Muqdisho (Caasimada Online) – Shirka Golaha Wasiirada Xukuumadda Soomaaliya oo maanta ka qabsoomay xafiiska ra’iisul wasaaraha dalka ayaa waxaa looga hadlay arrimo dhowr ah, ayada oo Goluhuna ay meel-mariyeed hindise sharciyeedyo muhiim ah, waxayna sidoo kale guddi gaar ah u xil-saareen cunaqabateynta hubka ee weli saaran Soomaaliya.
Shirka ayaa waxaa guddoomiyay Ku-simaha Ra’iiisul Wasaaraha ahna Ra’iisul Wasaare ku xigeenka dalka Mudane Saalax Axmed Jaamac, ayada oo ay joogeen inta badan Golaha.
Ugu horreyn xubnaha Golaha Wasiirada Soomaaliya ayaa todobaadkan ansixiyey Hindise Sharciyeedyada kala ah, Dhiirigelinta Maalgashiga, Hindise Sharciyeedka Hey’adda Xisaabiyaasha Soomaaliyeed iyo Hindise Sharciyeedka Dhismaha Hey’adda Socdaalka iyo Jinsiyadaha Soomaaliyeed.
Sidoo kale xubnaha Golaha ayaa loo qeybiyey Hindise Sharciyeedka Daawada iyo Badqabka Cunnada Soomaaliya iyo Hindise Sharciyeedka Dhowrista Maalgashadayaasha iyo Maalgashiyada, si ay usoo aqriyaan, kadibna ay wax ku daraan, si loo ansixiyo.
Inta uu shirka socday sidoo kale Golaha Wasiirada ayaa guddi gaar ah u saaray xaqiijinta ka saarista Soomaaliya cunaqabateynta hubka oo markale dhowaan Golaha Ammaanka ee Qaramada Midoobe ay ku kordhiyeen Soomaaliya oo haatan la dagaalameysa Al-Shabaab.
Golaha ayaa sidoo kale warbixin ka dhageystay Wasaaradaha Amniga Gudaha iyo Gaashaandhigga oo ka warbixiyay howolgalladii ugu dambeeyay ka dhacay dalka, gaar ahaan meelaha ay marayaan dadaallada xoreynta dalka ee haatan ka socdo gobollada.
Ugu dambeyn Golaha ayaa boggaadiyey guulaha isdaba joogaa ee laga gaaray howlgallada xoreynta ee ka socda qaar kamid ah gobollada dalka, kaas oo lagu jebiyay Al-Shabaab.
Shirka wuxuu todobaadkan kusoo aadayo, ayada oo haatan uu ra’iisul wasaare Xamza booqasho ku joogo magaalada Qaahira ee dalka Masar, safarkaas oo ay ku welinayaan wasiiro ay ka mid yihiin Arrimaha Dibadda, Waxbarashada iyo sidoo kale Warfaafinta.
