laga gaaro, isagoona 13 gool u dhaliyey Australia xilli ay 31-0 ku raquuseen American Samoa waana hal ciyaaryahan oo dhaliyey goolal intaas la eg ilaa iyo haatan.

9: Jan Tomaszewski (England v Poland – 1973)

Ninkii daafaca ka ciyaari jiray Jan Tomaszewski ayaa isreebreebka koobka aduunka usoo saaray xulka Poland, ka dib markii uu bandhigiisii qurxoonaa ku darsaday inuu Three Lions, goolka barbaraha ka dhaliyey wuxuuna xiligaas xulkiisa ku hugaamiyey inay kaalinta sedaxaad ka galaan koobka aduunka.

10: Zinedine Zidane (Brazil v France – 2006)

Waxaa uu Zinedine Zidane ka sameeyey Finalkii koobka aduunka 2006dii ma aheyn wax soo jiidasho leh, laakiin markii aad dib u eegto inuu sideed dhamaadka kusoo jiiday Brazil. Xidigii Real Madrid ayaa muteysanaaya in lagu amaano bandhigaas, Selecao ayuuna cad cad u kala jaray isagoo soo qaaday laadkii xorta ahaa ee uu Thierry Henry goolka u sarifay.

Waxaa France habeenkaas looga bixiyey habeenkii , ‘Zizou’ mana laga seedax Paris sida ay saxaafadu sheegtay.

Hadaba su’aashu waa Zlatan Ibrahimovic miyuu noqday halyeey maadaama uu afar gool ka dhaliyey xulka England, uuna noqday ciyaaryahakii ugu horeeyey ee afar gool ka dhaliya Three Lions iyo ciyaaryahankii ugu horeeyey ee goolka ku fura garoonka cusub Friends Arena?

Sidoo kale ka dhiibo fikirkaada ma ka heshaa qormooyinka sidaan oo kale ah, fikirkaagu waa muhim si aan diirada u sarno qormooyin nuucaan ah.?

Waxaa Diyaariyey: Ahmed Jaangoan

E-mail: [email protected]

Caasimada — Somalia.

In ka badan laba boqol oo kun oo qof aya Aqalka Cad ee Mareykanka u diray codsi ah in goboladooda loo ogolaado inay ka go’aan Mareykanka intiisa kale, kadib dib u doorashadii madaxweyne Obama.

Codsiyada ayaa waxa lagu buuxiyay qeybta “We the People” ee website-ka Aqalka Cad.

Inta badan 36-ka gobol ee codsiyada ay ka yimaadeen, ayaa ah kuwo u codeeyay musharaxii laga adkaaday ee xisbiga Jamhuuriga Mitt Romney, inkast aoo ay ku jiraan kuwo u codeeyay Obama.

Dastuurka Mareykanka ma ogola in gobol uu ka go’o dalka intiisa kale.

Ilaa iyo hadda Aqalka Cad kama hadlin codsiyada ka yimid dadka careysan oo ay ku doonayaan go’itaanka.

Codsiyad ugu badan ayaa ka yimid dad degan gobolka Texas, waxaana ay gaarayeen 90 kun. Texas waxa ay ahaan jirtay Jamhuuriyad gooni ah, ka hor inta aysan ku biirin Gobollada Midoobe.

Markii ugu dambeysay ee gobollo ay ka go’een Mareykanka, waxaa billowday dagaalkii sokeeyay ee Mareykanka, kadibna gobolladii go’ay ayaa laga adkaaday oo qasab lagu soo celiyay.

Inta badan kuwa codsiga go’itaanka soo diray waa dad muxaafad ah (Conservatives), oo ka tirsan Xisbiga Jamhuuriga, oo carro ka qaaday guul darrooyinkii ka asiibay doorashooyinka.

Gobollada laga soo diray codsiyada ayaa waxaa ka mid ah Alabama, Arkansas, Colorado, Florida, Georgia, Indiana, Kentucky, Louisiana, Michigan, Mississippi, Missouri, Montana, New Jersey, New York, North Carolina, North Dakota, Oregon, South Carolina, Tennessee and Texas.

Gerard Pique ayaa rumeysan in Lionel Messi uu u qalmo inuu markiisii afaraad ku guuleysto abaal marinta Fifa Ballon d’Or, marka loosoo xaadiro bisha soo aadan.

Daafaca reer Spain ayaa si la yaab leh u kala saaray xidigaha inta badan la isla meel dhigo kabtanka Argentine, oo ay u wada ciyaaraan Barcelona iyo ninka uu xafiiltanku kala dhexeeyo Cristiano Ronaldo, oo ay usoo wada ciyaareen Manchester United.

Pique ayaana rumeysan inay tahay in Messi laga sara mariyo Kabtanka Portugal, xitta halyeeygii Diego Maradona.

“Xushmad ayaan u hayaa waana rumeysanahay inuu Cristiano Ronaldo u qalmo Ballon d’Or, laakiin Leo wuxuu ka yimid caalam kale halka uu Cristiano ugu fiican yahay dadka caalamkaan ku nool,” ayuu Pique u sheegay Radio Associacia de Catalunya 1.

“Ronaldo wuu u shaqeeyaa si adag, si wanaagsan, laakiin ma jirto wax aad sameyn kartid marka aad ka hortimaado Messi.

“Waxaa micno gaar ah Messi u yeelay xittaa ciyaartoydii hore ee kubada cagta soo maray waxay ahaayeen kuwo marna kaca marna kufa, sida Maradona. Ma uusan sameyn barkeed inta uu Leo Barca u sameeyey.

“Messi sanado badan oo uu xirfadiisa ku dhex jiray sidaan ayuu u fiicnaa wuxuu u qalmaa in looo tixgeliyo ciyaaryahankii ugu fiicnaa ebid taariikhda kubada cagta soo mara.”

Messi ayaa ku guuleystay Ballons d’Or sedax mar oo isku xigta, wuxuuna u dhigi doonaa Rikoor cusub hadii uu abaal marintaan gacanta u dhigo markiisii afaraad ee isku xigta.

W/Q: Ahmed Jaangoan

E-mail: [email protected]

Caasimada — Somalia.

Dowlada Uganda ayaa sheegtay in hadalka muranka badan dhaliyay ee ku aadanaa in ciidamadeeda Nabad dhaliyaasha Soomaaliya ay kala baxeyso arintaasi ay sheegeen in xal laga gaaray.

Madaxda Dowladda Somalia ayaa ka walaacsanaa ka bixista ciidanka Uganda ee Somalia, oo ay sheegeen inay xaalad amni darro oo hor leh dalka u horseedi karto.

Raysal wasaaraha dalka Uganda Amamam Mbabazi ayaa sheegay in Baarlamaanka dalka Uganda iyo Mas’uuliyiinta dowladaasi ay ka wada hadleen sida laga yeelayo iyo xalka loo raadinayo warbaxinta ka soo baxday Qaramada Midoobay ee ahayd in dowladaha Rwanda iyo Uganda ay taageero siiyaan mucaaradka ka dagaalama dowlada Jamhuuriyada dimuqraadiga ee Gongo.

Mas’uuliyiinta dowlada Uganda ayaa isku raacay in ka noqdaan hadalka ah in ciidamadeeda ay kala baxayaan Soomaaliya sida ay qortay wakaalada wararka ee Daily Monitari.

Sidoo kale Raysal Wasaaraha dalka Uganda Mr Mbabazi ayaa isagoo hadalkiisa siiwata waxa uu sheegay in ergay ka socota Uganda ay mudooyinkii danbe ay ku sugnaayeen Magaalada Newyork kuwaasi oo kulamo inta badan loogu hadlayay arimaha ku aadan in Uganda ay qeyb ka tahay wadamada taageera Mucaaradka M23 ee ka dagaalama dalka Gongo.

Waxaana wafdiga ku sugan Newyork iyo xubnaha Golaha ammaanka Qaramada Midoobay ay isla afgarteen in Uganda ay joojiso goodiska ku aadan in ciidamadeeda kala baxeyso wadamo Soomaaliya ay ka mid tahay.

Uganda ayaa mudooyinkii danbe waxa ay waday hadalo goodis ah oo sheegaya in ciidamadeeda ay kala baxeyso Soomaaliya.

David Luiz ayaa rumeysan inuu Radamel Falcao noqon lahaa ciyaaryahan ku haboon Chelsea, hadii uu usoo dhaqaaqo Stamford Bridge.

Shabakada Goal.com ayaa talaadadii ogaatay in weeraryahanka Atletico Madrid ay ku weyn tahay inuu u dhaqaaqo Galbeedka London ayna Blues la furtay wadahalo heshiis ay kula soo saxiixaneyso 60 milyan oo euro.

David Luiz  ayaa ka horyimd Falcao subaxnimadii Khamiista [Saakay] xilli xulka Brazil uu Colombia ku qaabilay New Jersey, wuxuuna qiray inuu ku farxi lahaa hadii uu weeraryahakaani usoo dhaqaaqo Stamford Bridge.

Markii la weydiiyey hadii uu Falcao yahay ciyaaryahan ku haboon Blues, daafaca Stamford Bridge ayaa u sheegay saxaafada: “Dabcan, wuxuu noqon lahaa mid ku haboon. Dhamaan ciyaartoydu wey ku farxi lahaayeen sababtoo ah Falcao waa ciyaaryahan weyn. Inta badan wey adag tahay inaad celiso.”

Falcao ayaa sedaxleey ka dhaliyey Chelsea markii uu kaga horyimid Finalka Uefa Super Cup, waxayna u arkaan bedelka Fernando Torres oo ku guul darreystay inuu kooxda goolal u dhaliyo.

Kulan saaxiibtinimo oo u dhexeeyey labada xul ee dhaca Koonfur America ayaa kusoo dhamaaday barbaro 1-1ah, iyadoo Neymar uu goolka u furay Selecao inta uusan ka qasaarin goolku laad ay guusha ku qaadi lahaayeen.

W/Q: Ahmed Jaangoan

E-mail: [email protected]

Caasimada — Somalia.

Golaha Wasiirada Cusub ee xukuumada Soomaaliya ayaa goordhow ee maanta lagu hor dhaariyay Baarlamanka Soomaaliya oo codka caqlibiyada ku taageeray.

Kulan ay Baarlamanka kuyeesheen Xarunta Golaha Shacabka kaas oo ay ugu hadlayeen Arimaha xeer hoosaadka ayaa waxaa ay intaa ka dib bilaabatay dhaarinta Tobonka Wasiir.

Caydiid Cabdulaahi Ilkaxanaf oo ah gudoomiyaha Maxkamada Sare ee dalka ayaa mid mid Wasiirada ugu yeerayay  iyagoo gelinayay Kitaabka gacantooda kuna dhaaranayay.

Gudoomiyaha Baarlamanka Soomaaliya Maxamad cismaan Jawaari ayaa dhaarinta kadib waxaa uu qeexay in Culays wayn maanta uu ka dagay mar hadii la ansixiyay Wasiirada lana dhaariyay.

Golaha Wasiirada oo halkaas ka hadlay ayaa ku midaysnaa in Cadaalada inay ka shaqayn doonaan.

Waxaa Goordhow magalada Muqdisho ku geeriyooday Gudoomiyihii hore ee Gobolka Banaadir Maxamad Cumar Xabeeb Maxamad dheere.

Marxuum Maxamad Dheere ayaa waxaa uu ahaa mudooyinkan dambe mid ku xanuusanayay magaalada Muqdisho.

Allaha Unaxariistee Maxamad Dheere ayaa waxaa uu ku dhintay Cisbitaalka Xalane ee Muqdisho ku yaala.

Geerida Marxuum Maxamad dheere ayaa waxaa Shabakada Caasimada u sheegay Cabdi Fitaax Cumar Shaawey.

Maxamad Cumar xabeeb Waxaa uu horay sidoo kale usoo noqday Gudoomiyihii Maamulkii Gobolka Shabeelaha dhexe.

Waxaan halkaan idinkugu soo gudbineynaa Toban ciyaaryahan oo ay macquul tahay inay Janaayo ka tagaan kooxahooda Barclays Premier League.

Iyadoo koox walba ay isku diyaarineyso inay haatan soo jiidasho ku sameyso ciyaaryahanka ay bartilmaameedka ka dhiganeyso Janaayo, maadaama uu suuqu furan yahay hal bil oo keliya.

Taas bedeleeda waxaan halkaan idinkugu soo gudbineynaa ciyaartoyda ay macquulka tahay inay ka tagaan kooxahooda bisha Janaayo.

Aan ku bilowno.

1: Edin Dzeko: Man City ayuu ka socdaa waxaana lala xiriirinayaa Arsenal

26 jirkaan ayaa ilaa iyo haatan xilli ciyaareedkaan kusoo bilowday sedax kulan oo Premier League, laakiin waa maareeyaha goolasha Man City,  isagoo kooxda ka caawiyey guulo ay u baahneyd.

Roberto Mancini ayaan siday aheyd u icticmaalin weeraryahankii hore ee Wolfsburg, isagoo inta badan ka doorta weeraryahanada dalka Argentina Sergio Aguero iyo Carlos Tevez.

Wenger oo maaro u weysan musiibada ku habsatay Olivier Giroud oo aan kusoo bixin sidii laga filaayey ayey macquul tahay inuu Dzeko u dhaqaajiyo Gunners maadaama uu ganacsi fiican kooxdiisa kala dhexeeyo Sky Blue. Waxaana lasoo jeedinayaa inuu saxiixiisa doonayo bisha Janaayo.

2: Marouane Chamakh: Arsenal ayuu ka tegayaa isagoo ku laabanaya kooxdiisii hore Bordeaux

Wargeyska kasoo baxa dalka Faransiiska Le Figaro ayaa werinaaya in weeraryahanka Arsenal Marouane Chamakh ay u furan tahay inuu ku laabto Horyaalka Ligue 1 dalka France ka dib markii uu la qabsan waayey Gunners.

Ciyaaryahanka heerka caalami ee dalka Morocco ayaa lasoo sheegayaa inuu xiiseynayo inuu kulaabto kooxdiisii hore ee Bordeaux, marka uu Janaayo suuqa kala iibsigu furmo.

3: Marouane Fellaini: Everton ayuu ka dhaqaaqayaa wuxuuna u socdaa Chelsea

24 jirkaan dalka Belgium Marouane Fellaini ayaa si wanaagsan ku bilowday xilli ciyaareedkaan, wuxuuna kooxda lagu niinaaso Toffees ka caawiyey bilow wanaagsan oo horyaalka ah xilli ay ku jiraan kaalinta afaraad waxayna guul darro tirsadaan keliya hal kulan 11 ciyaar.

Tababare David Moyes ayaa lumin kara wiil uu soo barbaarshay hadii ay Chelsea miiska soo saarto aduun dhan 30 milyan oo ginni, ciyaaryahankii hore ee Standard Liege ayaana Chelsea ula muuqda bedelka Stamford Bridge ee Super Frank Lampard kaasoo ay da’du ka daba timid.

4: Darren Bent: Aston Villa ayuu ka socdaa waxaana lala xiirinayaa Liverpool

Liverpool ayaa lasoo werinayaa inay Janaayo dalab u direyso weeraryahanka Aston Villa Darren Bent, kaasoo waayadaan deris la noqday kursiga keydka.

Liverpool ayaa isha ku heysa inay xidigaan reer England isaga dhisaan weerarkooda habacsan, oo uu waayadaan kali ku ahaa Luis Suarez. Xilli uu Fabio Borini dhaawac kaga maqan yahay kooxda.

Bent waa ciyaaryahan si fiican u yaqaan Horyaalka Ingiriiska wuxuuna usoo ciyaaray Charlton Athletic, Tottenham, Sunderland iyo Aston Villa, waana 28 jir ku wanaagsan weerarka.

5: Adel Taarabt: QPR ayuu ka dhaqaaqayaa waxaana u baahan Arsenal

Arsenal ayaa waqti dheer lala xiriirinaayey ciyaaryahanka heerka caalami ee dalka Morocco Adel Taarabt. Waxaana uu hada mar kale kusoo laabtay qorshohooda suuqa ay kaga soo kaluumeysanayaan Janaayo. Arsene Wenger ayaa sheegay inuu isha la raacayo weeraryahanka QPR, kaasoo xagaagii ku guul darreystay inuu Loftus Road uga biiro kooxda White Hart Lane.

6: Ryan Shawcross: Stoke City ayuu ka socdaa wuxuuna dib ugu laabanayaa Man United

Daafaca ku dhashay Chester ayaa lix sano la joogay Man United laakiin wuxuu ku guul darreystay inuu waayo wanaagsan ku qaato, isagoo 2008dii hal milyan kula biiray Stoke City.

Tababare Sir Alex Ferguson ayaa haatan u arka daafac ku wanaagsan inuu mar kale kusoo laabto Old Trafford . Red Devils ayaana dooneysa inay dib ula soo saxiixato 25 jirkaan.

7: Emmanuel Adebayor: Tottenham wuxuuna ku wajahan yahay Celta Vigo

Wargeyska kasoo baxa dalka Portugal ee Fichajes ayaa sheegaya in kooxda ka dhisan La Liga  ee Celta Vigo ay dooneyso saxiixa weeraryahanka Tottenham Emmanuel Adebayor.

28 jirkaan ayaa xilli ciyaareedkaan keliya kusoo bilowday hal kulan oo Premier League ah, inkastoo uu ku wanaagsan yahay gool dhalinta, ayna taasi ku cadahay intii uu amaahda kula joogay kooxdaan. Tababare Andre Villas-Boas ayey u muuqataa inuu ka door biday Jermain Defoe.

8: Frank Lampard: Chelsea ayuu ka tegayaa wuxuuna u socdaa kooxda Shiinaha ee Guizhou Renhe

Ninka iska leh Guizhou Renhe ayaa sheegay inay Frank Lampard isku afgarteen inuu usoo dhaqaaqo Janaayo. Saxaafada Shiinaha ayaana sheegayey in xidiga Chelsea uu raaci doono wadadii ay mareen asxaabtiisii hore Didier Drogba oo u dhaqaaqay China iyo Nicolas Anelka oo isna ka ciyaara Horyaalkaas.

9: Nani: Man United  ayuu ka tegayaa wuxuu u socdaa Juventus

Wargeyska kasoo baxa dalka Talyaaniga ee CalcioMercato, ayaa sheegaya in tababare Antonio Conte, oo ganaax kasoo laabanaya December, ay diiradu u saaran tahay ciyaaryahanka garabka uga ciyaara Man United Nani.

Nani ayaan si fiican xilli ciyaareedkaan uga dhex muuqan United waxaana lala xiriirinaayey kooxo dhowr ah, Juventus ayaase xidigaan baacsaneysay 18kii bilood ee lasoo dhaafay.

10: Marko Marin: Chelsea ayuu ka huleelayaa wuxuuna u socdaa kooxda Jarmalka ee Borussia Monchengladbach

Marko Marin ayaa loo qiimeynayaa inuu ka tago Stamford Bridge. 7 milyan ayuu ugu soo dhaqaaqay kooxda ka dhisan galbeedka London balse da’yarka reer Germany saameyn kuma yeelan Blues.

23 jirkaan garabka ka ciyaara xitta hal daqiiqo ma ciyaarin kubada cagta Premier League-ga, waxaana lasoo sheegayaa in tababare Roberto Di Matteo inuu xidigii hore ee Werder Bremen xariga qoorta u suri doono.

Waxaa Diyaariyey: Ahmed Jaangoan

E-mail: [email protected]

Caasimada — Somalia.

1)- 29/02/1956-01/07/1960,Waxaa dalka ra’isal wasaare ka ahaay Md.C/laahi Ciise Maxamuud. Waqtigaas dalka ma uusan qaadan xurnimadiisa.

2)- 01/07/1960-12/07/1960,Waxaa dalka ra’isal wasaare ka ahaay Md.Maxamed Xaaji Ibraahim
Cigaal.

3)- 12/07/1960-14/06/1964,Waxaa dalka ra’isal wasaare ka ahaay Md.C/rashiid Cali Sharmaarke.

4)- 14/06/1964-27/09/1964,Waxaa dalka ra’isal wasaare ku meel gaar ah ka noqday Md.C/risaaq
Xaaji Xuseen.

5)- 27/09/1964-15/07/1967,Waxaa dalka raisal wasaare ka noqday Md.C/risaaq xaaji Xuseen.

6)- 15/07/1967-21/10/1969,Waxaa dalka ra’isal wasaare ka noqday Md.Maxamed Xaaji ibraahim
Cigaal,waane markii labaad uu qabto jagadaas.

JAMHUURIYADDA DIMUQARAADIGA SOOMAALIYA.

Waa markii eey ciidamadda Milatari ay la wareegeen tala dalka.

7)- 21/10/1969-1/11/1969,Waxaa dalka ra’isal wasaare ka noqday Md.Maxamed xaaji Ibraahim
Cigaal.

8)- 1/11/1969-1/03/1970,Waxaa dalka ra’isal wasaare ka noqday Maxamed Faarax salaad kana
tirsanaa ciidamadda.

9)- 1/03/1970-1/02/1987,Dalku ma uusan lahayn ra’isal wasaare.

10)- 1/02/1987-3/09/1990,Waxaa dalka ra’isal wasaare ka noqday S/Guuto.Maxamed Cali
Samatar.
11)- 3/09/1990-24/01/1991,Waxaa dalka ra’isal wasaare ka noqday Maxamed Xawaadle Madar.

WAQTIGII DAGAALKA SOKEEYE.

12)- 24/01/1991-1/05/1993,Waxaa dalka ra’isal wasaare ka noqday Cumar carte Qaalib.

13)- 1/05/1993-8/10/2000, dalku ma uusan yeelan ra’isal wasaare.

WAQTIGII DAWALADDA KU MEEL GAARKA.

14)- 8/10/2000-28/10/2001,Waxaa dalka ra’isal wasaare ka noqday Prof.Cali Khaliif Galaydh.

15)- 28/10/2001-12/11/2001,Waxaa dalka ra’isal wasaare ku meel gaar ah ka noqday
Md.Cismaan Jaamac Cali.

16)-12/11/2001-8/12/2003,Waxaa dalka ra’isal wasaare ka noqday Md.Xasan Abshir Faarax.

17)-8/12/2003-3/11/2004,Waxaa dalka ra’isal wasaare ka noqday Md.Maxamed Cabdi Yuusuf.

WAQTIGII DAWLADDA FEDERAALKA KU MEEL GAARKA.

18)- 3/11/2004-29/10/2007,Waxaa dalka ra’iisal wasaare ka noqday Prof.Cali Maxamed Geedi.

19)- 29/10/2007-24/11/2007,Waxaa dalka ra’isal ku meel gaar ah ka noqday Md.Salim Caliyow.

20)- 24/11/2007-14/02/2009,Waxaa dalka ra’isal wasaare ka noqday Md.Nuur Xasan Xuseen.

21)- 14/02/2009-21/09/2010,Waxaa dalka ra’sal wasaare ka noqday Cumar C/rashiid Cali.

22)- 24/09/2010-31/10/2010,Waxaa dalka ra’isal wasaare ku meel gaar ah ka noqday
Md.C/waaxid Cilmi goonjeex.

23)- 31/10/2010-19/06/2011,Waxaa dalka ra’isal wasaare ka noqday Md.Maxamed C/laahi
Farmaajo.

24)- 19/06/2011-28/06/2011,Waxaa dalka ra’isal wasaare ku meel gaar ah ka noqday
Prof.C/weli Maxamed Cali Gaas.

25)- 28/06/2011-20/08/2012,Waxaa dalka ra’isal wasaare ka noqday Prof.C/weli Maxamed
Cali Gaas.

26)- 10/06/2012 —Ilaa Hadda, waxaa dalka ra’iisul wasaare ka ah Cabdulqadir Farax Shirdoon.

Qoraalkan kooban ee ka hadlaayo masuuliyiintii dalka soo martay soona qabatay jagada ra’isal wasaaraha tan iyo marka laga soo bilaabo inta aanan qaadan xuriyad buuxda ilaa iyo dawladdii federaalka ku meel gaarka ahayd.

Waxaa diyaarisay Caasimadda online.

Weeraryahanka kooxda Schalke Klaas-Jan Huntelaar ayaa go’aansan doona hadii uu u dhaqaaqayo Barclays Premier league kooxaha ka ciyaara. Sida uu qoray wargeyska The Sun.

Waxaa lagu qiimeeyaa 7 milyan oo ginni weeraryahanka xulka Holland, oo 29 jir ah, qandaraaskiisu wuxuu dhawacayaa dhamaadka xilli ciyaareedkaan waxaana doonaya Arsenal, Chelsea iyo Liverpool.

Wakiilka Huntelaar, Arnold Oosterveer ayaa yiri: “Klaas wax go’aan ah ma gaarin.

“Wuxuu dalabyo ka helay England, Italy iyo Spain.. waxaa sidoo kale macquul ah inuu sii joogo Germany.

“Wuxuu doonayaa inuu mastaqbalkiisa go’aan ka gaaro deyrta.

“45 maalmood ee soo aadan wuxuu doonayaa inuu ogaado qorshihiisa xiga wuxuuna go’aan ka gaari doona kubadiisa cagta mana ku saleysna wax lacag ah.”

Weeraryahankii hore ee Ajax, Real Madrid iyo AC Milan ayaa xilli ciyaareedkii lasoo dhaafay 48 gool u dhaliyey Schalke 47 kulan oo uu garoonka u galay.

W/Q: Ahmed Jaangoan

E-mail: [email protected]

Caasimada — Somalia.

Fernando Torres ayaa daaha ka qaaday inuu necbaa in loogu yeero niinaastiisa ‘El Nino’ wuxuuna sheegay inuu xitta ciyaaryahanada ay isku kooxda yihiin cayn jiray xilli uu ka welwelsanaa inay tageerayaashu bartaan magaciisa.

Weeraryahanka Chelsea, ayaa mid wax soo saar badan ka noqday Barclays Premier League markii uu Atletico Madrid uga soo biiray Liverpool, wuxuuna sheegay inuusan qofna rabin inuu la hadlo sababtoo ah wuxuu ka shaki qabay qatarta ka iman karta.

Isagoo la hadlaayey website-ka rasmiga ah ee Chelsea Torres ayaa yiri: “Ma sahlan inaad timaad meel kugu cusub aadna kasoo baxdo booskaada. Waxaad dareemi kartaa inuusan qof ku jecleysan ama waxaad u baahan kartaa saaxiibo cusub, ma ahan mid sahlan mana ka helo waxyaabahaas oo kale. Ma ahan mid fudud, sidaas darteed waxaad u baahan tahay inaad ciyaaryahanada iska difaacdo adigoo kaligaa ah.

“Waxay aheyd wax aan bartay markii aan 16 jirka ahaa ee aan kusoo biirayey qolka lebiska ee Atletico, qofna ma dooneyn inuu ila hadlo sababtoo ah way kuu hanjabayaan. Waxay iigu wici jireen “El Nino” sabatoo ah qofna ma aqoon magaceyga. Ma aanan jecleyn mana ahan wax la jeclaado, laakiin qolalka lebiska ayaa ahaa kuwo isku qasan iyadoo ciyaaryahanadu ay ka imaanayeen caalamka  daafihiisa, waxayna leeyihiin hab dhaqano kala duwan.

“Waxaan ahaa 19 jir kabtan u ah  Atletico, waxaan kooxda u wada ciyaareynay Demetrio Albertini oo kusoo guuleystay sedax Champions Leagues, iyo Sergi Barjuan oo nooga soo biiray Barcelona isaguna wax walba wuu soo qaaday, waxayna ahaayeen 32 jir iyo 33 jir.

“Kuray yar oo kabtan ah ayaan ahaa, sidaas darteed ma aheyn kabtan dhab ah, hada yaraanteydii ayaan wax uga soo bartay. Waan xirnaa caalamada kabtanka balse waxay ahaayeen hugaamiyeyaasha kooxda wax badan ayaana kasoo bartay.

“Waan xasuustaa markii aan imid Liverpool, Pepe Reina [Gool hayaha Liverpool] ayaa wax walba iga caawiyey wax walbana waa ii fududeeyey. Markii aan kabtanka u ahaa Atletico Madrid waxaan isku deyi jiray inaan qof walba caawiyo. Taasi waa aasaaska kubada cagta, waxaad u baahan tahay inaad sameyso dareen waxaadna isku deyeysaa inaad sameyso Group saaxiibo ah. Ma ahan mid sahlan mana dhacdo inta badan laakiin waa inaad isku daydaa.”

W/Q: Ahmed jaangoan

E-mail: [email protected]

Caasimada — Somalia.

Manchester City ayaa ka fikireysa inay Janaayo lasoo wareegto weeraryahanka xulka Uruguay iyo kooxda Liverpool Luis Suarez. Sida uu qoray wargeyska Daily Mail.

Roberto Mancini ayaa sidii uu u baahnaa uga caana maalin weeraryahanka reer Italy Mario Balotelli, wuxuuna ku fashilmay in si fiican uu ugu xisaabtamo kulamada Barclays Premier League.

Suarez ayaa hugaamiye xilli ciyaareedkaan u ahaa Liverpool, wuxuuna u dhaliyey 11 gool, laakiin waayihiisa aan la iska indha tiri Karin ka dib, tababare Mancini ayaa jeclaan lahaa inuu weeraryahankaan keeno Etihad Stadium.

Hadiiba uu Suarez ka tegaayo Anfield, waxaa qandaraaskiisa lagu burburin karaa 50 milyan oo ginni.

Liverpool ayaana ceshatay 25 jirkaan iyadoo ay xagaaga indhaha ku hayeen Paris St Germain iyo Juventus. Iyadoo uu haatan qandaraaskiisu dhacayo 2017ka.

W/Q: Ahmed jaangoan

E-mail: [email protected]

Caasimada — Somalia.