Muqdisho (Caasimada Online) – Caawa, magaalada Muqdisho waxaa ka da’ay roob mahiigaan ah oo xooggan, kaas oo saameyn ku yeeshay nolosha iyo isku socodka dadka magaalada, xaafadaha iyo waddooyinka magaalada ayaa laga soo werinayaa in roobku khasaare ka geystay.
Roobabkan mahiigaanka ah ayaa sababay in wadooyinka qaar ee magaalada ay biyo fariistaan, taasoo keentay in gaadiidka iyo dadka lugaynaya ay la kulmaan dhibaatooyin xoog leh.
Sidoo kale, waxaa suurtagal ah in roobabku sii socdaan oo ay kordhiyaan khatarta fatahaadaha iyo waxyeellada kale ee ka dhalan kara.
Sida laga soo xigtay saadaasha cimilada, waxaa la filayaa in roobab mahiigaan ah ay sii socdaan caawa, iyadoo ay suurtagal tahay in ay ka dhacaan duufaanno iyo dabeylo xooggan.
Dadka deegaanka ayaa lagu wargelinayaa in ay taxaddar muujiyaan, gaar ahaan kuwa ku nool meelaha ay biyuhu fariistaan ama meelaha ay fatahaaduhu ka dhici karaan.
Waxaa muhiim ah in la raaco tilmaamaha ay bixiyaan hay’adaha amniga iyo kuwa gurmadka degdegga ah, si loo yareeyo khatarta ka dhalan karta roobabka mahiigaanka ah ee ka da’aya magaalada Muqdisho.
Magaalada oo aan laheyn wax bulaacado ah ayaa waxaa qulqulaya daadad ka dhashay roobka, qulqulka biyaha ayaa jaray laamiga isgoyska Soobe, waxaana go’day isku socodkii wadadaas.
Qeybo badan oo magaalada ah, waxaa laga soo werinayaa in roobku uu caawa ka geystay khasaare u badan guryo burburay iyo kuwo biyuhu qaadeen.
Roobkaan oo weli ka da’aya Muqdisho wixii ka soo kordha kala soco Caasimada Online.
