Sawirro: Xus loo sameeyey sanad guuradii 25-aad ee howlgalkii Australia ee dalka Somalia

By Saalax Saciid Sabriye

Lone Park Barracks (Caasimadda Online) – Dowladda Australia ayaa u dabaaldagtay sanadguuradii 25-aad ee kasoo wareegatay howgalkii UNISOM ee laga fuliyey dalka Soomaaliya.

Xafladda ka dhacday duleedka Magaalada Lone Park Barracks dalka Australia ayaa lagu xusay sanadguuradii kasoo wareegtay howgalkaas oo ay qeyb ka aheyd wadamadii ka qeybgalay.

WO1 Hodges oo ahaa afhayeenkii ciidamadii ay Australia u dirtay howgalkii UNISOM ayaa sheegay inay howlgalkaas uga qeybgaleen ilaa 990 qof, wuxuuna sheegay inay Soomaaliya gaareen May 13, 1993..

Afhayeenka ayaa tibaaxay inay Soomaaliya xilligaas ka jirtay abaar iyo gaajo aad u daran oo keentay inay dhintaan ilaa 300,000 qof oo Soomaali ah.

Wuxuu tilmaamay inay shaqo fiican kasoo qabteen Soomaaliya isla markaasna ay badbaadiyeen dad badan oo gaajo u dhiman lahaa sidau u hadalka u dhigay.

Wuxuu sheegay inay ciidamadooda ka qeyb qaateen sidii hey’adaha gargaarka loogu ogolaan lahaa inay dadka dhibaateysan gaarsiiyaan gargaarka bini’aadanimo oo dhinac walba ah.

” Soomaaliya waxaa u tagnay sidii aan u badbaadin laheyn dad badan oo dhibaateysnaa, Inkastoo ay dad badan gaajo u dhinteen, haddana khibrad badan ayaan kasoo helnay howlgalkaas” ayuu yiri afhayeenka.