Luuq (Caasimada Online) – Ciidamada Itoobiya ee qaybta ka ah howlgalka ATMIS, kuna sugan gobolka Gedo ayaa si toos ah u faro-geliyay dagaal beeleedka degmada Luuq, kadib markii ay dowlad goboleedka Jubbaland ku wareejisay amniga guud ee degmadaasi.

Ciidamada Itoobiya ayaa door way ka qaatay sugidda amniga intii uu socday dadaalka nabadeed ee uu halkaas ka waday madaxweyne ku xigeenka koowaad ee Jubbaland, Maxamuud Sayid Aadan, ayaga oo la wareegay amniga hoolka la’isugu keenay beelaha.

Sidoo kale ciidamada Itoobiya ayaa haatan isku ballaariyay qaybo badan oo kamid ah degmada Luuq, si ay uga hortagaan dagaal mar kale ka dhaca gudaha degmadaasi.

Maxamuud Sayid Aadan oo kulan la yeeshay saraakiisha ciidamada Itoobiya oo uu hoggaaminayay taliyaha qeybta sadexaad ee howlgalka ATMIS Besfat Fente iyo masuuliyiin kale oo katirsan howlgalka ATMIS ayaa kala hadlay amniga iyo dagaalka Al-Shabaab.

“Kulanka ayaa lagaga hadlay xaalada amniga, howlgalada kasocda deegaanada Jubaland ee lagu ciribtirayo Khawaariijta iyo qorshaha bixitaanka Ciidamada ATMIS.” ayaa lagu yiri qoraal kooban oo ay Jubbaland kasoo saartay shirkaasi.

Dhinaca kale madaxweyne ku xigeenka Jubbaland ayaa sheegay in guddi gaar ah loo xil-saarayo soo qiimeynta hantidii lagu gubay Suuqa Degmada Luuq ee Gobolka Gedo, ayada oo uu guddigaas diyaariyo qorshaha lagu gacan-qabanayo Dadkaas.

Waxaa kale oo uu nasiib darro ku tilmaamay in Dagaal Beeleedka ka dhacay Degmada Luuq lagu gubo Suuqa Degmadaas oo muhiim u ah Bulshada halkaas ku sugan maadaama aanay ka maarmin badeecaha lagu iibiyo oo safar fog loo galo.

“Waxa aad uga xunnahay Dadka Soomaaliyeed ee Suuqaas ku hanti beelay, in ka badan 320 Ganacsi in lagu gubay, waan garab taaganahay, labadeenna heer Dowladeed waxa aan codsanaynaa in aan la cidleyn Dadkaas oo la gacansiiyo, Guddi Ayaan u xilsaaraynaa si dib noloshooda gacan looga siin lahaa” ayuu yiri madaxweyne ku xigeenka Jubbaland.

Xaaladda degmada Luuq ayaa haatan ah mid deggan, kadib dagalalo culus oo halkaas ku dhex-maray laba beelood, kuwaas oo iska dilay dad badan, iskana gubay goobo ganacsi.

Muqdisho (Caasimada Online) – Wararka naga soo gaaraya magaalada Muqdisho ayaa sheegaya in goordhow dhawaqa rasaas xooga iyo qaraxyo bambaanooyin ah laga maqlay gudaha xabsiga dhexe ee Xamar, waxaana lasoo wariyay inuu xiigay dagaal toos ah.

Ilo wareedyo lagu kalsoon yahay ayaa innoo sheegay in markii hore qaraxyo ay ka dhaceen gudaha xabsiga, kadibna ay xigtay is rasaaseyn toos ah.

Wararka ayaa intaasi kusii daraya inay dagaalamayaan ciidamada ammaanka, gaar ahaan kuwa Asluubta ee gacanta ku haya xabsiga iyo qaar kamid ah maxaabiista oo hub heshay.

Lama oga khasaaraha ka dhashay, waxaana haatan xaaladdu ay tahay mid aad u kacsan, mana jiro illaa iyo hadda wax war ah oo kasoo baxay laamaha amniga Soomaaliya.

Illa iyo hadda ma suuragalin in la qabto ama la toogto maxaabiista gudaha xabsiga dhexe ka dhax dagaalamaya, ayada oo haatan la maqlayo rasaas teel teel ah.

Horay sidaan oo kale ayaa weerar kan lamid ah oo laga soo dhex abaabulay uu ka dhacay isla xabsiga dhexe ee Xamar, halkaas oo ay ku xiran yihiin xubno loo haysto Shabaabnimo iyo kuwa kale oo ay ku eedeysan dambiyo kala duwan.

Wixii soo kordha kala soco Caasimada.net

Muqdisho (Caasimada Online) – Wasiirka Arrimaha Dibadda iyo Socdaalka dalka Masar Badr Abdelatty ayaa maanta yimid Muqdisho, wuxuuna la socday diyaaradda Egypt Air oo Soomaaliya ka bilaabeysa duulimaad toos ah, waa duulimaadkii ugu horeeyey 30 sano oo Soomaaliya burbursadeen kadib.

Wasiirka ayaa khudbad ka jeediyey qeybta VIP-da ee garoonka Aadan Cadde, isagoo muujiyey in dowladda Masar ay taageero weyn u heyso Soomaaliya, isagoo ka hadlay kursiga aan joogtada aheyn ee Soomaaliya ay ka heshay golaha ammaanka ee Qaramada Midoobey.

“Waxaan dowladda iyo shacabka Soomaaliyeed, uga hambalyaynaya munaasabadda xuska maalinta xorriyadda, iyo sidoo kale doorashada Soomaaliya ee xubinnimada Golaha Ammaanka oo dhaqangaleysa bisha Janaayo ee socota,” ayuu yiri wasiirka arrimaha dibadda Masar.

Wasiir Badr ayaa sheegay in Masar ay ka go’an tahay inay taageero u fidiso Soomaaliya, isagoo sheegay in Soomaaliya ay u rajaynayaan inay ku guuleysto xilka gudashada kursigaas, isla markaana ay noqoto Soomaaliya xubin adag oo ka tirsan golaha.

“Mudanayaasha sharafta leh, sida aad ogtahiin gobolka waxaa ka taagan caqabado horleh oo u baahan in aan dadaalkeenna isku geyno oo aan si dhow uga tashano, anagoo ka duulayna xiriirka soo jireenka ah ee labada dal, iyo in la isku duwo wada-shaqeynta ku aadan arrimaha kala duwan sida Ixtiraamka mabaadi’da deris-wanaagga iyo in laga fogaado fargelinta arrimaha gudaha ee dalalka,” ayaa yiri.

Wasiirka Arrimaha Dibadda Masar ayaa intaas ku sii daray “Waxaan sidoo kale jeclaan lahaa inaan caddeeyo sida buuxda ee Masar ay u taageersan tahay midnimada, wadajirka dhuleed iyo madax-bannaanida Soomaaliya, iyo diidmada qayaxan ee Masar ay ku diiddan tahay tallaabo kasta oo wax u dhimaysa madaxbannaanida iyo wadajirka dhuleed ee Soomaaliya.”

Munaasabadda xarigga looga jarayay duulimaadkii u horreeyay ee diyaaradda Egypr Air oo ka mid noqon doonta duulimaadyada caalamiga ah ee yimaada garoonka Caalamiga ah ee diyaaraddaha Aadan Cadde oo ka dhacday garoonka ayay si wadajir ah xarigga uga jareen Wasiirada Arrimaha dibadda Soomaaliya iyo Masar oo ay wehliyeen Wasiirada Gaadiidka labada dal.

Arrintan ayaa waxay astaan kale u noqoneysaa ahmiyadda Masar u leedahay Soomaaliya iyo xoojinta xiriirka soo jireenka ahaa ee labada dal, kaddib khilaafkii Soomaaliya iyo Itoobiya.

Nairobi (Caasimada Online) – Taliyihii guud ee ciidamada booliska dalka Kenya ayaa xilkii is-casilay, kadib mudaharaadyo rabshado wata oo toddobaadyo socda dalka, kuwaas oo galaaftay nolosha in ka badan 40 qof.

Hay’adaha xuquuqul insaanka ayaa ku eedeeyay booliska Kenya in ay toos u toogteen tobanaan dibad-baxayaal ah oo qaarkood ay dhinteen, boqolaalna ay qafaasheen ama si aan sharci ahayn loo xiray.

Bartamihii bishii hore waxaa ka dhacay dalka Kenya mudaaharaadyo looga soo horjeedo in la kordhiyo canshuuraha, dibadbaxa ayaa la xakameyn waayey.

Dibad-baxayaashu waxay xoog ku galeen baarlamaanka, wax yar kadib markii sharci-dajiyayaashu ay meel mariyeen sharciga muranka dhaliyay.

Intaas kadib Madaxweynaha dalka William Ruto ayaa qaaday tallaabo uu ku kala diray golihii wasiirrada dalka, taas dejisay inta badan shacabkii careysnaa ee mudaharaadayey maalmihii lasoo dhaafay.

William Ruto wuxuu Khamiistii shaqada ka eryay in badan oo ka mid ah golihiisa wasiirrada, isagoo ku dhawaaqay in uu soo dhisi doono xukuumad ‘ballaaran’.

Wasiirrada shaqada laga eryey waxaa ka mid ah Aadan Barre Ducaale oo ka soo jeeda Soomaalida Kenya, isla markaana ahaa wasiirka gaashaandhigga dalkaas, sidoo kale wuxuu saaxiib dhow la ahaa Madaxweyne William Ruto.

Muqdisho (Caasimada Online) – Wasiirka arrimaha dibadda Soomaaliya Axmed Macalin Fiqi ayaa maanta garoonka diyaaradaha Aadan Cadde kusoo dhaweeyay dhiggiisa Masar Badar Cabdulcaadi oo maanta Muqdisho u yimid daah-furka duulimaadka tooska ah ee diyaaradda Egypt Air.

Wasiir Fiqi oo shir-jaraa’id qabtay ayaa faah-faahiyay muhiimadda ay tallaabadan u leedahay xoojinta xiriirka labada dal, isagoo xusay in bilaabista duullimaadyadan tooska ah ay qayb ka qaadanayso xoojinta iskaashiga dhaqaale iyo ganacsi ee Wadan.

Wasiirka ayaa sidoo kale soo hadal qaaday doorka hormuudka ah ee Masar ay ka ciyaareyso taageeridda mowqifka dowladda Soomaaliya, isagoo carabka ku adkeeyay in Masar ay sii wadi doonto ka hortagga tallaabooyin kasta oo hoos u dhigaya madax-banaanida dalka.

“Jamhuuriyadda Masar ayaa ku celisay mowqifkeeda diidmada xadgudubyada Itoobiya, kadib wadahadal toddobaadkii hore khadka taleefonka ku dhax-maray Madaxweynaha JFS Dr. Xasan Sheekh Maxamuud iyo dhiggiisa Masar, Abdel Fattah El-Sisi.” ayuu yiri wasiir Fiqi.

Masar ayaa sanado badan saaxiib la aheyd Soomaaliya, laakiin waxay ku jirtay dowladihii ay xiriirkooda hoos iska dhigtay xukuumadii Farmaajo, balse dowladda Xasan ayaa ku soo celisay booskeedii saaxiibka dhow, taas oo dhashay in Egypt Air ay timaado Muqdisho.

Duulimaadka tooska ah ee diyaaradda Egypt Air ee la daah-furay ayaa ka dhigan tallaabo weyn oo loo qaaday dhanka sare u qaadida iskaashiga dhaqaale ee labada dal, taasi oo ka tarjumaysa himilooyinka guud ee labada shacab ee walaalaha ah.

Si kastaba, Soomaaliya ayaa waxaa bilihii u dambeeyay kusoo xirmayay duulimaadyo caalami ah oo hadda yimaada garoonka Aadan Cadde, kuna sii xira dalalka kale ee caalamka.

Luuq (Caasimada Online) – Madaxweyne ku-xgeenka koowaad ee dowlad-goboleedka Jubaland Maxamuud Sayid Aadan ayaa maanta kormeer ku tagay suuqa weyn ee degmada Luuq ee gobolka Gedo.

Suuqan ayaa ku gubtay rabshadahii maalmahii lasoo dhaafay ka jiray degmada Luuq, kadib markii laba maleeshiyo beeleed ay isku fara saareen gudaha degmadaasi.

Waxaa madaxweyne ku-xigeenka kormeerka ku wehlinayay xubno ka tirsan golayaasha kala duwan ee heer dederaal iyo heer Jubbaland iyo taliyaha qeybta saddexaad ee howl-galka ATMIS.

Dhinacyada colaadda u dhaxeysay ee ku dagaalamay degmada ayaa la faray inay qaataan xabad-joojin bilaa shuruud, ayna oo dhinacyada u diyaar garoobaan wada-xaajood lagu xalinayo mushkiladii dhacday.

“Waa in laga fogaado wax kasta oo carqaladeynaya nabadda degaanka, sida wada-hadallada socda sida kicinta bulshada,” ayaa lagu yiri qodobo kasoo baxay guddiga loo igmaday xal ka gaarista colaaddan, si xal nabadeed looga gaaro dagaalka.

Sidoo kale oo lagu yiri go’aannada guddiga kasoo baxay “In dhinacyada ku sugan Magaalada ay badbaadiyaan hantida dadka barakacay, iyada oo qofna aan dhib loogu geysan Karin heybtiisa.”

Guddiga ayaa ugu dambeyntiina ku baaqay in guud ahaan shacabka degmada Luuq ay ka wada qeyb qaataan nabadda, islamarkaana dadkii barakacay ay dib ugu soo laabtaan guryahooda.

Muqdisho (Caasimada Online) – Diyaaradda Masar ee Egypt Air ayaa maanta bilaabaysa duulimaadkeedii ugu horeeyey ee Soomaaliya, iyada oo duulimaad toos ah ka bilaabi doonto garoonka diyaaradaha Aadan Cadde.

Wafdi ballaaran oo uu hoggaaminayo wasiirka arrimaha dibadda ee Masar ayaa safar ku iman doona magaalada Muqdisho, iyada sidoo kale usii gudbi doonao Jabuuti oo ay kaga qayb-geli doonaan daah-furka duulimaad ay diyaaradda Masar ka samayn doono dalalkaasi.

Daah-furka duulimaadka shirkadda Masaarida ka bilaabayso Qaahir, Muqdisho iyo Jabuuti ayaa waxaa xigi doona kulamo lagu xoojinayo xiriirka ay Masaarida la yeelanayaan dalalkaan dhaca Geeska Africa.

Sida ay horey u shaacisay Egypt Air, todobaad kasta laba maalmood ayay diyaaradahooda kasoo duuli doonaan Qaahira, iyaga soo gaarayo Muqdisho, kadibna kusii hakanaya Jabuuti.

Dowladaha Soomaaliya iyo Masar ayaa si weyn iskugu soo dhawaanaya kadib markii madaxweynaha Soomaaliya Xasan Sheekh Maxamuud uu booqday Qaahira, halkaasi oo uu wada-hadallo kula soo yeeshay dhiggiisa Cabdifataax al-Sisi.

Masar ayaa sanado badan saaxiib la aheyd Soomaaliya, laakiin waxay ku jirtay dowladihii ay xiriirkooda hoos iska dhigtay xukuumadii Farmaajo, balse dowladda Xasan ayaa ku soo celisay booskeedii saaxiibka dhow, taas oo dhashay duulimaadka tooska ah ee diyaaradeedu ka bilaabeyso Muqdisho.

Si kastaba, Soomaaliya ayaa waxaa bilihii u dambeeyay kusoo xirmayay duulimaadyo caalami ah oo hadda yimaada garoonka Aadan Cadde, kuna sii xira dalalka kale ee caalamka.

Luuq (Caasimada Online) – Madaxweyne ku-xigeenka koowaad ee dowlad-goboleedka Jubbaland Maxamuud Sayid Aadan oo degmada Luuq ee gobolka Gedo oo u joogay xalinta shaqaaqooyinkii maalmahan ka jiray halkaas, ayaa waxaa laga soo saaray shan qodob, si dhinacyadu u gaaraan heshiis nabadeed rasmi ah.

Qodobadan oo uu soo saaray guddiga loo igmaday xal ka gaarista colaaddii dhacday ayaa ugu horeyn waxay dhinacyada fareen inay qaataan xabad-joojin bilaa shuruud.

Hoos ka aqriso qodobada kasoo baxay guddiga:

1. Xabad-joojin aan wax shuruud ah ku xirneyn oo labada dhinac ay dhaqan geliyaan.

2. In nabadda guud ee degaanka la qaato qofkii wax geystana ay isaga u gaar tahay tallaabo wada-jir ahna laga qaado.

3. In dhinacyada dirirtu dhex-martay ay u diyaar garoobaan wada-xaajood lagu xalinayo mushkiladii dhacday.

4. In laga fogaado wax kasta oo carqaladeynaya nabadda degaanka, sida wada-hadallada socda sida kicinta Bulshada.

5. In dhinacyada ku sugan Magaalada ay badbaadiyaan Hantida Dadka barakacay, iyada oo qofna aan dhib loogu geysan Karin heybtiisa.

Guddiga ayaa ugu dambeyntiina ku baaqay in guud ahaan shacabka degmada Luuq ay ka wada qeyb qaataan nabadda, islamarkaana dadkii barakacay ay dib ugu soo laabtaan guryahooda.

Dhinaca kale, Madaxweyne ku-xigeenka koowaad ee Jubbaland aoo kulamo kala duwan oo xal lagaga gaarayo wixii dhacay la yeeshay maamulka degmada, hay’adaha amniga iyo qeybaha kala duwan ee bulshada degmada ayaa baaq soo saaray.

Sayid ayaa dhinacyadii ku dagaalamay degmada Luuq ugu baaqay in la badbaadiyo hantida shacabkii barakacay iyo weliba inay qaataan xabad-joojin shuruud la’aan ah, si heshiis nabadeed rasmi ah loo gaaro.

Muqdisho (Caasimada Online) – Guddoomiyaha Golaha Shacabka Sheekh Aadan Madoobe ayaa xafiiskiisa ku qaabilay wakiilka gaarka ah ee xoghayaha guud ee QM u qaabilsan arrimaha Soomaaliya James Swan.

Kulankan oo Swan uu ku wehlinayay ku-xigeenkiisa ayaa waxaa looga hadlay shaqooyinka Golaha Shacabka gaar ahaan shuruucda horu-tabinta leh iyo arrimaha doorashooyinka.

Ergeyga ayaa dhankiisa guddoomiyaha uga warbixiyay shaqooyinka xafiiska QM ee Soomaaliya, isaga oo sheegay in ay diyaar u yihiin xoojinta iyo dardar-gelinta wada shaqeynta xafiiska Qaramada Midoobay iyo Golaha Shacabka ee baarlamaanka dalka.

Ugu dambeyntiina guddoomiye Aadan Madoobe ayaa uga mahad-celiyay ergayga iyo xafiiska Qaramada Midoobay taageeradooda Soomaaliya joogtada ah.

Waxaa uuna tilmaamay guddoomiyaha in Golaha Shacabka kalfadhiga shanaad ee dhowaan furmayal ay horyaalaan shuruuc muhiim u ah dowladnimada Soomaaliya.

Kulanka Swan iyo Aadan Madoobe ayaa kusoo aadaya xilli buuq badan ka taagan yahay baarlamaanka, ayada oo xildhibaannada qaar ay ka horyimaadeen qorshe ay Villa Somalia usoo dhiibtay guddoonka, kaasi oo la rabo in lagu meel-mariyo sharciyo ay qeyb ka yihiin kan doorashooyinka, guddiga doorashooyinka iyo xeerka lagu dhisayo iyo weliba sharciga axsaabta.

Madaxtooyadda oo gacan ka helaysa guddoonka baarlamaanka ayaa qorsheynaysa in sharciyadan ay marsato baarlamaanka inta lagu guda jiro kal-fadhiga 5-aad, kadib markii horey u marsatay baarlamaanka afartii cutub ee dastuurka ee mucaaradka ka qeyliyay.

Guddoomiye Aadan Madoobe ayey xildhibaannada mucaaradka ugu baaqeen inuu kasoo baxo jeebka Villada, oo ay ku eedeeyeen inuu ku jiro, iyagoo uga digay inuu golaha usoo waarido qorshaha uu muranka badan ka taagan yahay.

Muqdisho (Caasimada Online) –Madaxweynaha JFS Xasan Sheekh Maxamuud ayaa ka qayb galay Munaasbad lagu abaal-marinayay Saraakiisha Ciidamada Ammaanka iyo Howl-wadeenada Wasaaradda Waxbarashada ee doorka muhiimka ah ka qaatay qabsoomidda Imxitaanka Qaran ee dugsiyada sare ee dalka.

Madaxweynaha oo munaasabadaas khudbad ka jeediyey ayaa aad u amaanay Wasaaradda Waxbarashada dalka oo ku guuleysatay inay imtixaanka xakameyso, isla markaana gaarsiiso deegaano iyo degmooyin fog oo laga xoreeyey argagixisada, taas oo dadka Soomaaliyeed aad u dhiirigelisay.

Madaxweyne Xasan Sheekh ayaa dalacsiiyey saraakiisha ciidamadii sugay amniga ardayda, imtixaanka iyo howlwadeenadii ay u xil-saartay wasaaradda waxbarashada Soomaaliya.

Sidoo kale Madaxweynaha ayaa aad uga hadlay dagaalka Al-Shabaab, gaar ahaan wuxuu khudbadaan oo socotay 15 daqiiqo inteeda badan wuxuu digniin ugu diray dadka la shaqeeya Al-Shabaab.

“Dadka qaar waxay dhahayaan deegaanadii laga xoreeyey argagixisada dib ayey ugu soo laabteen, ma jirto hal degmo oo Khawaarij dib nooga qabsatay, dagaalkii aan ka bilownay daafaha Muqdisho ayaa sii maraya meesha aad aragteen, yaan lagu sirmin walaalayaal cadowga yaan loo hiilin,” ayuu yiri Madaxweynuhu.

Sidoo kale Madaxweynaha ayaa digniin u diray dadka ogaal li’ida iyo sida ku talagalka ahba uga shaqeeya Al-Shabaab, isagoo sheegay in dowladu ay soo bandhigi doonto liiska dad baaritaan ku socdo oo la shaqeeya Khawaarijta, kuwaas oo bulshada loo soo bandhigi doono.

“Khawaarijtu qaraaba maleh, iska jir akoon ha u furin, hala hadlin, waa taargad, dhaqaalaha ha u keydin, waa lagu daba jiraahe iska jir,” ayuu yiri Madaxweyne Xasan Sheekh oo caawa aad uga digay in lala macaamilo kooxaha Khawaarijta ah.

Hoos ka daawo