Muqdisho (Caasimada Online) –Madaxweynaha Jamhuuriyadda Federaalka Soomaaliya Xasan Sheekh Maxamuud ayaa Guddoomiyay Shirka Guddiga Qaran ee La-dagaallanka Lacag-dhaqidda iyo Ka-hortagga Maalgelinta Argagaxisada.

Shirkaas ayaa galabta lagu qabtay Xafiiska Amniga Qaranka ee Xarunta Madaxtooyada Qaranka.

Guddiga ayaa Madaxweynaha la wadaagay warbixinno ku saabsan hannaankooda shaqo, guulaha laga gaaray xakamaynta ilaha dhaqaale ee Khawaarijta iyo qorsheyaasha cusub ee lagu wajahayo xeeladaha dhaqaale abuurka Argagixisada.

Sidoo kale kulanka waxaa lagu soo bandhigay xogta shaqsiyaad ka tirsan Khawaarijta oo lagu soo rogayo cuna-qabatayn dhaqaale.

Madaxweyne Xasan Sheekh ayaa dul istaagay muhiimadda dagaalka ka dhanka ah dhaqaalaha ee Argagixisadu u leeyahay ciribtirka Khawaarijta iyo nabad kusoo dabaalidda dalka.

Madaxweynaha ayaa faray masuuliyiinta ku mideysan Guddigan in la dardar geliyo qorsheyaasha burburinta ilaha dhaqaale ee Khawaarijta iyo ciribtirka khataraha maaliyadeed ee dalka, gaar ahaan lacag dhaqidda.

Dowladda Soomaaliya ayaa Khawaarijta Al-Shabaab la gashay dagaal dhaqaale oo aad u culus, waxaana laga gaaray natiijo weyn sida lagu soo bandhigay warbixinta guddiga.

Mar kale ayaa laga fekerayaa sidii loo dardar gelin laha dagaalka dhaqaale ee lahu hayo Al-Shabaab, kooxda ayaa hadda ku jirta dhiigbax dhaqaale, waxaana socda qorshe looga sii darayo.

Jabuuti (Caasimada Online) – Dowladda federaalka Soomaaliya iyo dowladda Jabuuti ayaa maanta kala saxiixday heshiis iskaashi wada-shaqeyn iyo mataaneyn ah warbaahinnada qaranka ee labada dal.

Wasiirka wasaaradda warfaafinta, dhaqanka iyo dalxiiska dowladda federaalka Soomaaliya Daa’uud Aweys Jaamac iyo wasiirka wasaaradda isgaarsiinta iyo boostada ee Jabuuti Ridwaan Cabdullaahi Bahdoon ayaa goobjoog ka ahaa munaasabadda saxiixa heshiiskan iskaashi.

Munaasabadda oo lagu qabtay xarunta wasaaradda warfaafinta iyo isgaarsiinta Jabuuti waxaa khudbado ka jeediyey labada wasiir, iyadoo ugu horeyn wasiirka wasaaradda warfaafinta Soomaaliya uu tilmaamay in maanta ay tahay maalin taariikhi ah oo si rasmi ah loo mataaneeynayo warbaahinta qaranka labada dowladood.

Warbaahinta labada dowladood ayaa hadda kadib si rasmi ah iskaashi wada shaqeyneed u yeelan doona, ayada oo wasiirka warfaafinta Jabuuti uu soo dhaweeyay tallaabadan, isaggoo sheegay in dhankooda ay diyaar u yihiin fulinta iskaashigan iyo iney khibrad is dhaafsi iyo wada-shaqeyn la yeeshaan walaalahooda Soomaaliyeed, isagoo wasiirka warfaafinta Soomaaliya uga mahad-celiyey wada shaqeyntiisa.

Iskaashigan shaqo ee ay maanta ku kala saxiixdeen magaalada Jabuuti warbaahinnada qaranka labada dal waxaa dhanka Soomaaliya u saxiixay agaasimaha Radio Muqdisho C/fataax Daahir Jayte halka uu Jabuuti u saxiixay agaasimaha guud ee raadiyaha iyo telefishinka Jabuuti Aadan Cabdi Jaamac.

Munaasabadda waxaa sidoo kale goobjoog ka ahaa Danjiraha Soomaaliya u fadhiya Jabuuti Salaad Cali Jeelle iyo Danjiraha Jabuuti u fadhiya Soomaaliya Maxamed Rashiid.

Dhinaca kale, wqsiirka wasaaradda warfaafinta, dhaqanka iyo dalxiiska Soomaaliya Daa’uud Aweys Jaamac iyo wafdigiisa oo booqasho rasmi ah ku jooga dalka Jabuuti ayaa kormeeray xarunta raadiyaha iyo telefishinka Jabuuti ee RTD, halkaasi oo loogu sharaxay sida ay u shaqeeyaan.

Muqdisho (Caasimada Online) – Shirka toddobaadlaha ah ee golaha wasiirrada xukuumadda Soomaaliya oo uu guddoominayey ra’iisul wasaare Xamza Cabdi Barre ayaa maanta lagu ansixiyey sharciyo muhiim ah.

Golaha wasiirada ayaa ansixiyay hindise-sharciyeedka sharciga canshuuraha dakhliga iyo xeer-nidaamiyaha maareynta maaliyadda guud, siyaasadda deymaha iyo hanaanka amaahashada iyo soo saarista damaanadaha.

Golaha ayaa warbixin ku saabsan horumarka iyo dhismaha kaabayaasha shaqaalaha dalka ka dhageystay wasaaradda howlaha guud oo soo bandhigtay waddooyin laga dhisayo Garoowe, Baydhabo iyo Kismaayo

Sidoo kale wasaaradda ayaa soo bandhigtay waddooyin qorshuhu yahay in laga dhiso magaalooyinka Beledweyne iyo Dhuusamareeb, halka magaalada Muqdisho laga hirgelin doono biyo mareenno iyo dhuumo qaada bullaacadaha.

Golaha wasiirrada ayaa ugu dambeyntiina wuxuu warbixin ka dhageystay wasaaradaha amniga gudaha iyo difaaca howl-gallada lagu cirib-tirayo kooxda Al-Shabaab ee ka socda qaar kamid ah gobollada dalka.

Waxa uuna goluhu bogaadiyey howl-galladii ugu dambeeyey oo deegaanno dhowr ah looga sifeeyey kooxda Al-Shabaab, oo ay kamid yihiin Buurweyn iyo Show oo ka tirsan gobolka Hiiraan, kuwaas oo saaka laga qabsaday kooxda.

Wejiga labaad ee dagaalka oo dhawaan bilaaban doona ayaa la filayaa in looga sifeeyo deegaanada ay weli kooxda kaga harsan tahay maamulka HirShabelle iyo Galmudug, ayada oo loo gudbi doono maamullada Koonfur Galbeed iyo Jubbaland oo kooxda ku xoogan tahay.

Hargeysa (Caasimada Online) – Kadib heshiiskii muranka badan dhaliyay ee dhex-maray Somaliland iyo Itoobiya ayaa mar kale maanta labada dhinac waxa ay qaadeen tallaabo kale oo xasaasi ah, kuna soo aaday, ayada oo kasii dareyso xiisadda ka dhalatay heshiiska badda.

Somaliland ayaa maanta ciidamadii ugu badnaa u dirtay dalka Itoobiya, si loogu soo tababaro, waxaana maanta ciidamadaas ay ka baxeen magaalada Hargeysa, ayaga oo kusii jeedo magaalada caasimada ah ee Addis Ababa.

Taliyaha guud ee ciidamada milatariga Somaliland Sareeye Gaas Nuux Ismaaciil Taani ayaa sagootiyay ciidamadan oo Itoobiya ay  Somaliland u soo tababarayso, wuxuuna kula dardaarmay inay ka faa’iideystaan tababarkaasi.

Sareeye Gaas Nuux Ismaaciil Taani ayaa ciidamada kula hadlay magaalada xuduuuda ku taalla ee Wajaale, halkaas oo basas looga qaaday, wuxuuna u mahadceliyay dowladda Itoobiya.

Sidoo kale wuxuu intaasi kusii daray in tani ay sii xoojineyso iskaashiga labada dhinac oo uu sheegay inay wadaagaan dano badan oo isku xiran, maadaama ay daris yihiin, ayna ka wada faa’iideysanayaan fursadaha dhexdooda ah.

Waa tallaabo kale oo ay qaadeen Addis Ababa iyo Hargeysa oo maalmihii lasoo dhaafay aad isugu soo dhawaanayay, kadib markii ay wad galeen heshiiskii isgarad ee badda, kaas oo ay ka carootay dowladda federaalka Soomaaliya.

Arrinta heshiiska ayaa weli halkeedii ah, waxaana labada dhinac ay ku adkeysanayaan dhaqangelintiisa, halka dowladda Soomaaliya ay weli ka biyo diidan tahay heshiiskaas, waxaana dhowaan fashilmay wada-hadallo u dhexeeyay Soomaaliya iyo Itoobiya oo ka dhacay dalka Turkiga.

Si kastaba, lama oga sida ay wax noqon doonaan, waxaase xaalka sii xumeynaya tallaabooyinka dheeraadka ah ee ay sii qaadayaan Somaliland iyo Itoobiya.

Jalalaqsi (Caasimada Online) – Wararka naga soo gaaraya gobolka Hiiraan ayaa sheegaya in saaka ciidamada dowladda Soomaaloya oo kaashanaya dadka deegaanka ay la wareegeen deegaano muhiim ah oo ku yaalla gobolkaas oo dhaca bartamaha dalka Soomaaliya.

Ciidamada huwanta oo ka dhaqaaqay aagga degmada Jalalaqsi ayaa gudaha u galay deegaanada Buurweyn iyo Show oo ka tirsan gobolka Hiiraan, kuwaas oo ay horay ugu sugnaayeen maleeshiyaadka Al-Shabaab.

Guddoomiyaha maamulka degmada Jalalaqsi Nuur Maxamed Absuge (Nuur dheere) oo ka mid ah mas’uuliyiinta howlgalka hoggaaminaya ayaa sheegay inay haatan ku sugan yihiin labadaas deegaan, isla markaana ay ka wadaan howlgallo amni xaqiijin ah.

Nuur dheere oo horay u ahaa sarkaal ka tirsanaa milatariga ayaa sheegay inay sii wadi doonaan howlgalladooda, uuna ujeedka uu yahay in Al-Shabaab laga xoreeyo dhulkaasi.

Sidoo kale wuxuu ugu baaqay dadka deegaanka inay garab istaagaan ciidamada, isla markaana ay ka qayb qaataan xoreynta gobolka Hiiraan.

Xaaladda deegaanada lala wareegay ayaa hadda ah mid deggan, waxaana fariisimo cusub ka sameystay ciidamada Xoogga dalka iyo kuwa deegaanka ee gaaray halkaasi.

Hiiraan ayaa kamid ah meelaha lagu jabiyay kooxda Al-Shabaab, waana halka uu kasoo billowday kacdoonka shacab ee ka dhanka ah maleeshiyaadka Khawaarijta, kaas oo weli ka socda gobollo badan oo kamid ah dalka.

Kismaayo (Caasimada Online) – Faah-faahino dheeraad ah ayaa waxaa laga helayaa khasaaraha ka dhashay weerar rogaal celis ah oo ay saaka Al-Shabaab ku qaadeen deegaano dhowaan uun lagala wareegay oo ku yaalla duleedka magaalo xeebeedka Kismaayo ee xarunta gobolka Jubbada Hoose.

Weerarka oo ka dhacay agagaarka deegaanka Buuloxaaji ayaa waxaa xigay dagaal toos ah oo dhex-maray ciidamada Jubbaland oo garab ka helaya kuwa Danab iyo Al-Shabaabkii weerarka soo qaaday, kaas oo qaatay saacado badan.

Ilo dadka deegaanka ah ayaa innoo sheegay in dagaalka uu xooganaa, isla markaana ay maqlayeen daryanka hubka culus ee ay is weydaarsanayeen labada dhinac, waxaana jira khasaare dhimasho iyo dhaawacba leh.

Ugu yaraan illaa 7 askari oo ka tirsanaa ciidanka Jubbaland ayaa weerarka lagu dilay, halka lagu dhaawacay tiro lale, kuwaas oo la gaarsiiyay isbitaalka guud ee magaalada Kismaayo, sida ay innoo xaqiijiyeen ilo wareedyo xilkas ah.

Saraakiisha ciidanka Daraawiishta Jubbaland oo ka hadlay dagaalkan waxa ay sheegeen inay iska difaaceen Al-Shabaabkii weerarka soo qaaday, ayna gaarsiiyeen khasaare culus.

Xaaladda ayaa haatan ah mid aad u kacsan, waxaana weli ciidamada ay kusii siqayaan deegaano horleh oo ku yaalla gobolkaas, si ay uga fara maroojiyaan Al-Shabaab.

Maalmihii u dmabeeyay ciidamada dowladda iyo kuwa Jubbaland ayaa kordhiyay howlgallada ka socda aagga magaalada Kismaayo, waxayna horay la wareegeen Buuloxaaji iyo deegaano kale.

Si kastaba, Jubbaland ayaa waxaa si rasmi ah uga billowday wajiga labaad ee dagaalka lagula jiro Al-Shabaab, kaas oo ay hoggaamineyso dowladda federaalka Soomaaliya.

Marka (Caasimada Online) – Ciidamada Nabad-suddiga Soomaaliya oo maanta qaaday weerar culus ayaa soo dilay xubno ka tirsan Al-Shabaab oo ay ku jiraan horjoogayaal, kuwaas oo ku sugnaa duleedka degmada Marka ee xarunta gobolkaasi.

Howlgalkan oo uu hoggaaminayay taliyaha NISA ee Marka Maxamed Sheekh Xasan ayaa waxaa sidoo kale ka qayb qaatay guutada 14 October ee fadhigoodu yahay gudaha magaaladaas, waxayna beegsadeen goobo ay ku sugnaayeen maleeshiyaadka Al-Shabaab.

Sidoo kale waxaa howlgalka ku biiray afhayeenka wasaaradda gaashaandhigga Sheekh Abuukar Maxamed Xasan oo isaguna tegay jiidda hore ee dagaalka, gaar ahaan deegaanada ay ka socdaan howlgallada.

Taliyaha Nabad-sugidda Marka oo la hadlay warbaahinta ayaa sheegay in markii hore ay madaafiic ku garaaceen saldhigyada Al-Shabaab, kadibna ay ku qaadeen weerar toos ah, kaas oo uu tilmaamay in maleeshiyaad iyo horjoogayaal ay uga dileen.

Maxamed Sheekh Xasan ayaa sidoo kale tilmaamay inay howlgaladdooda ku gaareen deegaanada Sagaaroole, Cadceed, Farange iyo Buundo Libaax oo dhammaan hoostaga magaallo xeebeedka Marka.

Waxaa kale oo uu intaasi kusii daray inay sii wadi doonaan dhaq-dhaqaaqyadooda, isla markaana ujeedkooda uu yahay inay Al-Shabaab ka xoreeyaan dhulkaasi.

Dhinaca kale ma jiro wax hadal ah oo kasoo baxay Al-Shabaab oo ku aadan howlgalkaasi ee guusha ka sheegatay dowladda federaalka Soomaaliya.

Maalmihii u dambeeyay waxaa Shabeelaha Hoose ka socday howlgallo culus oo ka dhan ah kooxda Al-Shabaab, waxaana barbar socda duqeymo iyo dagaallo mararka qaar dhex mara labada dhinac.

Xeraale (Caasimada Online) – Wararka naga soo gaaraya helayo gobolka Galgaduud ee bartamaha Soomaaliya ayaa sheegaya in maanta carruur walaalo ah ay miino kula qaraxday magaalada Xeraale ee gobolkaasi, waxaana soo gaaray dhimasho iyo dhaawac.

Carruurta oo ahaa laba wiil iyo gabar  ayaa midka u weyn da’ahaan jiray 6 sano, waxaana ku qarxay miino ay ku ciyaarayeen, sida ay innoo sheegeen dadka deegaanka.

Laba kamid ah carruurta ayaa goobta ku geeriyooday, halka mid kale dhaawac culus oo soo gaaray saacado kadib uu isna ku dhinatay isbitaal ku yaalla magaalada Xeraale.

Mid kamid ah dadka deegaanka oo la hadlay warbaahinta ayaa sheegay in falkan uu ku reebay argagax wayn, isla markaana ay soo wajahday cabsi xoogan oo la xiriirta haraadiga hubka iyo walxaha qarxa oo dhulkaasi ku badan, maadaama ay ka jiraa dagaallo iyo colaado sokeeye.

“Meeshan waxaa ka dhacday ciyaal-baa miino ku qaraxday, miinada illaa iyo hadda meel ay ka keeneen lama yaqaano, hadda waxaan ku jirnaa aaska saddexda carrruuta ah” ayuu yiri.

Dhinaca kale ma jiro illaa iyo hadda wax war ah oo kasoo baxay maamulka degmada iyo saraakiisha laamaha amniga Galmudug oo ku aadan dhacdadaasi xanuunka badan.

Soomaaliya waxaa inta badan la soo wariyaa waxyeello ka dhalata haraadiga hubka aan weli qarxin iyo miinooyinka dhulka lagu aaso oo ay dhibaato ka soo gaarto shacabka.

Si kastaba, tan iyo dagaallada sokeeye ee wadanka ka dhacay, waxaa la arka haraadiga hubkii lagu dagaalamay oo yaallo goobo kala duwan, taasi oo inta badan ay khasaare kala kulmaan carruurta yar yar ee Soomaaliyeed.

Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa xarunta wasaaradda gaashaandhigga iyo taliska ciidanka xoogga dalka kulammo kula qaatay hoggaanka wasaaradda iyo viidanka xoogga.

Saraakiisha ayaa la wadaagay madaxweynaha warbixinihii ugu danbeeyey ee dagaalka ka dhanka ah kooxda Al-Shabaab, gaar ahaan xoreynta deegaanno ka tirsan Jubbaland oo lagu guuleystay.

Sidoo kale waxay soo bandhigeen sida ay uga go’an tahay ciidamada qalabka sida inay sii wadaan halganka dalka lagaga xoreyanyo kooxda Al-Shabaab, kaasi oo dhawaan geli doona wejigiisa labaad.

Madaxweyne Xasan oo horraantii bishaan tegay furimaha hore ee dagaalka ayaa dib u bilaabay dhaq-dhaqaaqyo xooggan oo lagu dar-dargelinayo dagaalka, isaga oo xaqiijiyay sida dowladda ay u diyaarisay qalabka, gaadiidka, xarummaha ciidan iyo hubkii lagu dhammeystiri lahaa xoreynta dalka.

Dhawaan ayaa filayaa inuu si rasmi ah u bilowdo wejiga labaad ee dagaalka oo dhowr jeer uu dib u dhac ku yimid, kaasi oo kooxda siisay nafis ay dib isugu soo abaabuli karaan, ayaga oo weeraro rogaal celin ku qaaday deegaano horey looga qabsaday.

Wejiga koowaad ee dagaalka ayaa markii uu bilowday laga gaaray guullo wax ku ool ah, ayada oo ciidanka dowladda iyo shacabka hubeysan ay dagaal adag la galeen kooxda, iyaga oo ka xoreeyay deegaan iyo degmooyin muhiim ah.

Wejiga xiga ee dagaalka ayaa la filayaa in kooxda looga sifeeyo deegaanada ay weli kooxda kaga harsan tahay maamulka HirShabelle iyo Galmudug, ayada oo loo gudbi doono maamullada Koonfur Galbeed iyo Jubbaland oo kooxda weli ku xoogan tahay.

Muqdisho (Caasimada Online) – Golaha Wasiirada Somaliland ayaa maanta yeeshay kulan waqtigiisa laga soo hormariyay, kaasi oo uu shir-guddoominayey madaxweynaha Somaliland Muuse Biixi Cabdi, uuna ku wehlinaayey ku-xigeenkiisa Cabdilaahi Ismaaciil Saylici.

Kulankan ayaa lagu gorfeeyay arrimo kala duwan oo ay kamid yihiin amniga, doorashooyinka, difaaca qaranka, caafimaadka, diyaar-garowga oddoroska miisaaniyadda 2025 iyo horumarinta kalluumaysiga.

Golaha Wasiirradu ayaa war-bixin guud oo la xiriirta amniga dalka ka dhageystay wasiirka arrimaha gudaha Maxamed Kaahin oo golaha uga warbixiyey amniga guud ee dalka iyo xaaladda nabad-gelyada mandaqadda geeska Afrika.

Golaha ayaa sidoo kale waxa uu caddeeyey in doorashada Somaliland waqtigeedii lagu qabanayo, deegaannada Somaliland-na si adag looga difaacayo kuwa ay sheegtay inay isu soo bahaysateen inay waxyeelleeyaan qarannimadeeda, sida lagu yiri bayaan kasoo baxay kulankan.

“Somaliland waajib ayey ku tahay inay sidaa ugu diyaar garoobaan doorashada iyo difaaca qarankaba,” ayaa sidoo kale lagu yiri bayaanka Somaliland, oo loogu goodiyay dhinacyo ay sheegtay inay usoo hanjabayaan oo colaaddu u cusub tahay.

Dhinaca kale, golaha ayaa warbiximo ka dhageystay wasiirrada wasaaradaha horumarinta maaliyadda, Dr. Sacad Cali Shire oo golaha xog-warran ka siiyey arrimaha dhaqan dhaqaale iyo diyaar-garowga odoroska miisaaniyadda 2025 ee dalka, horumarinta caafimaadka oo ku dheeraaday xaaladda xannuunada kala duwan ee ay ka mid ka tahay xummadda (Dengue fever) oo Somaliland ka jirtay muddooyinkii u danbeeye.

Golaha ayaa sidoo kale waxaa lala wadaagay qorshaha kobcinta horumarinta kalluumaysiga dalka oo ay baahi weyn u qabaan bulshada Somaliland iyo sidii suuqyo cusub loogu heli lahaa kalluunka dalka.

Ugu dambeyntiina golaha wasiirrada ayaa waxa taariikhda markii u horaysay loo qaybiyey qabyo qoraalka xeerka ciqaabta guud ee Somaliland, oo ay golaha keenneen wasiirka xiriirka golayaasha qaranka Cabdinaasir Buuni iyo xeer ilaaliyaha guud ee qaranka Cabdiraxmaan Hayaan.

Muqdisho (Caasimada Online) – Kulan xasaasi ah oo ay maanta lahaayeen xildhibaannada Golaha Shacabka ayaa maanta baaqday, waxaana guddoomiye Sheekh Aadan Madoobe uu sheegay in uu yahay qalad wayn oo ka dhacay baarlamaanka.

Sababta uu u baaqday kulankan oo bilow u ahaa kalfadhigga 5-aad ee Golaha Shacabka ayaa la xiriira kooram la’aan, kadib markii ay soo xaadiri waayeen xildhibaanno badan.

Sheekh Aadan Madoobe ayaa tilmaamay in kaliya 108 xildhibaan ay soo xaadireen, taasina ay tahay ayaan darro, maadaama ay fasax dheer kasoo laabteen xildhibaannadu.

“Maadaama saddex bilood fasax la galay maanta waxaan fileynay in si xamaasad leh loo imaanaayo oo shirka noo furmaayo oo shuruucdii kalfadhiga 4-aad dhaqaaqi waayay aan xoogga saarno oo maanta shaqadaas bilaabeyno walaalayaan waan ka xumahay in kooramkii la waayay oo la yiraahdo 108 ayaan dhaafi waynay” ayuu yiri Aadan Madoobe.

Sidoo kale wuxuu tilmaamay in arrintan ay tahay qalad wayn oo dhacay, maadaama ay baaqatay shaqadii ay Umadda Soomaliyeed ka sugayeen xildhibaannadooda.

“Saaka waxaan is leeyahay qalad wayn ayaa dhacay marka waxaan usoo jeedinayaa xildhibaannada yimid ee isa soo xilqaamay waad mahadsan tihiin waajibkiina dastuuriga ah ayaad gudateen, waana idinka mahacelinayaa” ayuu yiri Sheekh Aadan Madoob.

Guddoomiyaha ayaa sidoo kale farriin culus u diray xildhibaanno uu sheegay inay joogaan magaalada Muqdisho, haddana ay xaadiri waayeen kulankii maanta, taas oo uu sheegay inay ceeb ku tahay, maadaama ay gudan waayeen waajibkii dastuuriga ah ee lagu lahaa.

“Xildhibaannada maanta imaan waayay kuwa dibadda jira oo aan weli imaan iyo kuwa jooga ayay kala yihiin waxaan leeyahay baarlamaanka waa la furay ha yimaadaan, xildhibaannada jooga magaalada ee imaan waayay fadhiga waa is ceebeyseen, baarlamaankana waad ceebeyseen, waana gudan wayseen waajibaadkiisa” ayuu raaciyay.

Ugu dambeyn guddoomiyaha Baarlamaanka ayaa soo xiray kulankii, wuxuuna sheegay inuu u baaqday maqnaasha xildhibaannada tagi waayay xarunta Villa Hargeysa.

“Maanta sidaas ayuu shirka ku baaqday dad magaalada jooga daraadeen ayaa shirkiina daraadiis u qabsoomi waayay oo xildhibaanno ah” ayuu kusoo gabagabeeyay.