Warar xog ogaal ah oo aan helnay ayaa muujinaya in golaha wasiirada cusub ee Somalia lagu dhowaaqi doono toddobaadkan gudihiisa.

Si kastaba, liiska cusub ee golaha oo sida la sheegay ka koobnaan doona kaliya 18 illaa 25, ayaa waxaa ku badan kooxda hogaanka u heysa siyaasadda Somalia ee Damul Jadiid, oo qaadatay xubnihii ugu muhiimsanaa.

Ilo-wareedyo ku sugan Villa Somalia, ayaa inoo sheegay in Damul Jadiid ay qaadatay wasiiro ay ka mid yihiin, arrimaha dibedda iyo gudaha, warfaafinta, waxbarashada, ganacsiga, maaliyadda iyo kuwo kale.

Wasaaradda Arrimaha Gudaha Amniga iyo Qaranka: Waxaa sida la sheegay loo magcaabi doonaa Cabdi Kariim Xasan Guuleed, oo kasoo jeeda Beesha Habar Gidir, Sacad, ahna mid ka mid ah dadkii aas aasay Damul Jadiid.

Wasaaradda Waxbarashada: Hogaamiyaha ruuxiga ah ee Damul Jadiid, Faarax Cabdulqadir, ayaa lagu magacaabi doonaa wasaaradda waxbarashada, hiddaha iyo tacliinta sare, in kasta oo wasaarad maaliadda uu sidoo kale doonayo, balse aan weli la go’aamin

Sida xogta aan ku helnay Mr. Faarax ayaa halgan culus u galay wasaaradda arrimaha dibedda, hase yeeshee madaxweynaha ayaa ku qanciyay in taasi aysan macquul ahayn, waayo Farax kama soo jeedo afarta beel ee weyn (Hawiye, Dir, Daarood iyo Digil iyo Mirifle, waana Beesha Reer Aw Xasan oo beelaha shanaad la xisaabiyo.

Wasaaradda Maaliyadda: Tani ilaa iyo hadda lama go’aamin, waxaana madaxweynaha uu isku dayayaa inuu keeno qof uu aad ugu kalsoon yahay, maadama ay tahay isha dhaqaale. Waxaa macquul ah in loo magacaabo Faarax Cabdul Qadir, haddii la waayyo qof la aamini karo oo kasoo jeeda beelaha waa weyn.

Wasaaradda ganacsiga: Waxaa loo dhiibi doonaa Maxamed Axmed Abtidoon oo hadda ah xogheynta madaxweynaha, kuna magac dheer Koofi Shabaq, waa Saleebaan, Habar Gidir.

Wasaaradda Macdanta iyo Biyaha: Waxaa la siin doona qof ka iman doona dhowaan dibedda, oo kooxda ka tirsan, kaasi oo magaciisa aan helin, waxaa la sheegay inuu yahay Isaaq.

Wasaaradda Warfaafinta: Waxaa qaatay Dr Maxamed Nuur Gacal, oo kasoo jeeda Beesha Murusade, ee Hawiye.

Wasaaradda Arrimaha Dibedda: Nooma suurta galin inaan helno magaciisa, waxaase la sheegay in la siin doono Majeerteen.

Waxaa kale oo jira rag kale oo iyana xilal wasiiro ah heli doona, inkasta oo aysan kala caddeyn, waxaana ka mid ah Jamaal Maxamed Baarow oo kasoo jeeda Beesha Jareerweyne iyo Faarax Cabdisamad, oo Ogaadeen ah, kana tirsan Damul Jadiid.

Wakiilkii hore ee Tv-ga Aljazeera Fahad Yaasin, oo ka mid ah Damul Jadiid, ayaa heli doona safiir dal carbeed, siiba dalka Qatar loo badaniyo, ama wasiir ku xigeen.

Dad kale oo aan kooxda ku jirin ayaa iyana dhowr wasiir oo isaga aamusi ah la siin doonaa.

Nolal iyo geeri ayay u dhaxaysaa Xaalada Gabar 14 jir ah oo ciidamada Dowlada Soomaaliya ay ku kufsadeen Magaalada Muqdisho.

Gabadhan oo lagu magacaabo Xaliimo ayaa waxaa ay ku jirtaa Cisbitaal Banaadir xaaladeeda Caafimaadna waa ay liidataa Sida ay sheegayaan  dhaqaatiirta Cisbitaalka.

Mar gabartan ay u waramaysay Warbaahinta oo ay ka sheekeynaysay Sida ay u kufsadeen Ciidanka Dowlada waxaa ay sheegtay in iyadoo   ka soo adeegaysa Xili habeen ah dukaan u agdhawaa gurigooda uu isku duubay Askari dowlada ah kadibna ay aragtay Tobonkale oo isla Askarta oo ku soo ordaya iyada.

Waxaa ay sheegtay in waqtigaas uu Miirkeeda tagay ayna aragtay iyadoo Guri dhexjiifta,waxaana ay qirtay in Tobaneeyo ay ahaayeen Askarta kufsatay.

Hooyada gabadha dhashay oo ilmaynaysa ayaa sheegtay inaysan haysan wax dhaqaala ah oo ay ku dawaynayso gabadheeda waxaana ay sharciga ka dalbatay in xaqeeda loo soo dhiciyo.

Gabadha ayaa iyadana ku jirta Xaalada Miirbeel ah wajigeedana waa uu badalmay waxaana ka muuqday Jirdil ay ugaysteen Ciidamada Dowlada oo looga bartay in dadka Shacabka ay ku tuntaan ,mana jirto cid xaqa dadka shacabka u soo saarta.

Tababaraha kooxda Manchester United Sir Alex Ferguson ayaa qaba inay xilli ciyaareedkaan kooxdiisu fursad weyn u heli doonto inay ku guuleysato Champions League hadii ay daafacyadeedu caafimaad qabaan.

United ayaa guuleystay labadeedii kulan ee furitaanka Group H ay kaga horyimaadeen Galatasaray iyo Cluj, laakiin daafacyadeeda dhaawac qaba ayaa muran ka keenay awooda kooxda iyadoo Nemanja Vidic, Chris Smalling iyo Phil Jones ay inta badan xilli ciyaareedka dhaawac ku maqnaanyeen.

“Waa niyad jab inaanan inta badan ku guuleysan Champions League, gaar ahaan mararka qaar waxaan filayaa inaan iska luminay,” ayuu u sheegay Daily Mirror.

“Laakiin ma diidi kartid. Inaad had iyo jeer aad ka fiirsato sanadka xiga. Kama dambeysta waxaa lagu qabanayaa Wembley xilli ciyaareedkaan waxeyna noo tahay fursad qaali ah.

“Hadii aan daafacyadeyda dib u heli karo, waxaan u heysanaa fursad qaali ah.”

W/Q: Ahmed Farah Jaangoan

E-mail: [email protected]

Mogadishu, Somalia.

Gudoomiyaha kooxda Chelsea Bruce Buck ayaa xaqiijiyey in John Terry uu sii ahaan doono kabtanka Chelsea, sida uu qoray wargeyska Talksport.

Terry ayaa afar kulan la ganaaxay xilli lagu helay dishibiil xumo inuu daafaca QPR Anton Ferdinand kula kacay wax yaabo cunsuri ah.

Isagoo gudoomiyuhu la hadlaayey barnaamijka Weekend Sports Breakfast eek a baxa Talksport, Buck iyo gudoomiyaha fulinta Chelsea Ron Gourlay ayey cadeeyeen inuu Terry sii ahaan doono hugaamiyaha Chelsea.

“John Terry wuu sii wadan doonaa sii ahaanshiyaha kabtanimada kooxda,” ayuu yiri Buck.

“Su’aasha kale ee aad jeceshahay inaad I weydiiso waa hadii aan ganaaxeyno kulamo, kuna darso inay afar Kulan FA-gu ganaaxeen inaguna aanan ganaax dul dhigeyn .

“Laakiin waxaan ka qaadeynaa talaabo dishibiliinka ah.”

W/Q: Ahmed Farah Jaangoan

E-mail: [email protected]

Mogadishu, Somalia.

Ciyaaryahanka qadka dhexe ee kooxda Barcelona Cesc Fabregas ayaa amaan kala dul dhacay xidiga ay isku kooxda yihiin ee Lionel Messi, ka dib markii ciyaaryahanka reer Argentina uu sedaxleey ka dhaliyey kulankii ay 5-4 ku dubteen kooxda Deportivo La Coruna.

Blaugrana ayaa heysatay hugaan 3-0 ah, iyadoo casaan loo taagey Javier Mascherano wiilasha Tito Vilanova ayaaba ku sigtay inay guul kasoo qaadan waayaan kooxda martidala loo ahaa.

Dhanka kale Fabregas ayaa amaan kala dul dhacay geesigii Sedaxleyda, wuxuuna ku sheegay mid usoo hooyey sedax dhibic oo qaali ah.

“Messi wuxuu safar dheer kasoo galay xulkiisa qaranka halkaan ayuuna had iyo jeer nala joogay. Wuxuu noo qabtaa wax badan. Wax walba waa uu la socdaa. Laga yaabee inuu Messi caalam kale ka yimid.” Sidaas waxaa yiri Fabrigas oo la hadlaayey saxaafada.

W/Q: Ahmed Farah Jaangoan

E-mail: [email protected]

Mogadishu, Somalia.

Wasaarada Awqoofta iyo Arimaha Diinta ayaa digniin kulul ka soo saartay in lagu takri falo Ciida soo aadan Xoolaha Nool Sidaas waxaa Saxaafada u sheegay Agaasimaha Wasaarada Awqoofta Sheekh Cali Dheere ayaa.

Ciidii hore ayay dhacday dabar gooyn loogu tala galay in la dhameeyo xoolaha soomaaliya oo ah qayraadka ugu weyn oo ay haystaan dadka soomaaliyeed waxaana sanadkii hore dhacday in la gowraco xoolo riman iyo kuwo caano leh oo isku jira lo Geel iyo Ari, irintaasina uu ka digaayo in ay sanadkaan ay dhacdo tii sanadki hore dhacday oo kale.

Sheekh Cali Dheere ayaa tilmaamay inay u muuqato in ay dhici doonto dhacdadii sanadkii hore oo kale maadama uu sheegay ay meesha ka baxeyn golihii wasiirada walina aan la magacaabin wasiiro cusub taasina ay keeni karto la xisaabtan la ‘aan dadka xoolaha ka ganacsata iyo kuwoa doonaya in ay ku takri falaan qayraadka alle uu ku maneystay  soomaaliya, waxaana uu dowlada Soamaaliya ugu baaqay in sida ugu dhaqsiyaha badan arintaani lagu baraarugo gudi la socdana loo sameeyo si looga hor tago xaalufinta xoolaha.

Waxaa la xusuustaa in Sanadkii hore xoolo badan oo isugu jira geel lo iyo ari oo intooda badan ay rimanaayeen qaarna ay ahayeen kuwo caano leh oo la nuugayay ay dowalada turkiga iyo dowlado kale ay u gowraceen dadkii ay abaarta sameysay sanadkii hore taasina ay saameyn ku yeelatay xoolaha soomaaliya oo ah nimcada  ugu weyn uu alle ku maneystay umadda soomaliyeed.

Magalaada Muqdisho ayaa waxaa haatan si wayn looga diyaar goorawayaa Maalinta farxada badan ee Ciida waxaana mashquul noqday goobaha lagu iibiyo Xoolaha Nool.

War hada soo dhacay ayaa sheegaya in qarax saakay ay ku waabiriisteen Ciidamada Dowlada Itoobiya ee jooga magaalada Beledwayne.

Qaraxa ayaa waxaa Ciidamada Itoobiya lagula eegtay wadada isku xerta magaalada beledweyne iyo deegaanka Janda kundishe .

Sida dad ku sugan Beledweyne ay inoo sheegayaan  qaraxa ayaa waxaa lala eegtay gaari ay wateen Ciidanka itoobiya inkastoo aan la ogayn qasaaraha dhabta ah.

Itoobiyanka ayaa Xer xeray dad ka agdhawaa goobta uu qaraxa ka dhacay iyagoo ku tuhmaya inay ka dambeeyeen qaraxa.

Bandow ayaa la sheegay in Saakay ay ku soo rogeen Xaafadaha magaalada waxaana la sheegay inay baarayaan Miinooyinka kale oo lagu dabayo.

Isaga oo ku hadlaya cod degan ayaa Sheikh Maxamed Farduun, waxa uu liis ku qoray magacyada 18 ka mid ah ehelkiisa, oo uu sheegay inay habeenkii khamiista ku geeriyoodeen weerar diiyaaradda dagaal ee MiG ee ciidanka cirka Syria ay ka fuliyeen magaalada waqoooyi ee Maaret al-Numaan.

“Fatma Assam Hajj Khamis, Abdel Aziz Hajj Khamis, Abu Abdel Azziz Hajj Khamis, Hassan Hajj Khamis,” ayuu tiriyay magacyadooda kadibna wuu joojiyay oohin darteed, oo wuu dhameyn kari waayay.

Waxa uu yiri “mar alle markii aan maqalnay dhowaqa duqeynta diyaaradda, wxaana u cararay dhinaca waddada, waxaana arkay gurugii eedadey oo gabi ahaanba dhulka lala simay, dadkii ku jirayna ay ku naf baxeen”.

Intaa kadib waxa uu u sheegay weriye ka tirsanaa CNN oo uu wareysi siinayay “Kulama hadli karo intan ka badan, waxaan hayaa dhammaan magacyada ehelkeyga, waana aqbalayaa qadarta Allah”

Weerarkaas ayaa waxaa ku naf waayay guud ahaan 25 qof, oo 15 ka mid ahaa jirkooda uu gubtay, illaa laga aqoonsan waayo.

In ka badan toddobaad ayaa magaalada Maaret al-Numaan waxa ay ahayd xudunta dagaalada u dhaxeeya ciidamada Syria iyo kuwa macaaradka ah.

Weerarka ayaa yimid isla maalintii kooxda dhaqaaqa caalamiga ah ee Avaaz ay sheegtay in ciidamada Syria ay 19 bilood ee na dhaafay ay afduubteen kadibna ay dileen 28 kun oo ahaa shacab iyo dad ehello la ah kooxaha mucaaradka.

Halkan ka arag Sawirrada dagaalka Syria.

Wararka naga soo gaaraya magaalada Kismaayo ee xarunta Gobolka Jubbada Hoose ayaa sheegaya in ciidamada Dowlada Soomaaliya halkaasi ay caawa ka wadaan baaritaano adag oo lagu baadi goobayo dadka amni darada ka geysnayo magaalada.

Sida dadka deegaanka ay u sheegeen Caasimada Online ciidamada Dowlada Soomaaliya ayaa waxay magaalada kasoo qabteen waxyaabaha qarxa iyo hub,waxaana ay xabsiga u taxaabeen dadkii lagu soo qabtay xubka.

Ciidamada Dowlada ayaa gudaha u galay dhowr farmashiyayaal oo ku yaala bartamaha magaalada waxaana la sheegay inay soo qabteen waxyaabaha qarxa oo ku jiray farmashiyeyaasha iyo bastoolado.

Dadka deegaanka oo ka agdhow goobta howlgalka uu ka dhacay ayaa sheegaya in ciidamada ay kaxeysteen wilal gadayay Farmashiyeyaasha kuwaasi oo la dhigay xabsiga magaalada.

Dhanka kale waxaa magaalada ka socda caawa baaritaano adag,iyadoo dadka lagu soo rogay bandow ku eg xiliga salaada Subax ee Geeska Africa.

Kismaayo seddexdii habeen ee lasoo dhaafay waxaa ka dhacay dilal qorsheysan oo loo geystay dad rayid ah.

Ciidamadda iyo maamulka magaalada Kismaayo ayaa waxay amar adag ay dul dhigeen shacabka ku dhaqan magaalada Kismaayo ee xarunta Gobolka Shabeelaha Hoose.

Ciidamada maamulka magaalada ayaa ku amray shacabka magaalada Kismaayo inaysan dhaqdhaqaaq sameyn karin laga bilaabo lixda maqrib ilaa shanta subaxnimo xiliga Soomaaliya.

Arintaan ayaa saameyn xoogan ku yaalan doonto haweenka iibiya qaadka iyo haweenka caanaha ku iibiya bartamaha magaalada Kismaayo kuwaasi oo la sheegay in xilli dambe ay ku gaari jireen magaalada.

Arintaan waxaa ciidamada ay ku sheegeen inay tahay mid looga hortagayo amni darada kismaayo ku soo korortay magaalada Kismaayo maalmihii ugu dambeeyay.

Magaalada Kismaayo waxaa maalmihii ugu dambeeyay ka dhacayay dilal qorsheysan kuwaasi oo loo geystay dadka shacabka ah ee ku dhaqan magaalada Kismaayo.

Muwaadin Soomaali ah ayaa xalay dhallinyaro kale Soomaali ah waxa ay ku dileen Magaalada King Wilmes oo ka tirsan Gobalka Eastern Cape ee dalka Koonfur Afrika.

ALLAHA u naxariistee Wiilkan dhintay oo magaciisa la iigu sheegay Bile, ayaa dhallinyaro Soomaali ah oo muran xagga ganacsiga ah uu kala dhaxeeya waxa ay kala dageen marxuumka gaari uu lahaa, iyagoo ka dibna mindi ama toorey kaga dhuftay surka taasi oo sababtay inuu durbadiiba ku geeriyoodo isla goobta uu falku ka dhacay, waxaana warar aan wali si rasmi ah loo xaqiijin ay sheegayaan in Bile qoorta looga jaray mindida, balse Booliska ayaa laga war sugayaa oo hadda meydka marxuumka gacanta ku haya.

Muranka dhalinyaradani Soomaaliyeed ayaa salka ku haya meherado ganacsi oo la isku ag qabtay, taasi oo aalaaba dalkani Koonfur Afrika caado ka noqotay in lagu dagaalamo maxaa dukaankaaga ganacsi iigusoo dhawaysay.

Booliska K/Afrika, oo hareereeyey goobta, ayaa maanta la wareegay meydka Marxuum Bille, iyagoo sheegay inay baaritaano deg deg ku samayn doonaan qaabkii loo dilay muwaadinkani Soomaaliyeed iyo cidda ku gacansiisay Soomaalidan inay si dhuumaalaysi ah u baxsadaan.

By C/risaaq IndhaJaceyl

Cape Town, South Africa

E – Mail : – [email protected]

21-sano kadib ayaa maanta Madaxweynaha Jamhuuriyada Soomaaliya Xasan Sheekh Maxamuud waxa uu ka Guddoomay warqadihiisa aqoonsiga Safiirka cusub ee Soomaaliya ufadhin doono Midowga Yurub kaasi oo dhawaan lasoo magacaabay.

Kadib Xaflad ka dhacaday Aqalka madaxtooyada ayaa Madaxweynaha dowladda Soomaaliya Xasan Sheekh Maxamuud uu kulan kula qaatay wafidagan uu horkacayo safiirka cusub ee Midowga Yurub  Madaxtooyada waxaana kulankooda uu kaga guddoomay warqadaha aqoonsiga ee safiirnimo.

Kulanka kadib ayaa waxaa shirjaraa’id si wadajir ah u qabtay Wasiirka arimaha Dibada Xukuumadii hore C/laahi Xaaji Xasan Iyo Safiirka cusub ee Midowga Yurub u fadhin doona dalka Soomaaliya Cervone Diulso kuwaasi oo labada ka sheekeey muhiimada safaaradan ay uleedahay dalka Soomaaliya.

Intaa kadib Ku simaha wasaarada arimaha dibada Xukuumadda Soomaaliya C/laahi Xaaji Xasan oo ugu horeen halkaasi ka hadlay ayaa sheegay in safiirkaan cusub ee Midowga Yurub uu sii xoojin doono xiriirka ka dhaxeeya Soomaaliya iyo Midowga Yurub oo 20-sano ee lasoo dhaafay wanaagsanaa.

Cervone Diulso Safiirka cusub ee Soomaaliya Midowga Yurub ayaa isna dhankiisa sharaxay qorshaha Midowga Yurub ee safaaradan cusub isaga oo xusay in muddo 21-sano kadib uu isaga noqday safiirkii ugu horeeyay ee loosoo magacaabo Soomaaliya.

Tani ayaa waxaa ay Muujinaysaa in Muqdisho ay ku soo noqotay Muqdishadii la yaqiinay Waagii bari Samaadkii.

Ra’iisul Wasaarehii hore ee Somalia Cabdi Weli Maxamed Cali Gaas, ayaa shalay gaaray magaalada Gaalkacyo ee xarunta gobollka Mudug, kadib markii uu kasoo farxashay howshii uu ka hayay Dowladda Federaalka Somalia.

Markii Prof. Gaas uu halkaas tagay aad ayaa loo soo dhweeyay, waxaanu yiri erayo ay ka mid ahaayeen “Waxaan usoo laabtay inaan ka qeyb qaato oo kaalinteedu ku biiriyo horumarka Puntland, dadkana aan la tashto”

Marka la fiiriyo booqashada Gaas, xilliga ay kusoo beegmatay, xaaladda siyaasadeed ee Puntland iyo inay ka go’an tahay inuu halkaas muddo sii joogo, waxaa soo baxay su’aalo siyaasadeed iyo war aan farxad u lahayn Madaxweynaha Puntland Cabridraxmaan Faroole.

Ujeeda Booqashada Gaas.

Gaas, waxa uu arkaa fursad dahabi ah oo uu kula wareegi karo hogaanka Puntland, isaga oo dhinacyo badan wax ka eegaya, taageero xooganna heysta.

Xaaladda Puntland ayaa ah mid iminka cakiran. Faroole waxa uu waqtiga kaga eg yahay 8-da January ee 2013, hase yeeshee waxaa ka go’an inuu shan sano oo kale ku darsado, habkuu doono ha usoo maro’e sharci iyo sharci la’aan intaba.

Hase yeeshee Faroole farqaha ayaa lagu dheggan yahay, oo waa laga diidan yahay inuu dastuurka ka tallaabsado.

Xog aan helnay ayaa sheegeysa in Gaas uu deegaanada Puntland ka billaabi doono olole deg deg ah, balse xoog ku socon doona, isaga oo adeegsanaya lacag iyo taageero shacbi, si uu u noqdo Madaxweynaha Puntland.

Socdaalkiisa kuma koobna oo kaliya Gaalkacyo, ee waxa uu mari doonaa deegaanada Puntland oo idil, haba ugu weynaadaan’e Garoowe, Boosaaso, Qardhow iyo kuwa kale.

Faroole oo aan la dooneyn.

Intii uu hayay xilka ra’iisul wasaarenimada Somalia, Gaas waxa uu ogaaday in siyaasadaha Faroole aysan u wanaagsaneyn dadka deegaanka iyo Soomaalida oo idil, taasi oo Faroole uu ku kasabaday mucaarado xoogan, sidaa darteedna uu meesha ka tuuri karo.

Dad badan oo reer Puntland ah ayaa aaminsan in maqaamka Puntland ee Somalia uu yahay mid aan daah saarneyn, hase yeeshee siyaasdaha kaligii talisnimo ee Faroole ay Puntland wax badan ku seegtay, ayna muhim tahay in Faroole uu meesha ka baxo.

Inkasta oo aysan ahayn xeer qoran, haddana xeer beeleedka Puntland, ayaa muujinaya in beesha Faroole ay qaadatay shanteedii sano, ayna tahay waqtigii ay jagada kusoo laaban lahayd beesha Gaas.

Xusuuso waxay ku billaabatay Cabdullahi Yuusuf, Cadde Muuse iyo Faroole, waana markii ay kusoo laaban lahayd jufada Gaas iyo allaha u naxariistee Madaxweyne Yuusuf, mana jiro qof iminka ka mudan Gaas, oo beesha ay soo xulan lahayd.

Waxaa kale oo xusid mudan in marka laga reebo labada beel oo ay kasoo kala jeedaan Gaas iyo Faroole, beesha gobolka Bari ay si aad ah u diidan tahay Faroole, taasi oo war wanaagsan u ah Gaas.

Taageerada DF.

Gaas waxa uu madaxweynenimada ku taageeray Xasan Sheikh, wuxuuna si marxabeyn leh xilkii uu hayay ugu wareejiyay Saacid, isaga oo aqbalaya siyaasadda cusub ee ah “Wejiga cusub”, waxaana taas beddelkeeda uu ka helayaa taageero xoogan.

Ilo wareedyo ku sugan Villa Somalia, ayaa Caasimada Online u xaqiijiyay in madaxda Somalia ay si buuxda gadaal uga riixayaan sidii Gaas uu ula wareegi lahaa maamulka Puntland, taasi oo ay u arkaan inay aad isugu soo dhoweyn karto Dowladda dhexe iyo Puntland.

Xasan Sheikh, ayaa rumeysan in Puntland ay leedaahay miisaan siyaasadeed culus, oo ay muhim u tahay dowladda dhexe, sidaa darteedna ay lagama maarmaan tahay sidii loo fariisin lahaa qof lala macaamili karo.

Qorshaha Gaas ma ahan mid hadda billowday, ee wuxuu socday muddo tan iyo markii uu ogaaday inuusan madaxweynaha Somalia heli doonin iyo ra’’isul wasaare midna, sidaa darteedna u Puntland u arkay fursad muhim ah iyo sidoo kale maqaam uu mar kale gorgorton siyaasadeed ku gali doono.

Faroole iyo Gaas waxa ay kala tageen muddo fog markii uu Faroole xansaday qorshaha siyaadadeed ee Gaas.

Si kastaba ku labaashada Gaas ee Puntland ma ahan war farxad u leh Faroole, oo lama oga sida uu madax xanuun ka yahay iminka. Hadadad dooneyso caddeyn, booqo website-ka radiyaha ku hadla afka Faroole iyo maamulka Puntland ee uu maamulo Maxamed Faroole oo ah wiilka Faroole ee Garoweonline.com, kaasi oo marnaba aan laga baahin booqashadii Gaas ee Gaalkacyo, xilli warbaahinta Soomaalida oo idil oo ay ku jirto Caasimda Online ay si wanaagsan uga hadashay.

W.Q: Axmed Cali Sheikh

Tifaftiraha Caasimada Online.

Ra’iisul Wasaaraha cusub ee Somalia C/qaadir Faarax Shirdoon, ayaa shaaca ka qaaday qodobo dhowr ah uu xooga saari doona ama uu sameyn doono inta uu yahay ra’iisul wasaaraha dalka.

Shirdoon ayaa u ballan qaaday shacabka Soomaaliyeed in arrimaha ugu waawayn ee uu xooga saarayo afarta sano ee soo socta inay tahay:-

1 – Hagaajinta ammaanka.
2 – Ku soo celinta dadka bara kacay guryahooda.
3 – Bixinta adeegyada bulshad.
4 – Dib u noolaynta dhaqaalaha qaranka.
5 – Abuuridda jawi wanaagsan oo maalgashi.
6 – La dagaalanka musuqmaasuqa, xag jirnimadda, argagixisanimadda iyo burcad badeedda.
7 – Hagaajinayo nidaamka garsoorka
8 – Dhisidda dawlad tayo leh.
9 – Sii wadidda dib-u-heshiisiinta qaran.
10 – Iaalinta midnimada Soomaaliya.
11 – Dib usoo celinta dawrkii Soomaaliya ee masraxa caalamka.

Ra’iisul wasaare Shirdoon ayaa sidoo kale yiri “Dawladaydu waxay ka shaqayn doontaa in ay dhisto xidhiidh ku dhisan wada shaqayn iyo is ixtiraam la geesood ah oo ku aaddan waddamada dariska ah iyo beesha caalamka,”

“Dib ayaan u hindisi doonaa dawrka Soomaaliya ee caalamka iyo urur gabaleedyada ay Soomaaliya xubno ka tahay si aan u soo celino sharaftii iyo maqaamkii Soomaaliya ee masraxa caalamka.”

Shirdoon ayaa la rajaynayaa in uu dhiso golohiisa wasiiro maalmaha soo socda. Dastuurka Soomaaliya ayaa siinaya ra’iisul wasaaraha 30 maalmood si uu u soo dhiso gole wasiiro uuna hor keeno baarlamaanka si loo ansaxiyo.

Saraakiisha Ciidamada Somalia, ayaa ka warbixiyay meydka nin shalay laga soo qaaday xeebta Aljazeera ee magaalada Muqdisho. Waxaa shir  jaraa’id magaalada Muqdisho ku qabtay taliyaha booliiska gobolka Banaadir General Axmed Xasan Maalin iyo taliyaha ciidamada Nabad sugidda gobolka Khaliif Ereg, waxana aay sheegeen inuu ninkaas ka mid ahaa saraakiisha Al-Qacida.

Halkan ka dhageyso Codkooda.

Siyaabaha Miisaankaaga loo maareeyo

In aad si xaad dhaaf ah u cayisho waxay halis weyn kuu gelineysaa dhibaatooyin caafimaad sida dhiig kar sare, sonkorow iyo wadne xanuun. Kala doorashooyin caafimaad samee maalin walba halkii aad marna cunto cuni lahayd marna iska joojin lahayd.

Si tartiib ah u luminta 227 garaam – 1 kiilo toddobaadkiiba ayaa ugu wanaagsan. Haddii aad miisaan badan si deg deg ah u lumiso, badanaa cayilku dib ayuu kuugu soo noqonayaa.

• Cuntooyin ha ka boodin. Maalinta ku billaabo quraac caafimaad leh. Cunidda ugu yaraan 3 cunto maalin kasta waxay jirkaaga ka caawinaysaa inuu helo tamarta uu u baahan yahay waxayna kaa celinaysaa baahida.

• Xakamee cabbirka qaybtaada. Isticmaal saxan yar isla markaana qaado xaddiyo yar oo cuntooyin kala duwan ah. Ilbiriqsiyo ka dib ha ku noqonnin.

• Cun markaad gaajooto. Ka fogow in aad cunto u cunto in aad isku dejiso, ama in aad caajistay ama diiqootay awgeed. Soco ama wax aad ku raaxaysato samee.

• Qor cuntada aad cunto oo dhan. Ku soo dar nooca cuntada, xaddiga iyo waqtiga aad cuntay. Tani waxay kaa caawinaysaa in aad noqoto mid aad ula socda si markaas aad u awooddid in aad si fiican u maareyso cunto cunkaaga.

• Jir dhis samee. Ka soo hubi takhtarkaaga ka hor inta aadan billaabin jir dhis joogto ah. Noqo mid aad u fir-fircoon adigoo jaranjarada qaadanaya ama baabuurkaaga meel fog soo dhiganaya. U qasad in aad jir dhis sameyso 1 saac maalin walba, ugu yaraan 5 maalmood toddobaadkii adigoo sameynaya hawlaha sida socosho, bushkuleeti fuulid, dabbaalasho, orod iyo meel sare fuulid. Fasallada lagu barto jir dhisku way ku caawin karaan.

• Iska xaddid sonkorta iyo mac-macaannada. Iska xaddid cuntada ay ku jirto sonkorta lagu daray sida mac-macaanka, doonaatka, buskudyada iyo nac-naca. Kuwaani waxay leeyihiin kalooriyo fara badan iyo nafaqo yar. Cabitaannada u isticmaal macaaneeye macmal ah halkii sonkor aad ka isticmaali lahayd.

• Biyo cab. Dadka cabba biyo fara badan waxay u badan yihiin in ay lumiyaan miisaan badan. Cab 6-8 koob oo biyo ah maalin kasta.

• Ka taxaddar marka aad dibedda cunto ka soo cuneysid. Marka aad dibedda cunto ka soo cuneyso, dooro maraq iyo khudrad ama cuntooyin yar-yar oo dufanku ku yar yahay. Weydiiso suugo iyo labeenta ansalaatada la marsado. Haddii qaybuhu ay ballaaran yihiin, wax ka wadaag saxan ama kala bar guriga u qaado.

• Cunto fudud oo caafimaad fiican leh. Ku raaxayso furuto aan la warshadayn, khudrad, ama garoor fudud oo aan dufan lahayn halkii aad ka cuni lahayd cuntooyin fudud oo la soo baakadeeyey. Qarjawleyaasha dufanku ku yar yahay, siiriyaalka iyo boorashku cuntooyin fudud oo fiican ayey noqdaan.

• Isticmaal dufan yar marka aad cunto karineyso. Dub, bir iyo dhuxul ku dub, sol, ama uumi ku kari cuntada halkii aad ka shiili lahayd. Baruurta iyo maqaarka ka jar hilibka. Dufanka ka miir.

• Noqo dukaan wax ka soo iibsade caqli badan. Cuntooyinka horey u sii qorsheyso. Isticmaal taxane kana fogow dukaan wax ka soo iibsashada markaad aad gaajaysan tahay. Soo iibso furuto, miro wadajira, khudrad, cuntada badda, digaag iyo hilib caato ah. Haddii aad cunto waxyaabaha caanaha laga sameeyo, soo iibso kuwa aan dufan lahayn ama uu ku yar yahay.

Isbeddello yar-yar waxay horseedi karaan natiijooyin wanaagsan. halkaan ku waydii haddii aad wax su’aalo ama walaac ah qabtid.

Waxaa diyaariyay Xiriirka Caafimaadka Soomaaliyeed.

Tababaraha kooxda Real Madrid Jose Mourinho ayaa rumeysan inuusan jirin tusmo loogu daydo Barcelona ka dib markii ay gacmaha Real Madrid La Liga halka ay Chelsea sanadii hore ka reebtay Champions League.

Catalans ayaa inta badan lasoo jeedinaayey inay tahay koox mudan in lagu daysado ka dib guulohoodii dhowaanahaan, laakiin Ninka reer Portugal uma muuqato falsafad kubadeed Barca iyo inay tahay koox quwadeedii luntay.

“Waxaan u maleynayaa in la gaaray goortii ay dadku iska dhaafi lahaayeen ka hadalka Barcelona,waan inaysan dadku is xiijin is bar-bar dhig ay nagula sameeyaan,” ayuu Special One u sheegay  France Football.

“Waa maxay sababta ay dadku uga hadlayaan Barca? Real Madrid ayaa ah horyaalka Spain, Chelsea-na waa horyaalka Yurub. Barcelona waqtigaan ma ahan labadaasna midkood.”

W/Q: Ahmed Farah Salaad Jaangoan

E-mail: [email protected]

Mogadishu, Somalia.

Jack Wilshere ayaa lagu soo dari doonaa kooxda Arsenal ee la ciyaareysa Norwich, sida uu akoonkiisa Twitter –ka ku xaqiijiyey wakiilkiisa Simon Bayliff.

Lama filaneynin inuu ka mid ahaado kooxda Gunners ay wajaheysa Canaries laakiin waxaa jira fursado u banaan oo ah inuu soo fariisto kursiga keydka sida aan kasoo xiganay wargeyska Talk Sport.

Bayliff ayaa ku qortay akoonkiisa Twitter: “Waxaan idiin sidaa laba war oo farxad leh oo maalmo isku xiga inta badan dhicin. Jack wuxuu ka mid noqday kooxda koowaad ee Arsenal Football Club ee u safartay Norwich !! Waana wax lagu farxo.”

W/Q: Ahmed Farah Salaad Jaangoan

E-mail: [email protected]

Mogadishu, Somalia.